MÜCHITMUDU 27 - AMÜSÜH HÜM CL Bible (BSI)

¹ Shido thsungkheak dükükheang, tümütüsho tümü nimung arübanü nünü mümükheah.

² Nü münnü yungde püpürünü nü shishang–hanrünü she; küyimkishe nü küdahnü a düh.

³ Lung ju mülanglah tüsho loyi adünkhitlah, tüshe makharü bukmükekhi ju ane chido kheaknü amülangbe ah.

⁴ Bukmükekhi ju yihkhro tüsho bukakhiukkhi ju düchi, tüshe shepünü mükthsükhi müngüh zhipkhukba?

⁵ Aramlimnü amuzhokhi kheaknü a amikheaknü athürühkhi atsübe.

⁶ Müyamrünü yurijihkhi ju thiyuro, tüshe thiririnü müthsüpkhibo ju amülapyukbe.

⁷ Küyimki nü bukthsübanü, nünü mukhuke thsunglobah, tüshe küyimki nü akhümbanü, tsühyungbe akhüh she aniung tsühkhitchoh.

⁸ Mihtsürü shepü nihbuh yam chingnü rümde tsahchonü wuhnu asap chingnü rümde atsahkhi nangde lah.

⁹ Rhümthüneabe tüsho jinjinlaknü mulong asühshihchoh, tüshe me a küpkhuknü thsümünimshihchoh.

¹⁰ Nü müyamrü yungsho nü buh müyamrü dübahyuk, tüsho nü thsünü nimung nü keoniorü yam ching düyü; tümüde limshude alakhi nü keniorü kheaknü phünide alakhi nü yamhingrü atsübe ah.

¹¹ I tsah-a, lümlung laang, tüsho I mulong asühshang, junangde I chikhirü ki inü alobah.

¹² Rük lakhi mihtsürünü amütsü ngüjungbah jikchoh; lümlangrünü yüchoh tüsho thsünüchoh.

¹³ Khürünü makhade khiungkerü mah dünkheak hahmülang lupü alokhisho nihbuh lakhit jihlopü thsüde thiyuchihchimpü kamchoh.

¹⁴ Shepünü yapsu mükikde asürübah düsheak achangnü api müyamrü müngühjihbanü, ju api muthrumünean khejihbah.

¹⁵ Tsüng arü nimung mutukzhakde atsamkhi tüsho rukachih yamkhünberü rukhüh ah;

¹⁶ shepünü anihbe danlochonü apung danlochoh, tüsho api khah tsülim müdangke shuhchoh.

¹⁷ Yinchinü yinchi zükhitchoh, junangde mihtsürü khülangnü püpürü zükhitchoh.

¹⁸ Shepünü khubasodung kümchonü ju sangaso tsühbah; junangde shepünü nihbuh putungrü aleangchonü wüntre jihbah.

¹⁹ Ke ching miro ayinkhitkhi nangde, mihtsürü mulongnü mihtsürü ayinkhitchoh.

²⁰ Ashekhi tüsho Athsümünim küyimkishe mümi; junangde mihtsürü mükbo küyimkishe reangmükeam.

²¹ Suna tüsho shotoyinchi ju monü thsahakheahchoh, tüshe mihtsürü a api mungshi ngükhinü rükakia kheahchoh.

²² Nünü makharü ju hi nangde ayihnü thsam ching chuchu she, anihbuh makhakhi api kheaknü müchamachih.

²³ Nü yo namfimihnu boto lalimlako tsüde mükheahang, tüsho nü moshi boto kümkangde kheahang;

²⁴ tümüde lakhitbo lünnü alapü yung, yungsho kuthran ju lünbo alala ching rünkhiungde müla.

²⁵ Küyimki rim rhipkhi luba tüsho aso akhiukloba tüsho awungbo chingnü rim hanmukhungbanü,

²⁶ namfimihnunubonü nü kilim khimmih, tüsho mihnubonü thulu dün jihbah;

²⁷ nü tüsho nü yamkhün thsungkheak tsühyungbe, tüsho nü yamlaberü mütrüpü mihnu niuhke suhdahde alabah.