MÜCHITMUDU 26 - AMÜSÜH HÜM CL Bible (BSI)

¹ Muzhu ching phürüm tüsho yimlu ching tsüng lakhi nangde makharü thsungkheaknü mungshipü maye.

² Phinakhinde ayükhi khüjak nangde, aphinkhi kiurürüt nangde, amütsan mülade muthrumünean ju müdünjichoh.

³ Khora thsungkheak arhapbe khülang, donki thsungkheak amünrhükbe khülang, tüsho makharü düthsün thsungkheak tso khülang.

⁴ Makharünü akeokhikhi dalo, jude yungsho nü ju api ruk labah.

⁵ Makharü ki api makhakhi yande aloang, jude yungsho nihbuh mük ki api lümlung larü thsübah.

⁶ Shepünü makharü khah hode thiyusheak mühahchonü nihbuh jing lipkhia bahchoh tüsho athsümünim yungchoh.

⁷ Makharü mün ching müchitmudu khülang ju jingkikrü jingbo zhinkhia lakhi nangde lah.

⁸ Shepünü makharü ki wüntre jihchonü, khürünü lunghitliu ching lung münipkhi nangde lah.

⁹ Amüshangrü khah ching ayang zhakyukkhi nangde müchitmudu ju makharü mün ching lah.

¹⁰ Shepünü atsahhokhi makharü yungsho amüshangrü mihkhah mulochonü mihbüm aban yurijihkhi sanglüh-kiprü nangde lah.

¹¹ Khihnunü nihbuhnü amülümkhi lim rholokhi nangde makharünü nihbuh makhakhi rhimolochoh.

¹² Khürünü mülalaa nihbuh lümlung lah de alümkhi kheaknü shadakde makharü atsübe ah.

¹³ Yomuhyothsün mihtsürünü thachoh, “ Limro ching kekhüzü lah! Bukmüshakkhi kekhüzü wungdophulungbo ching lah!”

¹⁴ Khimdopünü awuklobebo kheak rütlode ayükhi nangde, yomuhyothsünrünü nihbuh yapkiu lim alode yüchoh.

¹⁵ Yomuhyothsün mihtsürünü nihbuh khah phurusük ching chungyuka zochoh; ju amün lim hanlode arüpü api sühdukchoh.

¹⁶ Mütsandakde alorü mihtsürü thüne kheaknü api lümlung labeah de yomuhyothsünrünü lümchoh.

¹⁷ Atsahhorü shepünü rukachihkhi ching alunglungnü arahrungde yüchonü khürünü khinu anuku kheaknü rama lukhi nangde lah.

¹⁸ Abünrü nangde shepünü mozhuhbo, yungsho ashebe yinchidungbo jipa bahchonü,

¹⁹ nihbuh yamhingrü mülapyukkhi mihtsürü ah, tüsho thachoh, “ Inü keangrükheah!”

²⁰ Sang mülasho mo mütabahchoh; jipjiprara mülasho rukachih kheamchoh.

²¹ Mokhihnü lamlamshihchoh tüsho sangnü mo aniushihchoh, junangde rukachih mihtsürünü kiumüzhim akhiukshihchoh.

²² Jipjiprara yubo ju tsühyungpü akebe nangde lah; jurü mihtsürü pang ching yüzahchoh.

²³ Mihbukmuyuk mulong hande künsahde alakhi münküpbo ju shotoyinchi changkhitkhinü alüpdokhi alophüh nangde lah.

²⁴ Rükthsürükheanrünü tsaktsakruru yubo dunglim anihbuhnü athraneankhi rama zochoh;

²⁵ küyimki apinü muzhode asukbanü, api kheak akin düla, tümüde api mulong ching athraneanbe thüne lah;

²⁶ apinü athraneankhi ju akeangyunü lüpdodo she api mihbukmuyukkhi amukhungrü alala miki akhiuka huhbah.

²⁷ Shepünü alokhün kiuchonü ju ching keamyukbah, tüsho shepünü lung phülahchonü junü api kheak lungkihlobah.

²⁸ Akeangyu mulo junü ayurirü thraneanchoh, tüsho münjipjipkhinü athsümünim rhimochoh.