MÜCHITMUDU 24 - AMÜSÜH HÜM CL Bible (BSI)

-19

¹ Amütsü mihtsürü mükdüthsü, yungsho arü lung lapü dükün;

² tümüde arü mulongnü athsümünim asahchoh, tüsho arü münbonü amütsü thachoh.

-20

³ Lümlung tüsho anikhitkhi khimtan kheaknü thüyambo thsüchoh;

⁴ mükheahmudu hode shotobo tüsho lakhit atsüdakbonü khiungshakbo michoh.

-21

⁵ Lümlung lakhi mihtsürü müranglah, tüsho mükheahmudu mihtsürü sühmüh rünkihchoh;

⁶ tümüde lümlungnü abekhi hode nünü thirithsüchoh, tüsho thsangdanrü hihkhi ching akuk ngükhi lah.

-22

⁷ Makharü thsungkheaknü lümlung ju khide changlah; chipiripit ching apinü amün mükhimshuh.

-23

⁸ Shepünü amütsü thsüpü lümchonü küpkhuk asahrü de ajibah.

⁹ Makha asahkhi ju neak, tüsho mihtsürübonü luhmünerü thraneanchoh.

-24

¹⁰ Küpkhuk kim ching nü heamde kamsho, nü sühmüh ninilah.

-25

¹¹ Sherü ashepü bede yüa lanü bekhitang, tüsho sherü alaksahpü lim jingmükhea lanü tholoang.

¹² “Tsükjide isanü ha mümükheah,” de nüsanü thasho, shepünü mulongbo adünchonü lümamükheahba de? Shepünü nü me aheangchonü ju mümükheah de? Mihtsürü aban nihbuh rhimo ayannü apinü mathrihloba de?

-26

¹³ I tsah-a, mukhuke tsühang, tümüde ha tsülah; mukhukerüp ching yo mukhuke ju nü mulo kheak niunglah.

¹⁴ Lümlung she nü me thsungkheak niunglah de mükheahang; nünü ju ngüsho nü thsungkheaknü arübe mulonglam lah, tüsho nü mulonglam ju müdükheak.

-27

¹⁵ O mihbukmuyuk mihtsürü, thiyuro-lungkirü lapung azhihde jimde dübin; api lakhi dangpung yankhia dülu;

¹⁶ tümüde thiyurolungki mihtsürü thüne ki lungpü kuklah, tüsho asürülobah, tüshe mihbukmuyuk a thsümütsünü akeambah.

-28

¹⁷ Nü riri lungchoki dasühachih, tüsho api jing mükhechoki nü mulong dasüh;

¹⁸ jude yungsho Atungpuhnü ju ngübah api masühde akambah, tüsho anihbuh kheaknü api mulong zhipzhip lude atsobah.

-29

¹⁹ Amütsü-rhimorü dünkheaknü mulong düsansan, yungsho mihbukmuyuk mükdüthsü;

²⁰ tümüde amütsü mihtsürü thsungkheak arübe mulonglam müla; mihbukmuyuk tsünpung amütbah.

-30

²¹ I tsah-a, Atungpuh tüsho kiulongthsüpuh wüntreang azhihrü lung datruachih,

²² tümüde arü thsümütsü nahde arübah, tüsho anenü hande arüpü athsümünim ju shepünü mükheahla?

Kheaküshe Lümlung Thakhibo

²³ Lümlung lakhi mihtsürünü harü she tha: Mahkhapkhi ching jakkheahkhi ju atsü yung.

²⁴ Shepünü mihbukmuyuk ki, “Nü a thiyuro-lungki ah” de thachonü, mihtsürübonü api athrubah; trükshihbonü api thraneanbah.

²⁵ Tüshe sherünü mihbukmuyuk thürühchonü asühkhi labah, tüsho müngühmühi atsü arü kheak arübah.

²⁶ Thiyuronü alojihkhi ju münküpbo kheak müthsüpkhi nangde lah.

²⁷ Aleangkheak nü rhimo banang, tüsho nü lubo tsanglungang; ju dunglim nü yam thsang.

²⁸ Amütsan mülade nü yamhingrü azhihde thiyumütsan düthsü yungsho nü münküpbonü dümülapyuk.

²⁹ Dütha, “ I ki rhimokhi nangde inü api ki rhimobah; apinü arhimokhi nangde inü mihtsürü kheak athrihlobah.”

³⁰ Inü yomuhyothsünrü lu hode yü, tüsho anikhitkhi mülakhi mihtsürü kurungasolu hode yü;

³¹ alala ching ayangbo mukhuh-a lakheah; alo ju thrümthrukbenü mi tüsho lung-mutrungkhi thsümünima lakheah.

³² Küyimki inü ju ngükhea, inü tsüde lümakheah; inü kheah tüsho thsangdankhi leangkhi:

³³ Anükhüh yapkhi, anükhüh atsungkheamkhi, sühakhimpü anükhüh kheak khahbo kapachihkhi–

³⁴ tüsho mükheakmürak ju jangkhijangrarü nangde, tüsho nünü alunekhi ju thirithsü-züt yihkhi mihtsürü nangde nü kheak arübah.