MÜCHITMUDU 23 - AMÜSÜH HÜM CL Bible (BSI)

-6

¹ Küyimki nü yakzanshuhrü lung yimtsühpü binbanü, nü miki tümü lanü tsüde lümakheahang;

² khide nü münkelasho, nü küdah thsüde danloang.

³ Api tsühyungpü akebe künde düla, tümüde jurübo mülapyukbe tsühyungpü lah.

-7

⁴ Alakhitpü hode dükhi; atuklopü lümlung laang.

⁵ Tümüde atsütsünü lakhitbonü arü ghi thsüchoh; arünü müleang nangde thüning lim phinde tsochoh.

-8

⁶ Mükhütmürarü yikhap dütsüh, yungsho anihbuh tsühyungpü akebebo dütsühne;

⁷ tümüde apinü amulong ching lümkhi nangde, api ju ah. “Tsühang tüsho yungang!” de apinü nü ki thachoh, tüshe api mulong nü kheak müla.

⁸ Nünü münkhüh tsühkhi ju amülümkhitbah, tüsho nü yu anangbo akeangkeang thsübah.

-9

⁹ Makharünü sode nünü dasuk, tümüde apinü nü lümlung yubo mükhemükimbah.

-10

¹⁰ Jipü arelung düshuhakhin yungsho mürerü lubo düjangachih,

¹¹ tümüde arü Tsungdorü amürang lah; apinü arü dünkheak nü azhihde atsangbah.

-11

¹² Thsangdankhi lim nü mulong, tüsho mükheahmudu yubo lim nü nükhünbo jihang.

-12

¹³ Azürü danpü chingnü dütuklo, tümüde nünü tsonü alakkhi api müshe.

¹⁴ Tsonü api thsümüchiang tüsho ashe chingnü api me khümkhitang.

-13

¹⁵ I tsah-a, nü lümlung lasho I mulong asühbah;

¹⁶ küyimki nü münküpbonü alungki asukbanü I menü asühachihbah.

-14

¹⁷ Nü mulongnü aneakrü mükdüthsü, tüshe kamruhroro Atungpuh trepü künsahde laang.

¹⁸ Tsükjide nü thsungkheaknü mulonglamkhi arübe lah, tüsho nü mulonglam müdükheak.

-15

¹⁹ I tsah-a, aniang tüsho lümlung laang; tüsho alungki limro ching nü mulong besoang.

²⁰ Yukhuri kihrü yungsho shih mürhükrü lung datruachih;

²¹ tümüde amüshangrü tüsho bukchihrü ju zhochihrü kambah, tüsho anede ayükhinü mihtsürü kheak khimmürhütbo phukihjihbah.

-16

²² Nü zübekhi nü buh ki aniang, tüsho nü be ashinberü kamchoki mükhemükim düthsü.

²³ Thiyuro thuloang, tüsho ju düyin; lümlung thsangdankhi tüsho anikhitkhi ngüang.

²⁴ Thiyuro-lungkirü abuh ju tode asühkhi lah; shepü lümlung lakhi tsührü lanü api lung asühchoh.

²⁵ Nü buh tüsho nü be asühshang; shebenü nü zübekheanü asühshang.

-17

²⁶ I tsah-a, nü mulong I kilim jihang tüsho nü mükbo I limrobo lim zoang,

²⁷ tümüde müzammüramrü ju alokhün asük, tüsho yüliyüra liberü ju kekhip amütsüm ah.

²⁸ Arünü jangkhijangrarü nangde nü jimde binchoh tüsho athrürü ahihdo thiyuro mülakhi kamshihchoh.

-18

²⁹ Shepü mulong tukthsü la? Shepü mulong rozhak la? Shepü rukachihkhi la? Shepü atsangkhibo la? Shepü mübo la? Shepü mükmürümkhi la?

³⁰ Yukhuri kihde ayungrü, yukhu rhukhi yimde arürü ah.

³¹ Yukhu tsangphüyakde alachoki, pung ching amapde tüsho mükhihde amüheanchoki dükheah;

³² akheam ching hanü müzüm phuruto nangde mukiuchoh.

³³ Nü mükbonü tümüanü asobo ngübah, tüsho nü lüm yingyingbah.

³⁴ Nü ju khürü keto phulung, khürü sangkung shungdung ku kheak yapkhi nangde alabah.

³⁵ Nünü athabah, “Arünü I shikdo tüshe I muyuri; arünü I lakdo tüshe inü ju mümütsan. Küyimki I asürüba? Inü ayungbe püpü yimbah.”