MÜCHITMUDU 2 - AMÜSÜH HÜM CL Bible (BSI)

Lümlung Thsambahbo

¹ I tsah-a nünü I yubo leangkhisho, tüsho I yukhümbo nü kheak lashihsho,

² junangde lümlung lim nü nükhün muphosho, tüsho anikhitkhi lim nü mulong lasho;

³ tüsho nünü mütsankhitpü thsungkheak zhisho, tüsho anikhitkhi thsungkheak nü düsheak akhiukshihsho,

⁴ nünü shotoyinchi nangde anihbe yimsho, tüsho rama lakhi rahpungbo nangde anihbe yimsho;

⁵ judüki Atungpuh trekhi anikhitbah, tüsho Thrünpuh mükheahmudu ngübah.

⁶ Tümüde Atungpuhnü lümlung jihchoh; api mün chingnü mükheahmudu tüsho anikhitkhi arüchoh;

⁷ apinü alungkirü thsungkheak lümlung atsü zomukhungchoh; api a lungkide atsahrü kilim tsung khülang ah;

⁸ apinü thiyuro tsahpungbo aheangchoh, tüsho api amüsührü limro küma lashihchoh.

⁹ Judüki nünü thiyuro-lungki tüsho thiyuro, alungki tüsho atsü limro alala anikhitbah.

¹⁰ Küyimki nü mulong ching lümlung yüzahbanü, tüsho mükheahmudu ju nü me ki atsü labanü,

¹¹ adüngakhinü nü küma lashihbah; anikhitkhinü nü aheangbah,

¹² amütsü limrobo chingnü nü bekhitpü, bephülapde asukrü mihtsürü kheaknü,

¹³ amiting limrobo ching tsahpü alungki limro bahkhirü kheaknü;

¹⁴ shepünü amütsü rhimopü ching asühachihcho, tüsho mihbukmuyukde bephülapkhi ching asühcho;

¹⁵ sherü limrobo khürangla, tüsho arü limrobo ching rük-thsükhi la;

¹⁶ yüliyüra liberü kheaknü nü bekhitpü, nü ki thiyu akeake thade münityukpü chingnü,

¹⁷ shepünü nihbe niubuhrü ki thiyuro müla tüsho amüsüh thiyuchihchimkhi mihabahcho.

¹⁸ Tümüde anihbe yam ashepü lim keamyukchoh, tüsho anihbe limrobo ashekhi lim lah;

¹⁹ sherü anihbe kilim yüchonü murholo yungsho arü rhangdung limro müngü–

²⁰ junangde nü a atsü limro ching tsahbah tüsho thiyurolungki limro ching labah.

²¹ Tümüde alungkirü ju lomi ching labah, tüsho thiyuro larü ju ching aninga labah;

²² tüshe mihbukmuyuk a alomi chingnü adükheakshihbah tüsho thiyuro mülarü ju chingnü arukkhitbah.