MÜCHITMUDU 19 - AMÜSÜH HÜM CL Bible (BSI)

¹ Mülapmüji tüsho makharü kheaknü a azhihayihde atsahrü zhochihrü mihtsürü atsübe ah.

² Mükheahmudu mülade künsahde alümkhi ju atsü yung, tüsho shepünü niokheamchonü limro dungmihchoh.

³ Mihtsürü khülang nihbuh makhakhinü api rhangdung thsümünimchoh, tüsho api mulongnü Atungpuh chikhichoh.

⁴ Lakhitnü müyamrü hihde kamchoh, tüshe zhochihrü a nihbuh müyamrü müladebahchoh.

⁵ Arükchih thiyumütsan jihrü müthsümüchidüa mutso, tüsho shepünü akeangyu asukchonü mutsokhi.

⁶ Ahihdonü adungtorü amuzho ngüpü mürangchoh, tüsho mihtsürü aban thsambahbo jihrü müyamrü ah.

⁷ Zhochihrü a nihbuh keoniorü alalanü thraneanchoh; anihbuh müyamrünü küdükhüh she api kheaknü limshude tsocho! Apinü arü mushude müshamsham she, arünü api bahyukchoh.

⁸ Shepünü lümlung ngüchonü nihbuh me muzhochoh; shepünü anikhitkhi zochonü lalim tsübah.

⁹ Arükchih thiyumütsan jihrü müthsümüchidüa mutso, tüsho shepünü akeangyu asukchonü adükheakbah.

¹⁰ Makharünü müthangmüsün ching lapü maye, azhorü khülangnü yakzanshuhrübo kurungkheak yakzan mushuhkhuk!

¹¹ Mihtsürü lümlungnü api arümkheam jihchoh; tüsho amülim thsükhi amümürang thsükhi ju api müretahkhi lah.

¹² Kiulongthsüpuh bukakhiukkhi ju kekhüzü arungkhi nangde lah, tüshe api muzho a rim kheak ayinke nangde lah.

¹³ Makhakhi tsührü ju abuh thsümünimbe lah, tüsho dapdaprurukhi yamkhünberü ju mutuklokhi tsüng lah.

¹⁴ Thüyambo tüsho lakhitbo buhrübo kilimnü yamrüplurüp lah, tüshe lümlung lakhi yamkhünberü ju Atungpuh kilimnü ah.

¹⁵ Yomuhyothsünkhinü yapnekudopü hande arüchoh, tüsho yiuhyiuhrara mihtsürü a khümde lachoh.

¹⁶ Shepünü thiyukhümbo zochonü nihbuh rhangdung kümchoh, tüshe shepü nihbuh limrobo mükümkangnü ashebah.

¹⁷ Shepünü zhochihrü ki muzhochonü Atungpuh ki nipjihchoh, tüsho anihbuhnü tümü jihkheanü apinü ajihlobah.

¹⁸ Nü tsührü danyukang, tümüde ju ching mulonglam lah; api thsümünimpü kheak nü mulong düzojih.

¹⁹ Mihtsürü khide bukmükekhi ju thsümüchi ngübah; tümüde nünü api dükhesho, nünü ju ruk lang athsülobah.

²⁰ Lümthiyan aniang tüsho thsangdankhi leangkhiang, junangde nü arübe nimungbo ching nü lümlung labah.

²¹ Mihtsürü mulong ching lümkhi hihde lah tüshe Atungpuh lümthiyannü rhimochoh.

²² Mihtsürü kheak tümü alunekhi lanü ju amuzho ah, tüsho akeangyu tharü kheaknü a zhochih mihtsürü atsübe.

²³ Atungpuh trekhinü rhangdung lim bechoh, tüsho shepü ha lanü reangkeamde alabah; api a thsümütsü müngü.

²⁴ Yomuhyothsünrünü nihbuh khah phuru ching chungyuka zochoh; apinü amün ching she hanlode marü.

²⁵ Luhmünerü shikang, tüsho lümthülihrünü lümlung anikhitbah; mütsankhit mihtsürü thürühang, tüsho apinü mükheahmudu alü thsübah.

²⁶ Shepünü abuh kheahmüchihcho tüsho abe yankhita bahchonü achih tüsho mungchih handarükhi tsührü ah.

²⁷ I tsah-a, küyimki nünü anikhitpü tuklobanü, nünü mükheah-a lakhi nahde duhmüabahbah.

²⁸ Athsümünim thiyumütsannü thiyuro kheak luhmünechoh, tüsho mihbukmuyuk münnü amütsü muyuabahchoh.

²⁹ Luhmünerü mahkhappü tüsho makharü düthsün rhappü thsakhama lah.