Biblia Todo Logo
Bìoball air-loidhne

- Sanasan -

MÜCHITMUDU 18 - AMÜSÜH HÜM CL Bible (BSI)

1 Mihtsürü shepünü nihbuh zangrü khükhitchonü apinü nihbuh künkhi yimchoh; apinü lümlung mahkhap alala azhihchoh.

2 Makharünü anikhitkhi ching asühkhi müla, tüshe nihbuh lümkhi huhkhi lang lah.

3 Küyimki mihbukmuyuk arübanü, abahyukkhi she arüchoh; tüsho wüntre müjihkhi lungnü mungchih arüchoh.

4 Mihtsürü mün yubo ke asükbo lah; lümlung kenü ju ayung bukkhi ah.

5 Mihbukmuyuk ki jakkheah huhkhi yungsho thiyuro-lungkirü mahkhap ching bahyukkhi ju atsü yung.

6 Makharü münküpbonü anihbuh kilim rukachihpü hande arüchoh, tüsho api münnü kinga lupü münitchoh.

7 Makharü mün ju nihbuh thsümünimbe lah, tüsho api yunü nihbuh me phuhchoh.

8 Jipjiprara yubo ju tsühyungpü akebe nangde lah; jurü mihtsürü pang ching yüzahchoh.

9 Shepü nihbuh rhimo ching yomuhyothsün lanü tode athsümünimrü lung keoniorü ah.

10 Atungpuh mung ju aheangsadam adüküng lah; thiyuro-lungkirünü ju lim shande yüchoh tüsho khümkhitchoh.

11 Alarü lakhit ju api kiuto amüküp lah, arünü ju chipi achang nangde lümchoh.

12 Athsümünimpü müngüh mihtsürü mulong kükheangkhi lah, tüshe wüntrepü müngüh azhihayih lah.

13 Shepünü musoyide alochonü, ha makhakhi tüsho nihbuh achihbe lah.

14 Tukthsüde alachoki mihtsürü ju menü alashihbah, tüshe me thsümünimsho shepünü arümkhukba?

15 Lümlung larü mulongnü mükheahmudu ngüchoh, tüsho lümlung larü nükhünnü mükheahmudu yimchoh.

16 Mihtsürü thsambahnü nihbuh limro khimshuhchoh, tüsho adungto mihtsürü miki api bede arüchoh.

17 Mahkhappung ching akhuh mihtsürünü athakhi ju anihbuh azhihrünü api ki keokhipü mütankihyi khiungde kamruhroro alim nangde lachoh.

18 Sühmüh lakhi mihtsürü mahne mahkhappung ching azhihachihsho, azan thsükhinü neamneamruru mülüpü kuklah.

19 Keoniorünü arungkhi ju amüküp kiuto nangde lah, tüshe rukachihkhi ju chipiripit khrihbebo nangde lah.

20 Nihbuh münnü aso asokhinü mihtsürü bukthsüchoh; anihbuh mün chingnü akhiukkhinü api reangkeamchoh.

21 Ashekhi tüsho rhangdung mulo wu ching lah, tüsho sherünü ju muzhochonü ju sangaso tsühbah.

22 Shepü niuberü ngüchonü atsü ngüchoh, tüsho Atungpuh kilimnü amuzho ngüchoh.

23 Zhochihrünü mihmüthsüm thsungkheak mushuchoh, tüshe alarünü alungdonü alochoh.

24 Khürü müyamrü thsükhea rünmukhiung, tüshe keoniorü kheaknü alü dakkihde alakhi müyamrü khülang lah.

Yimkhiung Naga CL Bible - AMÜSÜH HÜM

Copyright © 2008 by The Bible Society of India

Used by permission. All rights reserved worldwide.

Bible Society of India
Lean sinn:



Sanasan