MÜCHITMUDU 17 - AMÜSÜH HÜM CL Bible (BSI)

¹ Aniojikhinü thüyam mide rukachihde alakhi kheaknü a akhimahede yikhapkheam mukuh khülang lakhi atsübe ah.

² Lümlung lakhi yamlarünü achih ngüshihkhi tsührü kurungkheak yakzan shuhbah, tüsho keoniorü bolung yamrüplurüp chamachihbah.

³ Suna tüsho shotoyinchi ju monü thsahakheahchoh, tüshe Atungpuhnü mulong rükakheahchoh.

⁴ Amütsü mihtsürünü amütsü lümkhibo anichoh, tüsho akeangyu tharünü akeangyu anichoh.

⁵ Shepünü zhochihrü luhmünechonü api Thrünrü mükhemükimchoh; shepünü thsümütsürü kheah-a münejihchonü müthsümüchidüa mutso.

⁶ Tsührü tsührübo ju ashinbuhrü kuthran ah, tüsho tsührübo müretahkhi ju arü abuhbo ah.

⁷ Wüntre lakhi mihtsürünü akeangyu müthachoh, tüsho makharünü athülünkhi tümü thapü müla.

⁸ Mihtsürü khürünü buknim junü wurük nangde rhimochoh de lümchoh; junü lüpdükhi thsükhukbah de arünü kinchoh.

⁹ Shepünü alakmihkhibo neak bahjihchonü amuzho yimchoh, tüshe shepünü judürü rhimolobanü müyamrü khungbo azüshihchoh.

¹⁰ Makharü chi ki lakbah anikhitkhi kheaknü a rük lakhi mihtsürü khülang ki thürühkhinü anikhitchoh.

¹¹ Amütsü mihtsürünü azhihpü lang yimchoh; jumonü bukmüke yunithsürü api azhihde athiyibah.

¹² Makharü khülang anihbuh makhade makeangkhi ching shorupü kheaknü a anunubo jangkhide atsokhi kuto dreto shorukhi atsübe ah.

¹³ Shepünü atsü dün amütsü jihlochonü, api yam chingnü amütsü müchamachih.

¹⁴ Rukachih tankihkhi ju ke dükhekhi nangde lah; jumonü murukachihyide ju zhipdoabahang.

¹⁵ Shepünü mihbukmuyuk alim thsüjihcho, tüsho thiyuro-lungkirü bahyukchonü ane chido Atungpuh kilim athraneanbe lah.

¹⁶ Makharü khah ching sho lakhi tümü yihnüpü la, tümüde apinü lümlung ngüpü künde müla?

¹⁷ Müyamrü khülangnü kim alala ching muzhochoh, tüsho keoniorü ju azhihpü thsungkheak zübea lah.

¹⁸ Anikhitkhi mülarü mihtsürünü thiyuchihchimde khah zhimachihchoh, tüsho api müyamrü shozüng hahmülang luchoh.

¹⁹ Shepünü rukachihrü muzhochonü neak muzhochoh; shepünü chipiripit achang thsüchonü athsümünim münitchoh.

²⁰ Shepü mülapmüji mulong lanü atsü tümü müngüchoh, tüsho shepü mülapyuk mulo lanü amütsü ching keamyukchoh.

²¹ Shepü makhakhi tsührü lanü mulong rozhak hande arüchoh, tüsho makharü abuh a asühkhi müla.

²² Asühkhi mulong ju moli atsü ah, tüshe athsümünimkhi menü robo kungshihchoh.

²³ Thiyuro limro bephülappü mihbukmuyuknü ramde buknim luchoh.

²⁴ Lümlung ju anikhitkhi larü miki lah, tüshe makharü mükbo alomi akheambo kheak lah.

²⁵ Makhakhi tsührünü nihbuh abuh kilim mulong rozhak tüsho api zübebe kilim akhüh hande arüchoh.

²⁶ Thiyuro-lungkirü thsümüchipü yungsho arü lungkikhi thsungkheak yakzanshuhrübo shikkhi ju alim yung.

²⁷ Shepü mükheahmudu lanü api yubo tuklochoh, tüsho anikhitkhi mihtsürü a azhihayih me lah.

²⁸ Makharü she zhikde lasho lümlung larü khejihchoh; küyimki api münküpbo yihdobanü api anikhitrü de lümjihchoh.