MÜCHITMUDU 16 - AMÜSÜH HÜM CL Bible (BSI)

¹ Mulong thsakhamde alapü ju mihtsürü yo, tüshe thiyu alopü Thrünpuh kilimnü lah.

² Mihtsürü limro alala nihbuh mük ki atsangkhit lah, tüshe Atungpuhnü lümkhibo adünchoh.

³ Nü rhimobo Atungpuh kilim shuhmülanga jihang, tüsho nü lümkhibo akuk ngübah.

⁴ Atungpuhnü lüpdükhi api thsungkheak thsü, am, thsümütsü nimung thsungkheak mihbukmuyuk she ah.

⁵ Mihbüm aban mulong ching kükheangrü Atungpuh kilim athraneanbe lah; apinü küyimkishe arübo müthsümüchidüa mutsoshih.

⁶ Mihmüthsüm tüsho thiyuro ching amülimkhi dünkheak dünthsükhido; tüsho Atungpuh trekhi hode khürünü amütsü chingnü chamkhichoh.

⁷ Küyimki mihtsürü limrobonü Atungpuh asühshihbanü, apinü anihbuh riribo she api lung mungtsü lashichoh.

⁸ Thiyuro mülade ahihdo alü thsükhi kheaknü thiyuro-lungkinü anikhüh lakhi atsübe.

⁹ Mihtsürü mulongnü api limro lümkhi thsüchoh, tüshe Atungpuhnü api jingdükübo huhchoh.

¹⁰ Kiulongthsürü münküpbonü müchityu asukchoh, tüsho api münnü mahkhapkhi ching neak müyihbeak.

¹¹ Thiyuro adünara tüsho akeara Atungpuh yo; qiuqiu ching adünkhibo alala api rhimo lah.

¹² Kiulongthsürübonü mihbukmuyuk yihbeakkhi ju athraneanbe, tümüde kiulongthsü-binkiu ju thiyurolungkinü lashihchoh.

¹³ Thiyuro-lungkirü münküpbo ju kiulongthsürü asühpü lah, tüsho shepünü alungki asukchonü arünü api muzhochoh.

¹⁴ Kiulongthsüpuh bukakhiukkhi ju ashekhi yunithsürü ah, tüshe lümlung larü mihtsürünü ju keamloshihchoh.

¹⁵ Kiulongthsüpuh miro yinkhi ching rhangdung lah, tüsho api amuzho ju mükheankim ching tsüng bekhikhi amo nangde lah.

¹⁶ Suna kheaknü lümlung ngükhi küdükhüh she atsü! Tüsho shotoyinchi kheaknü anikhitkhi ngüpü mokhitbeah.

¹⁷ Alungkirü limto ju amütsü kheaknü achamkhipü lah; shepünü nihbuh limro aheangchonü api rhangdung aheangchoh.

¹⁸ Lülüshishi ju athsümünim müngüh, tüsho kükheangküyang akeamkhi müngüh yüchoh.

¹⁹ Kükheangküyangrü lung ayankhikhi chama lukhi kheaknü a zhochihrü lung azhihayihde alakhi atsübe.

²⁰ Shepünü lümlung lade thiyu anichonü atsü ngübah, tüsho shepünü Atungpuh kheak kinchonü, asühpü ju api ah.

²¹ Mulong ching lümlung lakhi ju mütsankhitkhi de jichoh, tüsho thiyu akebonü anikhitkhi rünkihshihchoh.

²² Shepü anikhitkhi lanü ju rhangdung kekhip ah. Tüshe makharünü thsülangkhi ju mudukmükekhi lah.

²³ Lümlung larü mulongnü nihbuh mün thsangyuchoh, tüsho anihbuh münküpbo kheak anikhitkhi yukajakchoh.

²⁴ Athünak yubo ju mukhuke nangde, me ching niunglah tüsho robo shihphü tsüshihchoh.

²⁵ Mihtsürü ki limro khülang alungki nangde lah, tüshe akheam ju ashekhi lah.

²⁶ Rhimorü khülang münkekhinü mürangde rhimoshihchoh, tümütüsho anihbuh khümkhinü api tuthsukchoh.

²⁷ Amütsü mihtsürünü amütsü asahchoh, tüsho api yu thakhi mo muliukhi nangde lah.

²⁸ Mülapmüji mihtsürünü rukachih akhiukshihchoh, tüsho juphityuphitnü müyamrü khungbo thraza thsüjihchoh.

²⁹ Athsümünim mihtsürünü nihbuh yamhingrü münityukchoh, tüsho atsü mülakhi limro ching api bechoh.

³⁰ Apinü mülapmüji asahpü amük athrapchoh; apinü amünküpbo mujuhchoh tüsho amütsü hande arüchoh.

³¹ Ku buyiukkhi ju müretah kuthran ah; ha thiyuro-lungkirü rhangdungnü ngüchoh.

³² Arümkheamkhi ju athrungkhi kheaknü atsübe, tüsho shepünü nihbuh sungsungkhi danyukchonü kiuto yankhia lurü kheaknü atsübe.

³³ Azan thsükhi ju pho kheak zochoh, tüshe ju khikzhakpü Thrünpuh kilimnü lah.