MÜCHITMUDU 15 - AMÜSÜH HÜM CL Bible (BSI)

¹ Thünakde alokhinü bukakhiukkhi keamshihchoh, tüshe thiyu amüküpnü bukakhiukpü thurumusuchoh.

² Lümlung larü mulonü lungkide mükheahmudu ahorichoh, tüshe makharü münnü makhakhi thakhitchoh.

³ Atungpuh mükbonü dangpung aban ching amütsü tüsho atsü kheak kheahde lah.

⁴ Athsüngu hande arükhi mulo ju rhangdung sangdung ah, tüshe mülapmüji mulonü me thsümünimchoh.

⁵ Makharünü nihbuh abuhnü thsangdankhi mükhemükimchoh, tüshe shepünü athsülangkhi luchonü lümlung larü ah.

⁶ Thiyuro-lungkirü yam ching rahpung ato lah, tüshe mihbukmuyuk rahpung-limro ching küpkhuk lah.

⁷ Lümlung larü münküpbonü mükheahmudu bushihchoh, tüshe makharü mulongnü jude müthsü.

⁸ Mihbukmuyuknü laksah-a kingaünkhi ju Atungpuh kilim athraneanbe lah, tüshe alungkirü tamkhüntamnü ju api asühpü lah.

⁹ Mihbukmuyuk limro ju Atungpuh kilim athraneanbe lah, tüshe shepünü thiyuro-lungki yanchonü apinü anihbuh muzhochoh.

¹⁰ Müküpde adanyukkhi ju limro bahyukrü thsungkheak lah, tüsho shepünü athsülangkhi thraneanchonü ashebah.

¹¹ Ashepü tüsho athsümünim Atungpuh miki lah; jumonü mihtsürü tsührübo mulong a küdükhüh she alapü!

¹² Kithsükilangrünü api thsülangrü mümuzhochoh, yungsho lümlung larü kilim müyü.

¹³ Asühkhi mulongnü miro yinshihchoh, tüshe mulong rozhakkhinü me thsümünimchoh.

¹⁴ Shepü mulong anikhitkhi lanü mükheahmudu yimchoh, tüshe makharü mün a makhakhinü reangkeamchoh.

¹⁵ Zhochihrü nimungbo alala chipde lah, tüshe asühkhi mihtsürü a kamruhroro rhangdung reangkeamde lah.

¹⁶ Küpkhuk lade rahpung ato lakhi kheaknü Atungpuh trede anikhüh lakhi atsübe.

¹⁷ Thraneanachihde ashih-kihkhi moshi nunu lakhi kheaknü amuzho lade wokephüyak tsühyungbe lakhi atsübe.

¹⁸ Asungsung mihtsürünü rukachih akhiukshihchoh, tüshe arümkheam mihtsürünü rukachih keamloshihchoh.

¹⁹ Yomuhyothsünrü limro ju ayangbonü rhamdolah, tüshe alungkirü limtsahpung a limto ah.

²⁰ Lümlung lakhi tsührünü abuh asühshihchoh, tüshe makhakhi mihtsürünü abe mükhemükimchoh.

²¹ Lümlung mülarünü arü makhakhi kheak asühchoh, tüshe anikhitkhi mihtsürünü lungkide tsahchoh.

²² Lümthiyan mülasho lümkhi akuk müngüchoh, tüshe lümthiyanrü hihkhi ching jurü akuk ngüchoh.

²³ Mihtsürü khülang ju nihbuh mün chingnü athakhinü asühpü lah, tüsho kim dükdü ching ayede athakhi yu küdükhüh she atsü la!

²⁴ Lümlung larü mihtsürünü ashepü limro lim yungde rhangdung limro lim bede awutukhi ching tsahchoh.

²⁵ Atungpuhnü akükheangrü yam thsümünimbah, tüshe apinü khimoberü aredung zojihbah.

²⁶ Amütsü lümkhibo ju Atungpuh kilim athraneanbe lah, tüshe atsangkhit yubo apinü asühlah.

²⁷ Yihnelune mihtsürünü nihbuh yamkhün ching küpkhuk hande arüchoh, tüshe shepünü buknimbo thraneanchonü kutsüpbah.

²⁸ Thiyuro-lungkirü mulongnü küde alobeanü lümakheahchoh, tüshe mihbukmuyuk münnü amütsü thakhitchoh.

²⁹ Atungpuh ju mihbukmuyuk kheaknü limshude lah, tüshe thiyuro-lungkirü tamkhüntamnükhi apinü sochoh.

³⁰ Miro yinkhinü mulong asühpü hande arüchoh, tüsho thiyusheak atsünü phü müsüshihchoh.

³¹ Nü thsülangchoki nünü anisho, nü lümlung lah.

³² Shepünü adanyukkhi amümürang thsüchonü nihbuh mükhemükimchoh, tüshe shepünü thsülangkhi anichonü anikhitkhi alü thsüchoh.

³³ Atungpuh trekhinü lümlung thsangyuchoh, tüsho azhihayih ju wüntre müngüh arüchoh.