MÜCHITMUDU 14 - AMÜSÜH HÜM CL Bible (BSI)

¹ Lümlung lakhi liberü abannü nihbe yam thsüchoh, tüshe makharünü anihbe khahnü ju thokheamchoh.

² Shepünü nihbuh alungki ching tsahchonü Atungpuh trechoh, tüshe shepü nihbuh limro mulungkinü api mükhemükimchoh.

³ Makharü mün ching ju lülüshishi tso lah, tüshe lümlung lakhi münküpbonü arü küma lashihchoh.

⁴ Thulu wochakpü moshipungbo mübesho nü jakam akeangkeang labah, tüshe arü besho hinü mide alabah.

⁵ Thiyuro lakhi thiyumütsannü akeangyu mütha, tüshe arükchih thiyumütsannü akeangyu thachoh.

⁶ Kithsükilangrünü lümlung yimchoh tüsho ju müngü, tüshe shepünü anikhitchonü mükheahmudu ju athülih ah.

⁷ Makharü mihtsürü kinü tsoang, tümüde nünü api münküpbo kheaknü mükheahmudu müngü.

⁸ Lümlung larü rükri ju nihbuh limro anikhitpü lah, tüshe makharü mudukmükekhi ju bemüchihkhi lah.

⁹ Makharünü neak ki keangrümünechoh, tüshe alungkirü lung tsüyihkhi ngüchoh.

¹⁰ Mulong abannü nihbuh akhüh mükheahlah, tüsho shenü she asühkhi müchamachihkhuk.

¹¹ Mihbukmuyuk yam akeambah, tüshe alungkirü khimyam azhipbah.

¹² Mihtsürü ki limro khülang alungki nangde lah, tüshe ha akheam ju ashekhi lah.

¹³ Keangrüa münekhi ching she mulong rozhakpü lah, tüsho asühachihkhi akheam ju mulong tukthsüpü lah.

¹⁴ Mihtsürü amütsü ju arü thülünkhi ngübah, tüsho mihtsürü atsü a arü rhimobo dün thsambah ngübah.

¹⁵ Yancho mihtsürünü lüpdükhi akin lachoh, tüshe lümlung larünü nihbuh jingdükübo tsüde lümchoh.

¹⁶ Lümlung larü mihtsürünü trechoh tüsho amütsü chingnü chamkhichoh, tüshe makharünü mükümkang tüsho khide niokheamde rhimochoh.

¹⁷ Shepü sungsunglanü makhade rhimochoh, tüsho mihbukmuyuk mihtsürü lümkhi thraneanchoh.

¹⁸ Yancho mihtsürünü makhakhi yamrüplurüpbo luchoh, tüshe rükri larü a mükheahmudunü kuthran thranjihchoh.

¹⁹ Amütsünü atsü miki mükhümbah, tüsho mihbukmuyuk ju thiyurolungkirü chipiripitbo ki labah.

²⁰ Zhochihrü mihtsürü ju nihbuh yamhingrünü she thraneanchoh, tüshe alarü a müyamrü ahihdo lah.

²¹ Shepünü nihbuh yamhingrü mükhemükimchonü neak yihbeakchoh; tüshe shepünü zhochihrü kheak amüthsüm lanü, api a asühpü.

²² Sherünü amütsü asahchonü lakmihchoh yung de? Tüshe sherünü atsü asahchonü amuzho tüsho mulonglam ngüchoh.

²³ Rhimokhi alala ching alü lah, tüshe yomuhyothsün asukachihkhinü mükheakmürak lim lang bechoh.

²⁴ Lümlung larü kuthran ju arü lakhitbo lah, tüshe makharü mudukmükekhi ju makhakhi sangbünlak ah.

²⁵ Thiyuro thiyumütsannü rhangdungbo khümkhitchoh, tüshe mülapmüji thiyumütsannü akeangyu asukchoh.

²⁶ Atungpuh trekhi ching mulongram adüküng lah, tüsho api tsührübo tsoyukpung dangpung labah.

²⁷ Atungpuh trekhi ju rhangdung kenü ah, junü ashe müthrim bahkhichoh.

²⁸ Mihtsürü hihkhi ching kiulongthsüpuh wüntrekhi lah, tüshe mihtsürü mülakhi ching yakzanshuhrü keampü lah.

²⁹ Shepü arünnü bukakhiukchonü anikhitkhi ato lah, tüshe asungsung mihtsürünü makhakhi huhchoh.

³⁰ Mungtsü lakhi mulong ju pang ching rhangdung tüshe mükthsükhi ju robo ching ashuhkhi lah.

³¹ Shepünü zhochihrü junochonü nihbuh Thrünrü bahyukchoh, tüshe shepünü api wüntrechonü müthsümülarü kheak mihmüthsüm lah.

³² Mihbukmuyuk ju nihbuh amütsü rhimo ching yana bah-a lah, tüshe thiyuro-lungkirü a api ashepü ching she tsoyukpung lah.

³³ Anikhitkhi mulong ching lümlung zhikde lachoh, tüshe makharü mulong ching tümü lanü mükheahshihchoh.

³⁴ Thiyuro-lungkinü trükshih shuhkihchoh, tüshe neak ju mihtsürü kilim mungchih lah.

³⁵ Kiulongthsüpuh muzho ju lümlung lakhi yamlarü kilim lah, tüshe api bukakhiukkhi ju achih ngüshihrü azhihde lah.