MÜCHITMUDU 12 - AMÜSÜH HÜM CL Bible (BSI)

¹ Shepünü thsangdankhi muzhochonü mükheahmudu muzhochoh, tüshe shepünü athsülangkhi thraneanchonü makharü ah.

² Mihtsürü atsü a Atungpuh kilimnü amuzho ngüchoh, tüshe amütsü asahrübo apinü bahyukchoh.

³ Mihtsürü khülang ju mihbukmuyukkhinü mülakihchoh, tüshe thiyuro-lungkirü ying murukkhitkhuk.

⁴ Yamkhünberü atsü ju ayamkhünbuh kuthran ah, tüshe mungchih lakhi yamkhünberü a api robo ching ashuhkhi ruk ah.

⁵ Thiyuro-lungkirü lümkhibo alim lah, tüshe mihbukmuyuk lümthiyanbo mülapyukbe lah.

⁶ Mihbukmuyuk yubo ju thiyih bukpü jimkhi ah, tüshe alungkirü yunü arü bekhitchoh.

⁷ Mihbukmuyuk a lahyuka bahdo tüsho kheaküa müla, tüshe thiyurolungkirü yam azhipbah.

⁸ Mihtsürü ju api lümlung ayannü shijihchoh, tüshe lüm amütsü mihtsürü a khenoabahchoh.

⁹ Atorü mihtsürü nangde huhbah khümde alapü kheaknüa rhangdung lapü thsüde arhimokhi aninirü mihtsürü thsükhi atsübe ah.

¹⁰ Thiyuro-lungki mihtsürünü anihbuh shiwüh yihnüpü lakhi kümchoh, tüshe mihbukmuyuknü amuzhodakkhi ju yihkhro ah.

¹¹ Shepünü nihbuh lo wochakchonü tsühyungbe suhdahde alabah, tüshe shepünü hoshiho-rabanü anikhitkhi müla.

¹² Mihbukmuyuknü amütsü mihtsürü tholopü mürühchoh, tüshe thiyuro-lungkirü ying a aso asochoh.

¹³ Mihbukmuyuk a nihbuh yunü alakmihkhibonü phuhchoh, tüshe thiyuro-lungkirü a küpkhuk chingnü atsokhitbah.

¹⁴ Mihtsürü khülang ju nihbuh mün sangaso atsünü reangkeambah, tüsho api khah rhimonü anihbuh thsambah ngübah.

¹⁵ Makharü limro ju anihbuh mükbo ki alungki lah, tüshe lümlung larünü lümthiyan anichoh.

¹⁶ Makharü bukmükekhi khülang kinü mükheahchoh, tüshe lümlung larü mihtsürünü mükhemürangkhi amüsomürang thsüchoh.

¹⁷ Shepünü thiyuro asukchonü thiyuro-lungki khipkhitchoh, tüshe arükchihnü akeangyu thiyumütsan thsüchoh.

¹⁸ Khürünü nukshang chinkhitkhibo nangde asukchoh, tüshe lümlung larü mulonü shihphü tsüshihchoh.

¹⁹ Thiyuro münküp ju lünnü rünkhiungbah, tüshe keangtha mulo anükhühkheak thsungkheak ah.

²⁰ Amütsü asahrü mulong ching mülapmüji lah, tüshe mungtsü lümthiyanrübo asühachihkhi lah.

²¹ Thiyuro-lungkirü tümünü she mütrünthsü, tüshe mihbukmuyuk a amütsünü amibah.

²² Keangtha münküpbo Atungpuh kilim athraneanbe lah, tüshe sherü thiyuronü akhualochonü api asühpü lah.

²³ Lümlung larü mihtsürünü mükheahmudu rama zochoh, tüshe makharübo mulongnü makhakhi zhirichoh.

²⁴ Müküpde arhimokhinü nü kilim wu jihbah, tüshe yomuhyothsünkhinü nü yamlarü kamshihbah.

²⁵ Mulong sansankhinü lümthsünü kamshihchoh, tüshe thiyu atsünü ju asühshihchoh.

²⁶ Thiyuro-lungkirü ju nihbuh müyamrü limro huhrü ah, tüshe mihbukmuyuk a arü limronü bephülapde tsochoh.

²⁷ Nü yomuhyothsünsho nünü amüshamkhi küyimkishe müngü, tüshe nünü mürangde rhimosho nü kuhi-atsü ngübah.

²⁸ Thiyuro-lungki limro ching rhangdung lah, tüsho ha limtsahpung ching ashekhi müla.