MÜCHITMUDU 11 - AMÜSÜH HÜM CL Bible (BSI)

¹ Mulungkide akearakhi ju Atungpuh kilim athraneanbe lah, tüshe thiyuronü adünkhi ju api asühpü lah.

² Küyimki kükheangküyangrü arübanü, mungchih arüchoh; tüshe azhihayih lung lümlung lah.

³ Alungkirü a thiyuronü arü bechoh, tüshe thiyuro mülarü arü rük mütsükhinü thsümünimchoh.

⁴ Bukakhiuk nimung ching lakhit tümü alü müla, tüshe thiyurolungkinü ashe chingnü bekhitchoh.

⁵ Mungchih mülakhi thiyurolungkinü api limro lungkide abebah, tüshe mihbukmuyuk a nihbuh mihbukmuyuknü akeambah.

⁶ Alungkirü a thiyuro-lungkinü arü bekhitbah, tüshe thiyuro mülakhi a arü nihbuh künkhinü aphuhbah.

⁷ Küyimki mihbukmuyuk mihtsürü shebanü, api mükkin thsükhi dükheakchoh, tüsho thiyuro mülakhi mulonglam dükheakchoh.

⁸ Thiyuro-lungkirü a küpkhuk chingnü bekhitdo tüsho ju müthri mihbukmuyuk kilim arüchoh.

⁹ Yiuhkhaprünü api münnü ayamhingrü thsümünimchoh, tüshe mükheahmudu hode thiyuro-lungkirü bekhitchoh.

¹⁰ Küyimki thiyuro-lungkirü tsüde alabanü, kiuto asühachihchoh; tüsho küyimki mihbukmuyuk dükheakbanü, asühachihde azhikhi lah.

¹¹ Alungkirü müngühmühikhinü kiuto shuhkihchoh, tüshe mihbukmuyuk münnü ju lah-a keamshihchoh.

¹² Shepü lümlung mülanü api yamhingrü mükhemükimchoh, tüshe anikhitkhi mihtsürünü malande lachoh.

¹³ Münjipjiprünü aramyu thakhitchoh, tüshe akin lakhi mihtsürünü aramyu zochoh.

¹⁴ Küching lümthiyan mülanü trükshih keamchoh; tüshe lümthiyanrü hihkhi ching atsokhitkhi lah.

¹⁵ Shepünü jaksorü shozüng shakjihpü alokhichonü ju thsungkheak küpkhukchoh, tüshe shepünü alokhipü thraneanchonü tsokhita labah.

¹⁶ Amuzho lakhi liberü a wüntre lah, tüshe mihmukhiuh mihtsürü a lakhitbo lah.

¹⁷ Amüthsüm lakhi mihtsürünü nihbuh me atsü thsungkheak rhimochoh, tüshe shepü bukmükenü nihbuh kheak küpkhuk hande arüchoh.

¹⁸ Mihbukmuyuk mihtsürünü mülapmüji rhimo thsüchoh, tüshe shepünü thiyuro-lungki hiuchonü atsütsü thsambah ngüchoh.

¹⁹ Thiyuro-lungkinü rhangdung lim bechoh, junangde shepünü amütsü müshamchonü ashebah.

²⁰ Sherü mulong amütsü lanü Atungpuh kilim athraneanbe lah, tüshe mungchih mülarü limrobo ching api asühpü lah.

²¹ Mihbukmuyuk a müthsümüchidüa müyü de mütsanang, tüshe thiyuro-lungkirü a atsokhitbah.

²² Sulüm mülakhi liberü jaktsü ju kheaknu nupung ching suna nüpü nükhi ruk ah.

²³ Thiyuro-lungkirünü alunekhi ju atsü lang ah, tüshe mihbukmuyuk mükkin thsükhi ju mulong zhipzhip ah.

²⁴ Mihtsürü khürünü arü sho phinphurukde bahchoh tüshe alarü lang kamchoh. Püpürünü mükihmürachoh, tüshe zhochihde kamchoh.

²⁵ Salarü mihtsürü lalim tsüde akambah; shepünü püpürü rungbanü nihbuh runglobah.

²⁶ Shepünü hi mükihde azobanü mihtsürübonü athruajichoh, tüshe shepünü ayinjihbanü arünü api shijihchoh.

²⁷ Shepünü düshihde yimchonü amuzho ngüchoh, tüshe amütsü yimrü kheak küpkhuk arübah.

²⁸ Shepünü nihbuh lakhitbo kheak kinchonü akeambah, tüshe thiyuro-lungkirü a aphüyak sangyü nangde tsüde akambah.

²⁹ Shepünü nihbuh yamkhün küpkhukshihchonü apung yimlubah, tüsho makharü a lümlung larü yamlarü thsübah.

³⁰ Thiyuro-lungkirü sangaso ju rhangdung sangdung, tüsho shepü lümlung lanü mebo bedarüchoh.

³¹ Alomi ching thiyuro-lungkirü thsambah ngüchoh, junangde mihbukmuyuk tüsho aneakrü thsümüchibah de mütsanang!