MÜCHITMUDU 10 - AMÜSÜH HÜM CL Bible (BSI)

Solomon Müchitmudubo

¹ Solomon müchitmudubo: Lümlung lakhi tsührünü buhrü asühshihchoh, tüshe makhakhi tsührünü abe mulong tukthsüshihchoh.

² Mihbukmuyuk rahpungbo tümü alü müla, tüshe thiyuro-lungkinü ashe chingnü bekhitchoh.

³ Atungpuhnü thiyuro-lungkirü khümde mutsoshihchoh, tüshe apinü mihbukmuyuknü akünkhi bahjihchoh.

⁴ Yomuhkhi khahbonü mihtsürü zhochihchoh, tüshe jinjihkhi khahbonü lakhit hande arüchoh.

⁵ Shepünü muzhu ching hanmukhungchonü lümlung lakhi tsührü ah, tüshe shepünü yimluchoki yapbanü mungchih ngüpü tsührü ah.

⁶ Thiyuro-lungkirü ku kheak müngühmühibo lah, tüshe athsümünimnü mihbukmuyuk mün hümdolah.

⁷ Thiyuro-lungkirü lümkhitpü ju müngühmühi ah, tüshe mihbukmuyukrü mung nahde mihabahbah.

⁸ Mulong rhangrünü thiyukhümbo leangkhichoh, tüshe makhayu thakhi athsümünim arüchoh.

⁹ Thiyuro mihtsürü a kuram tsüde tsahchoh, tüshe shepü akhürang limrobo ching lanü aramkhitbah.

¹⁰ Shepünü müknü ajuhchonü küpkhuk akhiukshihchoh, tüshe shepünü mikinü thürühchonü mungtsü thsungkheak rhimochoh.

¹¹ Thiyuro-lungkirü mün ju rhangdung kekhip ah, tüshe athsümünimnü mihbukmuyuk mün hümdolah.

¹² Athraneankhinü küpkhuk thurumusuchoh, tüshe amuzhonü neakbo alala lüpdochoh.

¹³ Shepü anikhitkhi lanü amünküpbo kheak lümlung ngüchoh, tüshe tso khülang ju anikhitkhi mülarü düthsün thsungkheak lah.

¹⁴ Lümlung larü mihtsürünü mükheahmudu zomukhungchoh, tüshe makharü mün ju athsümünim thüninde lah.

¹⁵ Alarü mihtsürü lakhit ju api chipi ayünkhi kiuto ah, tüshe zhochihrü thsümünimkhi ju arü zholümkhi ah.

¹⁶ Thiyuro-lungkirü khisahkhi ju rhangdung lim bechoh, tüshe mihbukmuyuk mihkhahbonü thsümüchibo hande arüchoh.

¹⁷ Shepünü thsangdankhi zochonü rhangdung limro ching lah, tüshe shepünü athürühkhi reanglochonü tsophülapchoh.

¹⁸ Shepünü athraneankhi ramchonü akeangyu münküpbo lah, tüsho shepünü dünthamungtha bushihchonü makharü ah.

¹⁹ Nünü küdükhüh thabanü, judükhüh neak yihbeakchoh. Nü lümlung lasho, nünü zhikde alabah.

²⁰ Mihtsürü atsü yubo ju atsangkhitkhi shotoyinchi ruk ah; mihbukmuyuk mihtsürü lümkhi ju yihnüpü müla.

²¹ Thiyuro-lungkirü yubonü ahihdo kilim alü thsüshihchoh, tüshe makharü a lümlung mülakhinü shechoh.

²² Atungpuh müngühmühinü lakhit hande arüchoh, tüsho apinü ju ching küpkhuk muyukajakchoh.

²³ Makharü ki a amütsü rhimokhi ju hoshihorakhi nangde lah, tüshe anikhitkhi mihtsürü a lümlung lah.

²⁴ Mihbukmuyuknü tümü trechonü api kheak arübah; thiyuro-lungkirünü tümü lunechonü amülüjihbah.

²⁵ Küyimki chitmühean hobanü, mihbukmuyuk mülatsan, tüshe thiyuro-lungkirü a lünnü düküngde zhipchoh.

²⁶ Hü ching asanke tüsho mükbo ching mokhüh nangde, anihbuh thiyibuh ki yomuhyothsünrü ju ruk ah.

²⁷ Atungpuh trekhinü kutsüpchoh, tüshe mihbukmuyuk kambo dukkheamchoh.

²⁸ Thiyuro-lungkirü mulonglam ju asühkhi labah, tüshe mihbukmuyuk mükkin thsükhi adükheakbah.

²⁹ Atungpuh limro ju alungkirü thsungkheak sühmüh, tüshe amülim rhimorü kilim athsümünim arübah.

³⁰ Thiyuro-lungkirü küyimkishe matrüt tüshe mihbukmuyuk a alomi ching müla.

³¹ Thiyuro-lungkirü münnü lümlung hande arüchoh, tüshe mülapmüji mulo tsütkhita bahchoh.

³² Thiyuro-lungkirü münküpbonü tümü aleangkhikhukbe lanü mükheahlah, tüshe mihbukmuyuk mün ju mülapmüji lang ah.