MATHI 7 - AMÜSÜH HÜM CL Bible (BSI)

Mührü Yukhapkhi

¹ “Mührü yudükhap, junangde nüsa yumükhap.

² Tümütüsho nüsanü mührü yukhapkhi yande nüsa yukhapbah, tüsho nüsanü akeara ahorikhi yande nüsa akearabah.

³ Tüsho tümü thsükhi nü mük ching lakhi aneak mükheahde nü keoniorü mük ching lakhi aneak kheahcho?

⁴ Yungsho nü mük ching aneak zobah inü nü mük ching lakhi aneak bahjihanü de nü keoniorü ki nünü küde athakhukba?

⁵ Yiuhkhaprübo! Akhuhde nü mük ching lakhi aneak yihkhita bahang, tüsho jushu nü keoniorü mük ching lakhi aneak mütsande angübah.

⁶ “Tümü amüsühanü khihnubo kilim düjih; yungsho nü yo sünsobo kheaknu miki düzojih, jude thsüsho arünü jurü arü jing khüp jungbah tüsho rholobah nü adütre kamde ayihthünakbah.

Kheangang, Yimang tüsho Damang

⁷ “Kheangang, tüsho ju nüsa kilim jihbah; yimang, tüsho nüsanü angübah; damang, tüsho nüsa kilim khimshuhjihbah.

⁸ Tümüde akheangrü abannü leangkhichoh, ayimrünü ngüchoh, tüsho adamrü kilim khimshuhjihchoh.

⁹ Yungsho tsührünü yikhap kheangsho api kilim lung khülang jihpü nüsa bolung shepü mihtsürü la?

¹⁰ Yungsho apinü thüngüh kheangsho api kilim phuruto jihba shi?

¹¹ Jumonü nüsa mütsüde zobah nüsa tsührübo kilim thsambahbo atsü jihpü mükheahlasho, yinmi ching nüsa Abuhnü api ki kheangrü kilim küdükhüh she atsübo müjihpü!

¹² Jumonü tümüpürü mihtsürübonü nü ki rhimoshihnelanü, arü ki she rhimoang, tümüde ha yakzan tüsho wukihrübonü thsangyukhibo lah.

Chipimurung Amütsümbe

¹³ “Chipimurung amütsümbe chingnü yüzahang; tümüde chipimurung aküngküng tüsho amülih ju adükheakbe lim bekhi lah tüsho ju chingnü ayüzahrü hihlah.

¹⁴ Tümütüsho rhangdung lim bekhi ju chipimurung amütsüm tüsho limro chaklah, tüsho ju ngürü nüklah.

Sangdung tüsho Ju Sangaso

¹⁵ “Arükchih wukihrübo dünkheak kümkangang; arünü namfimihnu küp yihbah nüsa kilim arüchoh tüshe alung ching a arübo ju amütsü rimrebo ah.

¹⁶ Arü sangaso hode nüsanü arü mükheahbah. Mihtsürübonü ayangrungbo kheaknü kurungasobo yungsho dütrüngyang kheaknü khubaso rhocho de?

¹⁷ Junangde, sangdung atsü aban chingnü aso atsü asochoh, tüshe amütsü sangdungnü sangaso amütsü asochoh.

¹⁸ Sangdung atsünü sangaso amütsü asopü mukuk, yungsho sangdung amütsünü sangaso atsü asopü mukuk.

¹⁹ Sangaso amütsü asokhi sangdung aban kiushakbah mo ching jipyukchoh.

²⁰ Jumonü arü sangasobo hode nüsanü arü mükheahbah.

Inü Nüsa Küyimkishe Mümükheah

²¹ “Yinmi ching labuh I Buh lümkhi rhimorü kheak hode I ki, ‘Atungpuh, Atungpuh,’ de ajirü abannü yinmi kiulongthsü ching müyüzah.

²² Ju nimung ahihkhühnü I ki thabah, ‘Atungpuh, Atungpuh, isanü nü mung chingnü mümüchit de, nü mung chingnü amünean mebo müyankhit de, tüsho nü mung chingnü khinthiyinbebo ahihdo mürhimo de?’

²³ Judüki inü arü ki khipkhitbah, ‘Inü nüsa küyimkishe mükheah-a müla; I kinü tsoang, nüsa amütsü rhimorübo!’

Thüyam Thsürü Mahne

²⁴ “Jumonü sherünü I yu harü sobah anide rhimochonü lung kheak api yam thsükhi nangde lah.

²⁵ Tsüng arü, ayungbo düchi arü, apungbo yün, tüsho ju yam kheak nim; tütüshe ju mükeam, tümütüsho ju khimtan lung kheak lakheah.

²⁶ Tüshe sherünü I yu harü sobah anide mürhimonü loyi kheak api yam thsükhi makha mihtsürü nangde lah.

²⁷ Tsüng arü, ayungbo düchi arü, apungbo yün tüsho ju yam kheak nim tüsho ju keamabah; ju lungkhi atrebe lakheah.”

Jisu Thiyukhüm-sühmüh

²⁸ Küyimki Jisunü harü yubo thakhamkhea, apinü thsangyukhi ching yimto atonü müyinsah,

²⁹ tümütüsho apinü arü yakzan thsangyurübo ruk yungde thiyukhüm-sühmüh larü khülang nangde arü ki thsangyu.