MATHI 4 - AMÜSÜH HÜM CL Bible (BSI)

Jisu Rükakikhi

¹ Judüki arimrinü rükakishihpü Menü Jisu ju sunglo ching bede yü.

² Nimung yirü tüsho tsüngre yirü mütsühyung dunglim api khümabah.

³ Küyimki rükakirü arükheanü api ki tha, “Nü Thrünpuh tsührü a sho, harü lungbo yikhap kampü thiyukhüm jihang.”

⁴ Tüshe apinü alo, “Amüsühyunü thachoh, ‘Yikhap müthsünnü mihtsürü mülachoh, tüshe Thrünpuh mün chingnü akhiukkhi yu abannü lah.’”

⁵ Judüki arimrinü api ju amüsüh kiuto ching bede yü tüsho arüngyam mün kheak binshih,

⁶ tüsho api ki tha, “Nü Thrünpuh tsührü a sho, nü küdah thsüde ayoang, tümüde amüsühyunü thachoh: ‘Thrünpuhnü api yunirü nü thsungkheak jihbah, tüsho nü jinglungnü alo müqiushihde arü khah ching nü shuhkihbah.’ ”

⁷ Jisunü api ki tha, “Amüsühyunü ha she thachoh, ‘Nünü Atungpuh nü Thrünpuh rükdaki.’ ”

⁸ Kheaküshe arimrinü awung khide achang kheak api bede yü, tüsho alomi kiulongthsübo alala tüsho arü müretahkhi huh.

⁹ Tüsho apinü anihbuh ki tha, “Nünü mükhümbah I kingaünsho harü alala inü nü kilim jihbah.”

¹⁰ Jisunü api ki tha, “Tsoabahang, arimri! Tümüde amüsühyunü thachoh, ‘Nünü Atungpuh nü Thrünpuh kingaünbah, tüsho api lang tankihbah.’ ”

¹¹ Judüki arimrinü api bahbah tso, tüsho yunirübo arübah api rung.

Jisunü Galilee ching Api Rhimo Tankihkhi

¹² Küyimki Jisunü Johan ju rihyam ching zokhi sokhea apinü Galilee lim alode yü.

¹³ Apinü Nazareth bahjihbah yü tüsho Zebulun le Naphtali ching lakhi keto ki Kapernaum ching la,

¹⁴ junangde Isaia wukihrünü athakhi dünjipü lakheah:

¹⁵ “Zebulun lomi tüsho Naphtali lomi, Jordan yeande keto limro, khiungkerü yo Galilee–

¹⁶ amiting ching larü mihtsürübonü ayin ato khülang ngü; ashe alamme lomi ching larü kheak ayin akhiuk.”

¹⁷ Ju kim chingnü Jisunü thsangyuthsangrapü tankih, “Mulong müthriang, tümüde yinmi kiulongthsü thüninde lah.”

Jisunü Thüngüh-ramrü Phüyi Jikhi

¹⁸ Jisu ju Galilee keto yean tsahde alachoki, apinü keoniorü mahne, Peter de ajikhi Simon tüsho aniurü Andria büne keto ching keang jipde ngü, tümüde ane thüngüh-ramrü lakheah.

¹⁹ Jisunü tha, “I dunglim yanang, tüsho inü nüke mihtsürüramrü kamshihbah.”

²⁰ Anenü niokheamde keangbo bah tüsho api dunglim yan.

²¹ Tüsho ju chingnü yübah, apinü keoniorü püpü mahne, Zebedee tsührübo Jakob tüsho aniurü Johan ane abuh lung sangkung ching keangbo thsülode ngü. Apinü ane ji,

²² tüsho anenü niokheamde sangkung le ane abuh zojihbah api dunglim yan.

Jisunü Tukthsürü Thsüngukhi

²³ Jisunü Galilee alala ching yübah, arü yo sinagogbo ching thsangyu, kiulongthsü thiyusheak atsü thsangyuthsangra, tüsho mihtsürü bolung tukthsü tüsho phüthsüphüram mungji aban thsüngujih.

²⁴ Api dünkheak thiyusheak Siria alala ching soride yü, tüsho mihtsürübonü tukthsürü aphuaphu, thsünüthsüheanrü, amünean me yüzahkhi, zukleang-tukthsü tüsho thripshe-tukthsü larü api kilim bebah arü, tüsho apinü arübo thsüngujih.

²⁵ Galilee, Dekapoli, Jirusalem, Judea tüsho Jordan hobah püpü lomi chingnü yimto ato api dunglim yan.