MATHI 3 - AMÜSÜH HÜM CL Bible (BSI)

Johan Baptijihbuhnü Thsangyuthsangrakhi

¹ Judüki Johan Baptijihbuhnü Judea sunglo ching thsangyuthsangrade arü,

² tüsho tha, “Mulong müthriang, tümüde yinmi kiulongthsü thüninde lah!”

³ Tümüde Isaia wukihrünü athakhi ju api ah: “Sunglo ching khülangnü azhikhi düsheak: ‘Atungpuh thsungkheak limro thsakhamang, api limtsahpung mukhiungarihdo thsüjang.’ ”

⁴ Johannü kemel nam phuyu, shihküpnü achim rüm; tüsho api tsühyungbe ju tangkhobo le mukhuke lakheah.

⁵ Judüki Jirusalem, Judea alala, tüsho Jordan mühi lakhi alala chingnü api kilim arü

⁶ tüsho arü neakbo alokhide apinü Jordan ching arübo baptijih.

⁷ Tüshe küyimki apinü Pharisirü tüsho Sadukirü ahihdo baptipü arükhi ngükhea, apinü arü ki tha, “Phuruto tsührübo! Shepünü nüsa bukakhiuk arüpü lakhi chingnü thaa tsoshihkhea?

⁸ Jumonü mulong müthrikhi thülünde aso asoang,

⁹ tüsho nüsa küdah thsüde, ‘Abraham ju isa abuh ah,’ de athapü dülüm. Tümüde Thrünpuhnü harü lungbo kheaknü Abraham kilim tsührübo akhiukshihkhuklah de inü nüsa ki thachoh.

¹⁰ Awü ju sangdungbo ying kheak dünkihbah lah, tüsho aso masokhi sangdung aban kiushakbah tüsho mo ching jipyukbah.

¹¹ Inü nüsa mulong müthrirü kenü baptijihchoh, tüshe shepü I dunglim arüchonü I kheaknü atobe, ajingkhümpübo inü ahanpü müthülün. Apinü Amüsüh Me tüsho monü nüsa baptijihbah.

¹² Api khah ching phürü shuhlah, tüsho apinü rhimopung tsüde amüsühbah tüsho api jakam ching hi hanmukhungbah; tüshe apinü atsütbo a amümütbe mo ching takbah.”

Jisu Baptikhi

¹³ Judüki Jisunü anihbuhnü baptishihpü Johan kilim Galilee chingnü Jordan ching arü.

¹⁴ Johannü api ki nimlode tha, “Nünü I baptipü yihnüpü lah, tüsho nü I kilim arücho de?”

¹⁵ Tüshe Jisunü api ki alo, “Kheakü judü lang thsang; tümüde thiyuro-lungki alala dünjipü thsüde isa thsungkheaknü ha rhimopü alim lah.” Jumonü Johannü he de ani.

¹⁶ Küyimki Jisu baptikhea, apinü ke chingnü nahde akhiuk; tüsho kheahang, api kilim yinmibo khimshuh, tüsho Thrünpuh Me müthrithrümpü nangde api kheak aki keamde apinü ngü.

¹⁷ Tüsho zukleangnü yinmi chingnü düsheak khülangnü tha, “Ha inü tsüde mulong keamkhi, amuzhokhi I tsührü ah.”