MATHI 27 - AMÜSÜH HÜM CL Bible (BSI)

Pilat Miki Jisu

¹ Yapsu mükikde, amükeam putungrü tüsho azothsürü alalanü Jisu sheshihpü lümkhi khikzhak.

² Arünü api rhük tüsho Rom kovünor Pilat kilim bede yünü jih.

Juda Iskariot Shekhi

³ Judüki api yinatsühbuh Judanü Jisu bahyukkhi ngübah aküdahnü lümalo tüsho shotoyinchi 30 ju amükeamrü putungrü le azothsürübo kilim hanlode yü.

⁴ Apinü tha, “Amülim mülarü yinatsühde thiyih bukshihkhi hode inü neak yihbeakdo.” Arünü alo, “Isanü ju tümü thsüjihpü? Ju nü küdah thsang!”

⁵ Judüki apinü shotoyinchibo ju arüngyam ching jipa bahbah tso, tüsho yübah aküdah thsüde süksah.

⁶ Tüshe amükeam putungrübonü shotoyinchibo ju lu tüsho tha, “Harü ju rahpung-yam ching yukpü yakzan müla, tümütüsho jurübo thiyih dün ah.”

⁷ Tüsho arünü asukachihbah hanrübo kiuyuka bahpü phühdamrü lu thulo.

⁸ Jumonü khihni khiungde ju lu ki Thiyih Lu de jide lah.

⁹ Junangde Jeremia wukihrünü athakhi dünji: “Israel mihtsürübonü api dün akhukhi shotoyinchi 30 ju arünü lu,

¹⁰ tüsho Atungpuhnü I ki thiyukhüm jihkhi nangde arünü phühdamrü lu thulo.”

Pilatnü Jisu ki Keokhikhi

¹¹ Kheakü Jisu ju kovünor miki zhip. Tüsho kovünornü api ki keokhi, “Nü Jihudarü kiulongthsüpuh a de?” Jisunü alo, “Am, nünü thachoh.”

¹² Tüsho amükeam putungrübo le azothsürübonü api amülim jihchoki, apinü tümü malo.

¹³ Judüki Pilatnü api ki tha, “Arünü küdükhüh nü azhihde thiyumütsan jihchonü nünü muso de?”

¹⁴ Tüsho apinü anihbuh ki thiyu bümkhüh she malo, junangde kovünornü khide müyinsah.

Jisu Sheshihkhi

¹⁵ Kheakü phungho-thünio aban, botonü amulongkhi rihyam ching larü khülang dükhepü kovünor yakzan lakheah.

¹⁶ Tüsho judüki rihyam ching larü amütsüdak Baraba de alakheah.

¹⁷ Jumonü küyimki arü rukhüh mukhungkheanü Pilatnü tha, “Nüsa kilim inü shepü dükheshihnela? Baraba a shi, Khrista de ajikhi Jisu a?”

¹⁸ Tümütüsho mükthsükhinü anihbuh kilim Jisu rama jihdo de apinü mükheah.

¹⁹ Küyimki Pilat ju mahkhaprü binkiu kheak binde alakhea, aniubenü ha yusheak yüshih: “Ju thiyuro mihtsürü kheak tümü düthsü, tümüde api dünkheak yishih milim ching I khide küpkhukdo.”

²⁰ Tüshe amükeam putungrü le azothsürübonü Baraba dükhebah Jisu sheshihpü thaang de boto ki athsung.

²¹ Kovünornü arü ki tha, “Ane bolung shepü inü nüsa kilim dükheba?” Arünü alo, “Baraba!”

²² Pilatnü arü ki tha, “Dale tüsho Khrista de ajikhi Jisu ki inü tümü thsüba?” Arünü api ki alo, “Api yümkihang.”

²³ Judüki kovünornü tha, “Tümü thsükhi, apinü amütsü tümü rhimoa la?” Tüshe arünü alü thsüde tha, “Api yümkihang!”

²⁴ Küyimki Pilatnü tümü müthsükhukde boto arhunganim tankihkhi ngükhea, apinü ke lubah boto miki akhah mütsakde tha, “Thiyuro mihtsürü thiyih bukkhi I amülim müla. Ju nüsa küdah thsang!”

²⁵ Tüsho mihtsürü alalanü alo, “Api thiyih isa le isa tsührübo kheak rheakshang.”

²⁶ Judüki apinü arü kilim Baraba dükhe; tüsho apinü Jisu ju rhapbah ayümkihshihpü shuhmülanga jih.

Bonungrübonü Jisu Luhmünekhi

²⁷ Judüki Pilat bonungrübonü Jisu bea lubah kovünor yam ching yüzah tüsho bonungrü boto alala api mükamde mukhung.

²⁸ Tüsho arünü api khimmih khukkhijihbah mürümmuchu shulünkhim yihkihjih.

²⁹ Arünü ayangliunü rhophülapde kuthran khülang thsübah aku kheak thranjih, tüsho akhah tsülim tso khülang zhimshih. Arünü api miki khukning tüsho api ki luhmünede tha, “Tsüde laang, Jihudarü kiulongthsüpuh!”

³⁰ Judüki arünü api kheak mukhiukkih, tüsho tso lubah aku kheak rhap.

³¹ Küyimki arünü api mükhemükimkhea, arünü api kheaknü shulünkhim khukkhi tüsho anihbuh khimmih phuyujihbah ayümkihpü thode yü.

Jisu Yümkihkhi

³² Arü akhiukde alachoki, Simon de ajikhi Serene ching mihtsürü khülang arünü shoru, tüsho arünü api ki nimkih-a sangkim hanshih.

³³ Tüsho küyimki arünü Kuro Dangpung de ajikhi Golgotha ching arükhea,

³⁴ arünü akhüh düsahbah asanke api duh. Tüshe apinü ju müleakakheahbah muyung.

³⁵ Judüki arünü api yümkih, tüsho azan thsüde api khimmih chama lu, junangde wukihrünü athakhi dünjipü lakheah: “Arünü arü bolung I khimmihbo chama lu, tüsho I khimmih thsungkheak arünü azan thsü.”

³⁶ Tüsho arünü ju ching api aheangde bin.

³⁷ Tüsho api azhihkhi yu thrüta api kumung zojih: Ha jihudarü kiulongthsüpuh jisu.

³⁸ Judüki arünü api lung ahührü mahne khülang tsülim tüsho khülang huzulim yümkih.

³⁹ Tüsho atsahhorübonü arü ku angamde api ki mükhemürang thsü

⁴⁰ tüsho tha, “Nü shepünü arüngyam thsümünimbah nimung mahsam chingnü athsükhipü lanü, nü küdah thsüde khümkhitang! Nü Thrünpuh tsührü a sho sangkim chingnü akiang.”

⁴¹ Junangde amükeam putungrübonü she athrütrü le azothsürübo lungnü luhmünede tha,

⁴² “Apinü püpürü khümkhitdo; apinü anihbuh mükhümkhitkhuk. Api Israel kiulongthsüpuh a sho, kheakü apinü sangkim chingnü akishang, tüsho isanü api kheak akin labah.

⁴³ Apinü Thrünpuh kheak kindo; kheakü apinü anihbuh khümkhitshang; tümüde apinü tha, ‘I Thrünpuh tsührü ah.’ ”

⁴⁴ Api lung yümkihkhi ahührübonü she ju ruk api mükhemürang thsü.

Jisu Shekhi

⁴⁵ Kheakü animuro kim chingnü 3 king khiungde alomi alala ching amiting lakheah.

⁴⁶ Tüsho 3 king ngüm Jisunü düsheak achangnü zhide tha, “Eloi, Eloi, lama sabakthani?” ju amütsan, “I Thrünpuh, I Thrünpuh, tümüde nünü I bahyukkhea?”

⁴⁷ Ju ching zhiprü khürünü sobah tha, “Apinü Elija jichoh.”

⁴⁸ Arü bolung khülangnü nahde shande yübah minap hingkhi lu tüsho asanke ching thsambah dükheangmung mün kheaknü api duh.

⁴⁹ Püpürünü tha, “Api langzü zojang; Elija arübah api khümkhitnahnü isanü kheahanü.”

⁵⁰ Tüsho Jisunü adüsheak achangnü zhilobah anihbuh sheak akheam thsü.

⁵¹ Tüsho kheahang, arüngyam zhindokhim ju akulimnü abolim khiungde mahne thsüde thorüp; alomi niuk, tüsho lungbo lahmüzüt,

⁵² tüsho kiuyukbo khimshuh; shea lakhi amüsührü pangbo ahihkhüh arhang kamlode asürü;

⁵³ arünü kiuyukbo chingnü akhiuk tüsho Jisu arhang kamloshu arünü amüsüh kiuto ching yüzah tüsho ahihkhüh ki akhiuka huh.

⁵⁴ Küyimki bonungrü torü tüsho api lung aheangrübonü muliuyuk züngkhi tüsho adünjikhi alala ngükhea, arünü khide trede tha, “Atsütsü ha Thrünpuh tsührü thsüa lah!”

⁵⁵ Tüsho Galilee chingnü Jisu dunglim yande api tankihrü aliberü ahihdonü limshu chingnü kheahde alakheah,

⁵⁶ jurü bolung Mari Magdalen, Jakob tüsho Josep abe Mari, tüsho Zebedee tsührübo abe lakheah.

Jisu Mi Bahkhi

⁵⁷ Küyimki arelim kamkhea, nihbuh zangrü Jisu jingyanrü kamkhi Arimathea chingnü alarü mihtsürü khülang Josep arü.

⁵⁸ Apinü Pilat kilim yübah Jisu mi kheang tüsho Pilatnü api kilim jihpü thiyukhüm jih.

⁵⁹ Josepnü mi ju lubah khim athünak chingnü hing,

⁶⁰ tüsho lung chingnü akiukhi anihbuh kiuyuk aso ching zo; tüsho kiuyuk mün kheak lung ato khülang lahkih-a zobah tsoabah.

⁶¹ Tüsho Mari Magdalen le püpürü Mari kiuyuk mikhuh binde alakheah.

Kiuyuk Aheangrü

⁶² Ashidopü, Amunimung, amükeam putungrübo tüsho Pharisirübonü Pilat ki rukhüh mukhung,

⁶³ tüsho tha, “Atobuh, api arhang lachoki, mülapmüjibuhnü athakhi isanü lümkhitchoh, ‘Nimung mahsam dunglim I asürübah.’

⁶⁴ Jumonü nimung mahsam khiungde kiuyuk aheangpü thiyukhüm jihang, jude yungsho api jingyanrübonü azhing ching arübah ahühde atsobah, tüsho, ‘Ashe chingnü api arhang kamdo’ de mihtsürübo ki thabah. Junangde ashude mülapyukkhi ju akhuhbe kheaknü amütsübe labah.”

⁶⁵ Pilatnü arü ki tha, “Aheangrü bebah yüang; nüsanü amükheahkhi nangde aheangang.”

⁶⁶ Jumonü arünü yübah kiuyuk ju lungnü düngde lahdo tüsho aheangrü zojih.