MATHI 22 - AMÜSÜH HÜM CL Bible (BSI)

Arhangrü Thünio Shihdanglimyu

¹ Jisunü kheaküshe arü ki shihdanglimyubo chingnü tha:

² “Yinmi kiulongthsü ju ha kiphahlah. Kiulongthsürü khürünü api tsührü thsungkheak yamkhün kamkhi thünio thsakham,

³ tüsho apinü thünio ching jiyukrü jishihpü ayamlarübo yüshih tüshe arübonü arochih.

⁴ Kheaküshe apinü yamlarü püpürü thiyia yüshih, ‘Ajiyukrübo ki thaang, “Kheahang, inü jimpung thsakhamlah; I moshipungbo tüsho ashih-kihkhi moshibo laksahdo, tüsho lüpdükhi thsakhamlah. Arhangrü thünio ching arang.”

⁵ Tüshe arünü ju süpsüpde lüm tüsho khülangnü nihbuh lu ching tüsho püpürünü nihbuh rhimo ching de yüabah.

⁶ Aningkhinü api yamlarübo rama shik tüsho arü laksah.

⁷ Ju sobah kiulongthsüpuhnü bukakhiuk; apinü anihbuh bonungrübo yüshihbah mihkhukrübo dükheakshih tüsho arü kiuto takabahshih.

⁸ Judüki apinü ayamlarübo ki tha, “Arhangrü thünio thsakhambah lah, tüshe sherübo jiyukkheanü müthülünde alakheah.

⁹ Jumonü kiudunglimrobo ching yüang, tüsho nüsanü küdükhüh ngübanü, thünio ching jiyukang.”

¹⁰ Junangde yamlarübonü kiudunglimrobo ching yü tüsho arünü angükhi amütsü tüsho atsü chido rukhüh bemukhung. Tüsho arhangrü yam ju hanrünü mide kam.

¹¹ Tüshe küyimki kiulongthsüpuhnü hanrübo kheahpü arükhea, apinü ju ching mihtsürü khülang arhangrü khimmih müyihde ngü.

¹² Jumonü apinü anihbuh ki tha, “Müyambuh, arhangrü khimmih müyihde küde thsah ha ching azahkhea?” Tüsho apinü sheak makhiuk.

¹³ Judüki kiulongthsüpuhnü yamlarübo ki tha, “Api khah tüsho jing rhükbah bede tsoang, tüsho wungdo amiting ching bahang; ju ching atripkhi tüsho hü mütrütkhi labah.”

¹⁴ Tüsho Jisunü akheam thsüde tha, “Ahihdo jiyuk, tüshe anükhüh lang mokhita lah.”

Ruk Jihkhi dünkheak Keokhikhi

¹⁵ Judüki Pharisirübonü yü tüsho anihbuh yubo chingnü api phuhpü lümkhibo thsü.

¹⁶ Tüsho arünü api kilim arü jingyanrü bolung Herod borü yüshihde tha, “Thsangyurü, nü thiyuro, tüsho thiyuro ching Thrünpuh limro thsangyuchoh de isanü mükheahlah; yungsho nünü she dünkheak kümkanga müla; tümüde nünü mihtsürü kheyuka müla.

¹⁷ Jumonü nünü tümü lümlanü isa ki thaang? Kaesar kilim ruk jihpü alim a shi yung?”

¹⁸ Tüshe Jisunü arü lümkhi amütsü mükheahbah tha, “Nüsa yiuhkhaprübo, tümüde nüsanü rükakicho?

¹⁹ Ruk jihpü lakhi shonak I ki huhang!” Arünü api kilim adholi 1 ludarü,

²⁰ tüsho apinü arü ki keo, “Ha she miro tüsho mung a?”

²¹ Arünü alo, “Kaesar ah.” Tüsho apinü arü ki tha, “Jumonü küju Kaesar yoanü Kaesar kilim jihang, tüsho küju Thrünpuh yoanü Thrünpuh kilim jihang.”

²² Küyimki arünü ju sokhea, arünü müyinsah tüsho api bahbah tsoabah.

Arhang Kamlodarükhi dünkheak Keokhikhi

²³ Ju nimung arhang kamlodarükhi müla de atharü Sadukirü api ki arübah keokhi.

²⁴ Arünü tha, “Thsangyurü, mihtsürü khülang tsührü mülade shesho, aniurünü aniube ju alubah tüsho api thsung thsüde tsührübo lashihbah de Mosanü isa ki thakheah.

²⁵ Kheakü isa bolung keoniorü thüne lakheah. Adüjibuh ju yamkhün thsü tüsho sheabah, tüsho api tsührü mülakhinü aniube ju aniurü kilim zojih.

²⁶ Mahnepü le mahsampü tüsho athünepü khiungde ju ruk dünji.

²⁷ Akheam ching alibe ju sheabah.

²⁸ Dale tüsho arü alalanü alibe lukheale arhang kamlodarüchoki alibe ju arü thüne bolung shepü niube thsüba?”

²⁹ Jisunü arü ki alo, “Nüsanü amüsühyu yungsho Thrünpuh wu mümükheahde lakmihdo.

³⁰ Tümütüsho arhang kamlodarükhi ching arünü yamkhün müthsü, tüshe yinmi ching Thrünpuh yunirübo nangde alabah.

³¹ Tüsho asherü arhang kamlopü thsungkheaknü, Thrünpuhnü nüsa ki thakhi mükheakheah de,

³² ‘I Abraham Thrünpuh, Isak Thrünpuh tüsho Jakob Thrünpuh’? Api ju asherü yo yung tüshe arhang larü Thrünpuh ah.”

³³ Tüsho küyimki botonü ju sokhea, arünü api thsangyukhi müyinsah.

Thiyuzüng Atobe

³⁴ Tüshe küyimki apinü Sadukirü zhikde akamshihkhi Pharisirünü asokhea, arünü rukhüh mukhung.

³⁵ Tüsho arü bolung mahkhaprü khülangnü api ki rükakide keokhi,

³⁶ “Thsangyurü, yakzan ching thiyuzüng küpü atobe a?”

³⁷ Jisunü alo, “Nü mulong athrünkhinü, nü me athrünkhinü, tüsho nü lümkhi athrünkhinü Atungpuh nü Thrünpuh muzhoang.

³⁸ Ha thiyuzüng atobe tüsho akhuhbe lah.

³⁹ Tüsho mahnepü ju, ‘Nünü nü yamhingrü ki nihbuh nangde muzhoang.’

⁴⁰ Ha yuzüng mahne kheak yakzan tüsho wukihrübo alalanü angükihlah.”

Messia dünkheak Keokhikhi

⁴¹ Küyimki Pharisirübo rukhüh mukhungkhea, Jisunü arü ki keokhi,

⁴² “Nüsanü Khrista dünkheak tümü lümcho? Api shepü tsührü a?” Arünü api ki alo, “David tsührü ah.”

⁴³ Apinü arü ki tha, “Dale tüsho küde thsah Davidnü me chingnü api ki ‘Atungpuh’ de ajikhea:

⁴⁴ Atungpuhnü I Tungpuh ki tha: Inü nü riribo nü jing-thrümpung mükamshihyi khiungde I khah tsülim binang?

⁴⁵ Davidnü api ki ‘Atungpuh’ de jisho, küde thsah api ju atsührü thsüpü?”

⁴⁶ Tüsho shenü she api ki thiyu khülang she malokhuk, yungsho ju nimungnü shenü she api ki mükeokhidebah.