MATHI 15 - AMÜSÜH HÜM CL Bible (BSI)

Jipü Yakli Thsangyukhi

¹ Judüki Pharisirü tüsho yakzan thsangyurü khürü Jirusalem chingnü arübah keokhi,

² “Tümü thsükhi nü jingyanrübonü jipü yakli thsümünimcho? Tümütüsho arünü yikhap tsühchoki arü khah mümütsak.”

³ Tüshe apinü arü ki tha, “Tümüde nüsanü she nüsa jipürü yakli thsungkheaknü Thrünpuh yukhüm thsümünimcho?

⁴ Tümütüsho Thrünpuhnü tha, ‘Nü buh tüsho nü be wüntreang’; tüsho, ‘Shepünü abuh yungsho abe athruajibanü api sheshang.’

⁵ Tüshe nüsanü thachoh, ‘Shepünü abuh yungsho abe ki, “Tümüpürü nünü I kilimnü alü thsükheanü, ju Thrünpuh kilim jihdo” de thasho,

⁶ abuh yungsho abe wüntrepü yihnüpü müla.’ Junangde nüsa jipü yakli dünkheaknü nüsanü Thrünpuh yu akeangkeang kamshihchoh.

⁷ Nüsa yiuhkhaprübo! Isaianü nüsa dünkheak müchitkhi dükdü ah:

⁸ ‘Harü mihtsürübonü arü münbonü I ki wüntre jihchoh, tüshe arü mulongbo I kheaknü limshude lah.

⁹ Arünü akeangkeang ching I kingaünchoh; arünü mihtsürü yuzüngbo ju kingaün yakzan nangde thsangyuchoh.’ ”

Mihtsürü Müneanshihkhi

¹⁰ Jisunü mihtsürübo ju api kilim jibah tha, “Aniang tüsho anikhitang:

¹¹ Tümü mün ching yüzahchonü junü mihtsürü mümüneanjihchoh; tüshe tümü mün chingnü akhiukchonü junü mihtsürü müneanjihchoh.”

¹² Judüki jingyanrübonü arübah api ki tha, “Ha thade asochoki Pharisirü mulong yurido de nünü mükheahnah?”

¹³ Tüshe apinü alo, “Yinmi ching I Buhnü mükhimkhi sangrung aban rukkhitbah.

¹⁴ Arü küdah thsüshang. Arübo a müktukrü limberübo müktukrübo ah. Tüsho müktukrünü müktukrü limbesho, ane chido shingkung ching keamyukbah.”

¹⁵ Judüki Peternü tha, “Ha shihdanglimyu isa ki thanaka huhang.”

¹⁶ Jumonü Jisunü tha, “Nü she kheakü khiungde manikhityi de?

¹⁷ Tümüpürü mün ching yüzahchonü buk ching yüzahchoh tüsho müsümülüa bahchoh de nünü manikhityi de?

¹⁸ Tüshe tümü mün chingnü akhiukchonü mulong chingnü akhiukchoh, tüsho jurünü mihtsürü müneanjihchoh.

¹⁹ Tümüde mulong chingnü amütsü lümkhibo, mihkhukpü, müzammüram, yüliyüra, ahühkhi, arükchih thiyumütsan, mükhemükimbo akhiukchoh.

²⁰ Harünü mihtsürü müneanjihchoh, tüshe khah mümütsakde yimtsühkhinü a mihtsürü mümüneanjihchoh.”

Aliberü Khülang Akin

²¹ Judüki Jisunü ju chingnü wukhiuk tüsho chamachihbah Tair le Sidon lim yü.

²² Tüsho kheahang, Kanan liberü khülang ju mükeak chingnü arü tüsho api ki zhide tha, “I kheak amüthsüm laang, O Atungpuh, David tsührü! I tsührübe khitode amünean me yüzah-a lah.”

²³ Tüshe apinü alibe ki thiyu bümkhüh she malo. Tüsho ajingyanrübo arübah api ki tha, “Alibe tsoshang, tümüde anihbenü isa dunglim zhichoh.”

²⁴ Tüshe apinü alo, “I adükheakkhi Israel namfimihnu kilim lang thiyia arüshihkheah.”

²⁵ Alibenü arübah api miki khukningde tha, “Atungpuh, I rungang!”

²⁶ Apinü alo, “Azürübo yo yikhap lubah khihnubo kilim jipa bahpü dükdü yung.”

²⁷ Tüsho alibenü tha, “Dükdü ah, Atungpuh, tüshe khihnubonü she arü putungrü dükhüm kheaknü adütre ayokhikhi a tsühchoh.”

²⁸ Judüki Jisunü alo tüsho alibe ki tha, “O aliberü, nü akin tolah! Nünü alunekhi mülüjihdo.” Tüsho atsührübe ju kim chingnü nguabah.

Jisunü Mihtsürü Ahihdo Thsüngukhi

²⁹ Jisunü ju chingnü chamachihbah Galilee keto yeande yü. Judüki awung düpheak kheak yükih tüsho bin.

³⁰ Api kilim yimto ato, jingkikrü, müktukrü, aduhrü, bishia larü tüsho püpü ahihdo bede arübah ajing ki zojih; tüsho apinü arü thsüngujih.

³¹ Aduhrünü athakhi, bishia larü tsüde akamkhi, jingkikrü tsahkhi tüsho müktukrünü angükhi ngübah mihtsürübonü müyinsah. Tüsho arünü Israel Thrünpuh shijih.

Chithürü Phüyi Yimkipkhi

³² Jisunü ajingyanrübo api kilim jibah tha, “Inü harü mihtsürübo kheah-a muzholah; arübo I lung nimung mahsam mungdo tüsho arü atsühpü tümü müla. Inü arü khümde muwulungshihne, jude yungsho arü limro ching angakbah.”

³³ Api jingyanrübonü alo, “Yimto hadükhüh kippü thsüde ha azhik dangpung ching isanü yikhap suhdahde küchingnü angüba?”

³⁴ Jisunü keo, “Nüsa yikhap küdükhüh la?” Arünü alo, “Yikhap 7 tüsho thüngüh anini anükhüh.”

³⁵ Apinü boto ju alo kheak binang de tha.

³⁶ Jushu apinü yikhap 7 tüsho thüngühbo ju lubah makshe jih tüsho yihnakbah api jingyanrübo kilim jih; tüsho jingyanrübonü mihtsürübo kilim ahiuh.

³⁷ Jumonü arünü tsühbah bukthsü, tüsho arünü aningkhi adütrebo muluk atoto 7 mide hanmukhung.

³⁸ Tsühyungrübo ju aliberübo le azürübo mükhede athrürü 4000 lakheah.

³⁹ Apinü mihtsürübo thiyia tsoshihbah sangkung ching yüzah, tüsho Magadan lomi ching yü.