MATHI 13 - AMÜSÜH HÜM CL Bible (BSI)

Müjih-hiurü Shihdanglimyu

¹ Ju nimung Jisu thüyam chingnü wukhiuk tüsho keto yean bin.

² Yimto ato api ki mukhungde arü, jumonü apinü sangkung ching yüzahbah bin; tüsho yimto alala ke mungyean zhip.

³ Judüki apinü arü ki shihdanglimyu ahihdo tha: “Kheahang, müjih-hiurü khülang müjih hiupü yü.

⁴ Tüsho apinü ahiuchoki, khürü limmungyean hiuyuk, tüsho wuhnubo arübah jurü tsühabah.

⁵ Khürü alo hihde mülapung lungmibo kheak hiukih; tüsho alo kheahde mülamonü jurü nahde mukhuh.

⁶ Tüshe küyimki ani akhiukkhea, arü kheak thsahkih, tüsho arü ying mülamonü yiuhabah.

⁷ Khürü ayangrungbo ching hiuyuk, tüsho ayangbo mukhuhbah jurü khüpsahabah.

⁸ Tüshe khürü alo atsü kheak hiuyuk tüsho khürünü chi, khürünü rukrü, khürünü samrü bande asojih.

⁹ Nüsa nükhün kihlasho aniang!”

Shihdanglimyubo Amütsan

¹⁰ Tüsho jingyanrübonü arübah api ki tha, “Tümü thsükhi nünü arü ki shihdanglimyu chingnü thacho le?”

¹¹ Apinü alo, “Tümütüsho yinmi kiulongthsü aramyubo mükheahpü nüsa kilim jih, tüshe arü kilim a müjih.

¹² Tümütüsho shepü lanü api kilim alü jihbah, tüsho api suhdahde alabah; tüshe shepü mülanü, api anikhüh lakhi ju she anihbuh kheaknü lude atsobah.

¹³ Jumonü inü arü ki shihdanglimyubo chingnü asukchoh, tümütüsho kheahkheah she arünü müngü, tüsho anini she arünü muso, yungsho arünü manikhit.

¹⁴ Tüsho Isaianü müchitkhi arü kheak dünji: ‘Anini she nüsanü manikhit, tüsho kheahkheah she nüsanü mükheahkhit;

¹⁵ tümüde ha mihtsürü mulong makhaa lah, asopü arü nükhünbo düngdünglah, tüsho mükjibo tuka lah, jude müthsükhülaa arü mükbonü angübah, tüsho arü nükhünbonü asobah, jude müthsükhülaa arü mulongnü anikhitbah arholobah tüsho inü arü thsüngujihbah.’

¹⁶ “Tüshe nüsa mükbo tüsho nüsa nükhünbo müngühmühi, tümüde arünü ngüchoh tüsho sochoh;

¹⁷ tümüde inü nüsa ki tsükjide thachoh, nüsanü angükhi tüsho asokhi wukihrübo tüsho thiyuro-lungki mihtsürübo ahihdonü ngünelah tüsho sonelah, tüshe müngü tüsho muso.

Müjih-hiurü Shihdanglimyu Thanakkhi

¹⁸ “Jumonü müjih-hiurü shihdanglimyu aniang:

¹⁹ Küyimki khürünü kiulongthsü yu sobah ju manikhitba, Amütsü Khülang arübah api mulong ching hiua lakhi ju jangkhide tsochoh. Müjih limmungyean hiukhi ju api ah.

²⁰ Lungmi kheak hiukhi ju, shepünü thiyu sobah asühde nahnah leangkhichonü api ah;

²¹ tütüshe api kheak aying mülakhinü anükhühkheak lang lachoh. Küyimki küpkhuk yungsho thsümüchi arübanü ju yu dünkheaknü api nahde lungabahchoh.

²² Ayangrung ching hiukhi ju, shepünü thiyu sobah alomi mulong sansan tüsho lakhit asühkhinü thiyu ju khüpsahshihcho, tüsho aso masochonü api ah.

²³ Tüshe alo atsü kheak hiukhi ju shepünü thiyu sobah ju anikhitchonü api ah; apinü hidung akhiukshihbah khürünü chi, khürünü rukrü yungsho khürünü samrü bande asochoh.”

Muthsuaberim Shihdanglimyu

²⁴ Apinü arü ki shihdanglimyu püpü tha: “Yinmi kiulongthsü ju mihtsürü khülangnü api lu ching müjih atsü hiukhi kiphahlah;

²⁵ Tüshe küyimki mihtsürübo yapabahkheanü, api riri arübah hi bolung muthsuaberim hiuyuk tüsho tsoabah.

²⁶ Küyimki hi mukhuhbah aso asokhea, muthsuaberim she akhiuk.

²⁷ Jumonü atungrü yamlarübonü arübah api ki tha, ‘Atobuh, nünü nü lu ching müjih atsü hiukhi yung de? Dale küde thsah muthsuaberim küchingnü arüa la?’

²⁸ Apinü arü ki tha, ‘Thiriri khülangnü ha rhimodo.’ Yamlarübonü api ki tha, ‘Nünü isa yübah jurü rukmukhungshihba shi?’

²⁹ Tüshe apinü tha, ‘Düh, jude yungsho nüsanü muthsuaberimbo rukmukhungchoki jurü lung hi she rukmurhubah.

³⁰ Yimlupü khiungde ane rukhüh asürüshang, tüsho yimlupü kim ching inü yimlurübo ki thabah, “Akhuhde muthsuaberimbo hanmukhungang tüsho mo ching takpü athsün athsün thsang, tüshe hi a I jakam ching hanmukhungang.”’”

Woninji Shihdanglimyu

³¹ Apinü arü ki shihdanglimyu püpü tha: “Yinmi kiulongthsü ju mihtsürü khülangnü api lu ching woninji hiukhi kiphahlah,

³² küpü müjih alala bolung aninibe la; küyimki tode asürübanü sangrungbo kheaknü ju atobe tüsho sangdung khülang kamchoh, junangde thüning wuhnubonü arübah akhahbo kheak arü sapbo shuchoh.”

Phaüm Shihdanglimyu

³³ Apinü kheaküshe arü ki shihdanglimyu püpü tha: “Yinmi kiulongthsü ju, aliberü khülangnü phaüm lubah aümdungkhi pungdüchi 40 ching düsah-a mülamyi khiungde azokhi kiphahlah.”

Jisunü Shihdanglimyubo Ahorikhi

³⁴ Jisunü harü alala shihdanglimyubo chingnü boto ki asuk; tüsho shihdanglimyu mübedüa apinü arü ki masuk,

³⁵ junangde wukihrünü athakhi dünjipü lakheah: “Inü shihdanglimyubo ching I mün khimshuhbah; alomiküp khimtanchokinü rama lakhi inü athabah.”

Muthsuaberim Shihdanglimyu Thanakkhi

³⁶ Judüki Jisunü boto thiyia tsoshih tüsho thüyam ching yü. Tüsho api jingyanrübonü arübah tha, “Thulu ching muthsuaberimbo shihdanglimyu isa ki thanaka huhang.”

³⁷ Apinü arü ki alo tüsho tha, “Shepü müjih atsü hiuchonü Mihtsürü Tsührü ah.

³⁸ Thulu ju alomiküp, müjih atsübo ju kiulongthsü tsührübo, tüshe muthsuaberimbo a mihbukmuyuk tsührübo ah.

³⁹ Thiriri shepünü jurü hiukheanü arimri, yimlupü ju lün akheam, tüsho yimlurübo ju yunirübo.

⁴⁰ Jumonü muthsuaberimbo hanmukhungbah mo ching takkhi nangde, ha lün akheam ching dünjibah.

⁴¹ Mihtsürü Tsührünü api yunirübo thiyibah, tüsho arünü api kiulongthsü chingnü neak yihbeakshihrü tüsho amütsü rhimorü alala bemukhungbah,

⁴² tüsho arübo motru ching jipyukbah; ju ching mihtsürübonü atripbah tüsho arü hü mütrütbah.

⁴³ Judüki thiyurolungkirü arü Abuh kiulongthsü ching ani nangde atahbah. Nüsa nükhün kihlasho aniang.

Rama-lakhi Rahpung Shihdanglimyu

⁴⁴ “Yinmi kiulongthsü ju mihtsürü khülangnü ngübah thulu ching rama-lakhi rahpung kiphahlah; ju kheak asühkhinü apinü yüchoh tüsho api lakhi alala yinbah ju lu thulochoh.

Sünso Shihdanglimyu

⁴⁵ “Yinmi kiulongthsü ju shothsümolorünü ayimkhi atsüdak sünso kiphahlah,

⁴⁶ küyimki apinü amo achak sünso khülang ngübanü, yüchoh tüsho api lakhi alala yinbah ju thulochoh.

Keang Shihdanglimyu

⁴⁷ “Yinmi kiulongthsü ju keto ching jipyukbah thüngüh mungji aban wuhmukhungkhi keang khülang kiphahlah,

⁴⁸ küyimki ju mibanü, arünü kemungyean thode arüchoh; arünü binbah atsübo hah ching yukchoh, tüshe amütsübo a bahchoh.

⁴⁹ Lün akheam ching junangde alabah. Yunirübo arübah thiyuro chingnü mihbukmuyuk büthsübah,

⁵⁰ tüsho arübo motru ching jipyukbah. Ju ching atripkhi tüsho hü mütrütkhi labah.”

Thiyuro Aso tüsho Awün

⁵¹ Jisunü arü ki tha, “Nüsanü harü alala anikhitdü shi?” Arünü api ki alo, “Am, Atungpuh.”

⁵² Judüki apinü arü ki tha, “Jumonü yakzan thsangyurü yinmi kiulongthsü ching jingyanrü kamrü ju thüyam putungrünü anihbuh rahpung chingnü aso tüsho awün kukrukbo lude akhiukkhi kiphahlah.”

Nazareth ching Jisu Bahyukkhi

⁵³ Küyimki Jisunü harü shihdanglimyubo thakhamkhea, apinü ju chingnü chamachih.

⁵⁴ Tüsho küyimki api nihbuh lomi lim arükhea, apinü arü sinagog ching thsangyu, junangde arübo müyinsah tüsho tha, “Ha mihtsürü lümlung tüsho khinthiyinbebo küchingnü ngüa la?

⁵⁵ Ha sangrhimosorü tsührü yung de? Abe ju Mari yung de? Tüsho api keoniorübo Jakob, Josep, Simon, tüsho Juda yung de?

⁵⁶ Tüsho api niurü aliberübo alala isa lung lah yung de? Dale tüsho apinü harü alala küchingnü angükhea?”

⁵⁷ Jumonü arünü api bahyuk. Tüshe Jisunü arü ki tha, “Wukihrü khülang ju nihbuh kiuto tüsho nihbuh yamkhün ching düna alala ching wüntre jihchoh.”

⁵⁸ Tüsho arünü amükinmonü apinü ju ching khinthiyinbebo hihde mürhimo.