MATHI 10 - AMÜSÜH HÜM CL Bible (BSI)

Jingyanrü Thürükheak Mahne

¹ Jisunü api jingyanrü thürükheak mahne jimukhung, tüsho amünean mebo yankhitpü tüsho tukthsü le phüthsüphüram mungji alala ngushihpü arü kilim wu jih.

² Jingyanrü thürükheak mahne mung harü ah: akhuhbuh ju Peter de ajikhi Simon, tüsho aniurü Andria; Zebedee tsührü Jakob tüsho aniurü Johan;

³ Philip tüsho Bartholoma; Thoma tüsho ruk-threbuh Mathi; Alphia tsührü Jakob, tüsho Thadia;

⁴ Kananrü Simon, tüsho api thsungyukbuh Juda Iskariot.

Jingyanrübo ki Athiyikhi-rhimo

⁵ Harü thürükheak mahne ki Jisunü thiyia yüshihde tüsho thiyukhüm jihde tha: “Khiungkerü bolung düyü yungsho Samariarü kiutobo ching düyüzah.

⁶ Tüshe ju müthri Israel yamkhün dükheaka lakhi namfimihnubo kilim yüang.

⁷ Tüsho nüsa yübah thsangyuthsangraang, ‘Yinmi kiulongthsü thüninde lah.’

⁸ Tukthsü thsünguang, apham kihrü müsühkhitang, asherü arhang kamloshang, amünean me yankhitang. Nüsanü akeangnü leangkhido, akeangnü jihang.

⁹ Nüsa qiuqiuninibo ching suna, shotoyinchi, yungsho shoto tümü dühan;

¹⁰ nüsa limro thsungkheak qiuqiu yungsho pangkhümpü, yungsho jingkhümpü, yungsho tsobo alü dühan; tümüde rhimorü a nihbuh tsühyungpü ngüpü thülünlah.

¹¹ Kiuto yungsho kiulong kürü ching nüsa yübanü, ju ching shepü thülünlanü yimkhitang, tüsho nüsa mutsoyi khiungde ju ching laang.

¹² Nüsa thüyam ching yüzahchoki salüm jihang.

¹³ Yamkhün ju thülünlasho, nüsa mungtsü ju kheak lashang. Tüshe müthülüna lasho, nüsa mungtsü nüsa kilim rholoshang.

¹⁴ Tüsho sherünü nüsa müleangkhiba yungsho nüsa yubo maniba, ju yam yungsho kiuto chingnü nüsa chamachihchoki, nüsa jing kheaknü asungthulung adan khia bahang.

¹⁵ Tsükjide inü nüsa ki thachoh, mahkhap nimung Thrünpuhnü ju kiuto kheaknü Sodom tüsho Gomorra mihtsürü ki alü amüthsüm huhbah!

Thsümüchibebo Arüchoh

¹⁶ “Kheahang, inü nüsa rimre bolung namfimihnubo nangde yüshihchoh. Jumonü phuruto nangde lümlung laang tüsho müthrithrümpü nangde lümlang thsang.

¹⁷ Tüshe mihtsürübo dünkheak kümkangang, tümüde arünü nüsa kiuthsü-binkiubo kilim jihbah tüsho sinagogbo ching nüsa rhapbah.

¹⁸ Tüsho I dünkheaknü nüsabo ju kovünorbo tüsho kiulongthsürübo miki arü le khiungkerü ki amütsan thsüde bede arübah.

¹⁹ Tüshe arünü nüsa ramchoki nüsanü küde athaba yungsho tümü thaba de mulong düsansan. Tümütüsho nüsanü tümü thabeanü ju kim ching nüsa kilim jihbah;

²⁰ tümüde ha nüsanü asukchoh yung, tüshe nüsa Abuh menü nüsa hode asukchoh.

²¹ Kheakü keoniorünü keoniorü tüsho buhrünü tsührü ashepü ching jihbah; tsührübonü berübuhrü azhihde wusubah tüsho arü asheshihbah.

²² Tüsho I mung dünkheaknü alalanü nüsa thraneanbah. Tüshe shepünü akheam khiungde arümbanü akhümkhitbah.

²³ Küyimki nüsa kiuto khülang ching thsümüchibanü, püpü khülang ching akhinang. Mihtsürü Tsührü marüchoki Israel kiuto alala ching nüsa rhimo mübande alabah.

²⁴ “Jingyanrü khülang ju api thsangyurü kumung yung, yungsho yamlarü khülang ju api putungrü kumung yung.

²⁵ Jingyanrü khülang ju api thsangyurü nangde, yungsho yamlarü khülang ju api putungrü nangde alakhi asuhdah. Arünü thüyam putungpuh ki Beelzebub de jisho arünü nihbuh yamkhün ching küdükhüh she alü jiba!

Shepü ki Trebe a

²⁶ “Jumonü mihtsürübo ki dütre, tümüde amikheak makhiukpü tümü yihdoa müla, tüsho mümükheahpü tümü müyima müla.

²⁷ Tümüpürü inü amiting ching nüsa ki thachonü, animuro asukang, tüsho tümü nüsa nükhün ching sochonü, thüyam münbo kheaknü zhiang.

²⁸ Tüsho shepünü pang laksahcho tüshe me mülaksahkhuknü dütre. Tüshe shepünü me tüsho pang chido thsümüchi ching dükheakshihpü kuklanü api treang.

²⁹ Shonak 1 mo khüjak mahne müyincho de? Tüshe arü khülang she nüsa Abuhnü mümükheahde alo ching mayokhichoh.

³⁰ Tüshe nüsa ku ching kuyübo she alala khemütsande lah.

³¹ Jumonü dütre; khüjak ahihdo kheaknü nüsa adün ahihbe ah.

Khrista Alokhikhi

³² “Jumonü shepünü mihtsürübo miki I alokhibanü, yinmi ching labuh I Buh miki inü api alokhibah.

³³ Tüshe shepünü mihtsürübo miki I bahyukbanü, yinmi ching labuh I Buh miki inü api bahyukbah.

Mungtsü yungde Nuk

³⁴ “Alomi ching mungtsü handarüpü I arükheah de dülüm. Mungtsü yung, tüshe nuk akhiukshihpü I arükheah.

³⁵ Tümütüsho tsührübonü arü buhrü azhihde, tsührübonü arü berü azhihde, tsühmeakrübonü arü ani azhihde wusushihpü I arükheah.

³⁶ Tüsho mihtsürü riribo ju nihbuh betsührü thsübah.

³⁷ Shepünü I kheaknü abuh yungsho abe alü muzhochonü I jingyanrü thsüpü müthülün. Tüsho shepünü I kheaknü tsührü yungsho tsührübe alü muzhochonü I jingyanrü thsüpü müthülün.

³⁸ Tüsho shepünü nihbuh sangkim hanbah I dunglim müyannü I jingyanrü thsüpü müthülün.

³⁹ Shepü nihbuh rhangdung ngüchonü ju adükheakbah, tüsho shepünü I dünkheaknü api rhangdung dükheakchonü ju angübah.

Thsambahbo

⁴⁰ “Shepünü nüsa leangkhichonü I leangkhichoh, tüsho shepünü I leangkhichonü I thiyibuh leangkhichoh.

⁴¹ Shepünü wukihrü khülang wukihrü mung chingnü leangkhibanü wukihrü thsambah ngübah. Tüsho shepünü thiyurolungki mihtsürü khülang thiyurolungki mihtsürü mung chingnü leangkhibanü thiyurolungki thsambah ngübah.

⁴² Tüsho sherünü harü anini bolung khülang kilim I jingyanrü thsümonü kerüng pungkhüh lang she aduhbanü, inü nüsa ki thiyuro thachoh, tsükjide api thsambah müdükheak.”