MARK 8 - AMÜSÜH HÜM CL Bible (BSI)

Chithürü Phüyi Yimkipkhi

¹ Judüki nimungbo ching, kheaküshe yimto ato mukhung, tüsho arübo atsühpü mülakhinü apinü ajingyanrü jibah tha,

² “Inü botobo muzholah, tümütüsho arübo nimung mahsam I lung lado tüsho atsühpü müla.

³ Tüsho inü arübo khümde arü yam lim yüshihsho, arübo limro ching khümkeakabahbah; tümüde arü khürü a limshu chingnü arüa lah.”

⁴ Judüki api jingyanrübonü alo, “Harü mihtsürü bukthsüshihpü thsüde ha sunglo ching küde thsah yikhap suhdahde angüpü?”

⁵ Apinü arü ki keo, “Nüsa yikhap küdükhüh la?” Tüsho arünü 7 lah de alo.

⁶ Tüsho apinü boto ju alo kheak binpü thiyukhüm jih. Apinü yikhap 7 ju lu tüsho makshe jihbah yihnak tüsho boto ahiuhshihpü jingyanrübo kilim jih; tüsho arünü jude rhimo.

⁷ Tüsho arü thüngüh anükhüh lakheah, Jisunü makshe jihbah ju she arü ki ahiuhpü tha.

⁸ Junangde arünü bukthsüde tsüh, tüsho aningkhi adütrebo muluk 7 hanmukhung.

⁹ Yimtsührü mihtsürü 4000 bande alakheah. Tüsho apinü arü thiyia tsoshih.

¹⁰ Tüsho nahdü lang apinü jingyanrü lung sangkung ching yüzah tüsho Dalmanutha lomi ching yü.

Amütsan Khülang Kheangkhi

¹¹ Tüsho Pharisirünü arübah api ki atsangachihpü tankih. Api rükakide yinmi chingnü amütsan khülang kheang.

¹² Tüshe apinü me chingnü sükde lümbah tha, “Tümü thsükhi ha lünnü amütsan kheangcho? Atsütsü inü nüsa ki thachoh, ha lün kilim amütsan tümü müjih.”

¹³ Tüsho arünü chamachihbah sangkung ching yüzahlo, tüsho püpü thrip yü.

Pharisirü tüsho Herod Phaüm

¹⁴ Jingyanrübonü yikhap lupü mihabah, tüsho arü lung sangkung ching yikhap 1 kheak hode mülakheah.

¹⁵ Judüki apinü arü neangneangde tha, “Aniang, Pharisirü tüsho Herod phaüm dünkheak kümkangang.”

¹⁶ Jumonü arünü arü bolung lümakheahde tha, “Ha isa yikhap mülamonü ah.”

¹⁷ Tüsho Jisunü ju mükheahbah tha, “Nüsa yikhap mülamonü tümüde nüsanü thaachihcho le? Nüsanü kheaküshe mümükheah de yungsho manikhit de? Nüsa mulong kheaküshe müküpla de?

¹⁸ Mükbo labah, nüsanü müngü de? Tüsho nükhünbo labah, nüsanü musocho de? Tüsho nüsanü mülümkhitcho de?

¹⁹ Küyimki inü 5000 thsungkheak yikhap 5 yihnakkhea, nüsanü adütre muluk küdükhüh mide hanmukhungkhea?” Arünü api ki, 12 de alo.

²⁰ “Tüsho küyimki inü 4000 thsungkheak yikhap 7 yihnakkhea, nüsanü adütre muluk atoto küdükhüh hanmukhungkhea?” Tüsho arünü, 7 de alo.

²¹ Jumonü apinü arü ki tha, “Nüsanü kheakü khiungde manikhityi de?”

Bethsaida ching Müktukrü Thsüngukhi

²² Judüki api Bethsaida ching arü; tüsho arünü api kilim müktukkhi mihtsürü khülang bedarü tüsho api kheak qiupü mushu.

²³ Apinü müktukbuh ju akhah kheaknü thoa lubah kiulong chingnü wukhiuk. Küyimki apinü mihtsürü mük kheak mukhiukkihkhea, tüsho akhahnü api qiukhea, Jisunü keo, “Nünü tümükhüh ngünah?”

²⁴ Apinü abinkih-a kheah tüsho tha, “Inü mihtsürü ngüchoh; tüshe arübo sangdungbo nangde tsahchoh.”

²⁵ Jisunü khülang ki mihtsürü mükbo ching akhahnü qiu tüsho abinkih-a kheahshih. Tüsho api tsüde kambah lüpdükhi mütsande ngü.

²⁶ Tüsho apinü ayam lim thiyia yüshihde tha, “Kiuto ching düyü yungsho kiuto ching she ki she dütha.”

Peternü Jisu dünkheak Khipkhitkhi

²⁷ Kheakü Jisu tüsho ajingyanrübo Kaesarea Filipi kiuto ching wukhiuk; tüsho limro ching apinü ajingyanrübo ki keo, “Mihtsürübonü I she ah de thacho?”

²⁸ Tüsho arünü alo, “Johan Baptijihbuh; tüshe khürünü tha, Elija; tüsho khürünü wukihrü bolung khülang ah de tha.”

²⁹ Apinü arü ki tha, “Tüshe I ju she ah de nüsanü thacho?” Peternü api ki alo, “Nü a Khrista ah.”

³⁰ Judüki api dünkheak she ki dütha de arü ki thiyukhüm jih.

Jisunü Api Thsünüpü tüsho Ashepü Thakhi

³¹ Tüsho apinü Mihtsürü Tsührü ju khide thsünübah, azothsürü le amükeam putungrü tüsho athrütrübonü abahyukbah, alaksahbah, tüsho nimung mahsam dunglim asürülobah de arü ki thsangyupü tankih.

³² Apinü ha yu amikheak akhiukde tha. Tüsho Peternü api bemuwuhbah athürühpü tankih.

³³ Tüshe küyimki apinü rholobah ajingyanrübo kheak kheahkhea, apinü Peter ki thürühde tha, “I dunglim yüang, Arimri! Tümüde nünü Thrünpuh yungde mihtsürü dünkheak lümrhihchoh.”

³⁴ Judüki Jisunü boto le jingyanrübo api kilim jibah tha, “Shepünü I dunglim arüpü künlanü, api küdah thsüde danyukbah nihbuh sangkim shuhang, tüsho I yanang.

³⁵ Tümüde shepünü nihbuh rhangdung khümkhitpü künbanü ju adükheakbah, tüshe shepünü I tüsho thiyusheak-atsü dünkheak nihbuh rhangdung dükheakchonü akhümkhitbah.

³⁶ Tümütüsho mihtsürü khülangnü alomiküp athrünkhi alü thsübah nihbuh me dükheaksho api tümü alü thsüba?

³⁷ Yungsho mihtsürü khülangnü nihbuh rhangdung müthri tümü jihba?

³⁸ Tümütüsho shepünü ha yüliyüra tüsho neak lakhi lün ching I tüsho I yubo dünkheak achihbanü, amüsüh yunirübo bede Abuh müretahkhi ching api arüchoki Mihtsürü Tsührünü anihbuh dünkheak achihbah.”