MARK 7 - AMÜSÜH HÜM CL Bible (BSI)

Jipürü Yakli

¹ Judüki Pharisirü tüsho athrütrü khürü Jirusalem chingnü api kilim rukhüh arü.

² Arünü api jingyanrü khürü khah mümütsakde yimtsühkhi ngü.

³ Tümütüsho Pharisirü tüsho Jihudarü alalanü arü jipürü yakli yande arü khah tsüde mümütsakdüa mütsüh.

⁴ Küyimki arü yinzüyindopung chingnü arübanü arünü mümütsakdüa mütsühchoh. Tüsho arünü yakli püpü ahihdo, pungbo, phühbo tüsho kelamphüh müsühmürade kheakchoh.

⁵ Judüki Pharisirü tüsho athrütrübonü api ki keokhi, “Tümü thsükhi nü jingyanrübonü jipü yakli yande mütsahde, khah mümütsakde yimtsühcho?”

⁶ Apinü arü ki alo, “Isaianü nüsa yiuhkhaprübo dünkheak müchitkhi dükdüa ah, ha thrüta lah: ‘Harü mihtsürünü arü münbonü I wüntre jihchoh, tüshe arü mulong a I kheaknü limshulah.

⁷ Arünü akeangkeang ching I kingaünchoh; mihtsürü yuzüng yande kingaün-yakzan thsangyuchoh.’

⁸ Nüsanü Thrünpuh yukhüm zomuwuhbah mihtsürü yakli shuhlah.”

⁹ Tüsho apinü arü ki tha, “Nüsa nihbuh yakli rhimopü thsungkheaknü Thrünpuh yukhüm zomuwuhpü limro tsüde lah!

¹⁰ Tümüde Mosanü tha, ‘Nü buh tüsho nü be wüntreang; tüsho shepünü abuh yungsho abe athrubanü, api sheshang.’

¹¹ Tüshe nüsanü thachoh, ‘Mihtsürü khülangnü abuh yungsho abe ki, tümüpürü alü nünü I kheaknü leangkhichonü ju Korban (Thrünpuh kilim müsühkhitkhi thsambah) de thasho’;

¹² tüsho nüsanü abuh yungsho abe thsungkheak kheaküa tümü mürhimoshihsho,

¹³ nüsanü shuhde arükhi nüsa yakli hode Thrünpuh yu tümü nangde mülade kamshihchoh. Tüsho hanangde nüsanü ahihkhüh rhimochoh.”

Mihtsürü Mümüsühde Akamshihbe

¹⁴ Tüsho küyimki apinü boto alala api kilim jikhea, apinü arü ki tha, “Alalanü I ki aniang, tüsho anikhitang:

¹⁵ Aleanglimnü yüzahbah mihtsürü khülang müneanjihpü tümü müla, tüshe mihtsürü chingnü tümü akhiukchonü junü api müneanjihchoh.

¹⁶ Asopü nüsa nükhün kihlasho aniang!”

¹⁷ Tüsho küyimki boto kheaknü chamkhibah apinü thüyam ching yüzahkhea, api jingyanrübonü shihdanglimyu dünkheak api ki keokhi.

¹⁸ Jumonü apinü arü ki tha, “Nüsanü ha she manikhit de? Tümüpürü aleangkheaknü mihtsürü ching yüzahchonü api mümüneanjih de nüsanü müngücho de?

¹⁹ Tümüde ju api mulong ching yungde ho ching yüzahchoh, tüsho akhiukabahchoh, hanangde tsühyungbe alala amüsüh ah.”

²⁰ Tüsho apinü tha, “Tümü mihtsürü chingnü akhiukchonü, junü mihtsürü müneanjihchoh.

²¹ Tümütüsho alunglim mihtsürü mulong chingnü amütsü lümkhi, yüliyüra, müzammüram, mihlaksah,

²² ahühpü, yihnelune, mihbukmuyuk, akeangyu, yakli-amütsü, mükjomükra, lülüshishi, makhakhi akhiukshihchoh.

²³ Harü amütsü alala alunglimnü akhiukchoh tüsho mihtsürü müneanjihchoh.”

Aliberü Akin

²⁴ Tüsho ju chingnü api tsahmusubah Tair tüsho Sidon lomi ching yü. Apinü thüyam khülang ching yüzah tüsho shenü she ju mümükheahshihpü mulong, tüshe apinü müyima mülakhuk.

²⁵ Tümüde atsührübe amünean me lakhi aliberü khülangnü api dünkheak so, tüsho arübah ajing ki mükhüm.

²⁶ Alibe ju Greekrü, Siria ching, Phoenikia chingnü asürükhi lakheah, tüsho alibenü atsührübe kheaknü amünean me yankhitshihpü mushu.

²⁷ Tüshe Jisunü alibe ki tha, “Akhuhde azürübo yimtsühshang, tümüde azürübo yo yikhap lua khihnubo kilim jipa jihpü alungki yung.”

²⁸ Tüsho alibenü api ki alo, “Am, Atungpuh, khihnubonü she dükhüm khüp azürübo mündüdre a tsühchoh.”

²⁹ Judüki apinü alibe ki tha, “Ha thakhi hode nü limro ching yüang; amünean me nü tsührübe kheaknü wukhiukdo.”

³⁰ Tüsho küyimki alibe ju ayam ching arükhea, atsührübe ju amünean me wukhiukabahbah yapkiu kheak yapa ngü.

Nükhünpeangrü Aduhrü Thsüngukhi

³¹ Tüsho kheaküshe Tair le Sidon lomi chingnü chamachihbah apinü Dekapoli lomi phulungnü hode Galilee keto ching arü.

³² Judüki arünü nükhünpeangrü thiyu müthakhukde alakhi api kilim bedarü, tüsho arünü anihbuh api khahnü aqiupü mushu.

³³ Apinü boto chingnü anihbuh ju bemuwuh, tüsho anükhünbo ching ayingkhingbo chungyuk, tüsho apinü mükeke mukhiuk tüsho amulo qiu.

³⁴ Judüki thüning lim abinkih-a kheahde apinü sheak thsü, tüsho anihbuh ki tha, “Ephphatha,” ju amütsan, “Khimshuhang.”

³⁵ Judüchokinü anükhünbo khimshuh, mulo kuduka lakhi tsüabah, tüsho apinü tsüde tha.

³⁶ Judüki she ki she dütha de apinü arü ki thiyukhüm jih; tüshe apinü küdükhüh arü ki thiyukhüm jihkhea, ju dükhüh arünü ju alü thari.

³⁷ Tüsho arünü hodakde müyinsahde tha, “Apinü alala tsüde rhimodo. Apinü nükhünpeangrünü soshih tüsho mulokikrünü thashih.”