MARK 6 - AMÜSÜH HÜM CL Bible (BSI)

Nazareth ching Jisu Bahyukkhi

¹ Judüki apinü ju chingnü wukhiuk tüsho nihbuh lomi ching arü, tüsho ajingyanrübonü api dunglim yan.

² Tüsho küyimki Amuni arükhea, apinü sinagog ching thsangyupü tankih. Tüsho ahihkhühnü api yu sobah müyinsah, “Ha mihtsürünü hadürü tümü chingnü angükhea? Tüsho apinü hadürü khinthiyinbe rhimopü thsüde api kilim lümlung jihkhi ha tümü a?

³ Ha Mari tsührü, tüsho Jakob, Josep, Juda, tüsho Simon pürü akhiung sangrhimosorü yung de? Tüsho api niurü aliberübo ha ching isa lung lah.” Tüsho arünü api bahyuk.

⁴ Tüshe Jisunü arü ki tha, “Wukihrü khülang ju nihbuh lomi, betsührü, tüsho yamkhün ching lang düna alala ching wüntre jihchoh.”

⁵ Apinü ju ching tukthsü mihtsürü anükhüh kheak akhahnü qiude thsüngukhi kheak hode rhimo ato mürhimokhuk.

⁶ Arü mükinkhi dünkheak apinü müyinsah. Jushu apinü kiulongbo ching thsangyude mükamde yü.

Jisunü Jingyanrübo Thiyikhi

⁷ Apinü thürükheak mahne ju anihbuh kilim ji, tüsho mahnenenü thiyia yüshihpü tankih, tüsho amünean mebo kurungkheak arü kilim wu jih,

⁸ tüsho arü ki thiyukhüm jih, “Nüsa hantsahchoki tso khülang kheak hode yikhap, qiuqiu, shoyukpung ching sho tümü dühan,

⁹ jingkhümpübo khümang, tüshe pangkhümpü alü dühan.”

¹⁰ Kheaküshe apinü arü ki tha, “Kürü dangpung ching nüsa thüyam ching yüzahbanü, nüsa müchamachihyikia ju ching binang.

¹¹ Tüsho sherünü nüsa müleangkhiba yungsho nüsa ki maniba, nüsa ju chingnü chamachihchoki arü azhihkhi thiyumütsan thsüde nüsa jing kheaknü asungthulung adankhia bahang.”

¹² Jumonü arünü wukhiuk tüsho mihtsürübonü mulong müthripü thsangyuthsangra.

¹³ Arünü amünean mebo ahihkhüh yankhit, tüsho tukthsürü ahihkhüh müdangke mujujihde thsüngujih.

Johan Baptijihbuh Shekhi

¹⁴ Kheakü kiulongthsüpuh Herodnü api dünkheak so, tümüde api mung thude kam. Tüsho apinü tha, “Johan Baptijihbuh ashe chingnü arhang kamloa lah, tüsho harü wubonü api kheak rhimochoh.”

¹⁵ Khürünü tha, “Ha Elija ah.” Tüsho püpürünü tha, “Ha wukihrü, yungsho khakhih wukihrü khülang nangde lah.”

¹⁶ Tüshe küyimki Herodnü asokhea, apinü tha, “Ha inü aku lipshakkhi Johan ashe chingnü arhang kamloa lah!”

¹⁷ Tümüde Herodnü thiyia yüshihbah Johan ram tüsho rhükbah aniurü Philip niube Herodia dünkheaknü rihyam ching zo; tümüde apinü anihbe lu.

¹⁸ Tümütüsho Johannü Herod ki, “Nünü nü niurü niube lupü yakzan müla” de tha.

¹⁹ Jumonü Herodianü api azhih tüsho api laksahpü kün, tüshe alibenü müthsükhuk;

²⁰ tümütüsho Herodnü api thiyuro tüsho amüsüh mihtsürü thsükhinü Johan tre, tüsho api kümdo. Kim aban api dünkheak sobah khide phümüsüpa lalashe apinü anihbuh ki anipü kün.

²¹ Judüki Herodnü api zübe thünio ching api yo achangbe atorübo, bonungrü wühkenorübo tüsho Galilee ching adungto mihtsürübo jiyukkhi nimung arü.

²² Tüsho küyimki Herodia tsührübenü azah tsünbah Herod le api hanrübo asühshihkhea, kiulongthsüpuhnü anünübe ki tha, “Nünü tümü künlanü I ki kheangang, tüsho inü nü kilim ju jihanü.”

²³ Apinü alibe ki ha she thiyuchihchim, “Nünü I ki tümüpürü kheangbanü, inü I kiulongthsü thripkhüh thsüa lalashe nü kilim jihbah.”

²⁴ Jumonü alibenü wukhiuk tüsho abe ki tha, “Inü tümü kheangba?” Tüsho alibenü tha, “Johan Baptijihbuh ku!”

²⁵ Niokheamde alibenü kiulongthsüpuh ki yüzah tüsho kheangde tha, “Kheakü nünü I kilim Johan Baptijihbuh ku phuru chingnü jihshihnelah.”

²⁶ Kiulongthsüpuh khide mulong mütsüde alakheah; tütüshe thiyuchihchimkhi tüsho api ki binrü dünkheaknü apinü anihbe ki reanglopü mükün.

²⁷ Tüsho nahdü lang kiulongthsüpuhnü api ku lude arüpü aheangrü thiyukhüm jih-a yüshih. Apinü yü tüsho rihyam chingnü aku lipshak,

²⁸ phuru chingnü api ku lude arü, tüsho ju anünübe kilim jih, tüsho anünübenü ju abe kilim jih.

²⁹ Tüsho küyimki api jingyanrübonü ju sokhea, arünü arübah mi shuh-a lu tüsho kiuyukabah.

Chithürü Phüngü Yimkipkhi

³⁰ Judüki amüsüh-thsangyurübo Jisu ki mukhungbah arünü arhimokhi le thsangyukhibo alala api ki thaa huh.

³¹ Tüsho apinü arü ki tha, “Isabonü azhik dangpung ching tsomuwuhde yübah sühkhüh sühakhimanü.” Tümütüsho ahihkhüh arüla yüla dükhinü arü yimtsühpü kim she müngü.

³² Jumonü arünü sangkung chingnü azhik dangpung khülang ching yü.

³³ Tüshe botobonü arü yükhi ngü tüsho ahihkhühnü api mükheahbah kiuto alala chingnü jingnü alihde yünü arü müngühnü khiung.

³⁴ Tüsho küyimki Jisu akhiukkhea, yimto ato ngü tüsho muzhode lüm, tümütüsho arübo aneakrü mülakhi namfimihnubo nangde alakheah. Jumonü apinü arü ki ahihdo thsangyupü tankih.

³⁵ Tüsho küyimki nimung zhomakhea, api jingyanrübonü arübah tha, “Ha azhik dangpung ah, tüsho kim zhomado.

³⁶ Arübo tsoshang, junangde arünü aphüni lomi tüsho kiulongbo ching yüzahbah arü yikhap thulobah; tümüde arü atsühpü tümü müla.”

³⁷ Tüsho arünü api ki tha, “Nünü isa yübah shotoyinchi 200 bahde arü kippü yikhap thuloshihpü mulongla de?”

³⁸ Jumonü apinü arü ki keo, “Nüsa yikhap küdükhüh la? Yüang tüsho kheahang.” Tüsho arünü ngübah tha, “Yikhap 5 tüsho thüngüh 2.”

³⁹ Judüki arübo akhunungbo thsübah rimkiu aphüyak kheak binshihpü arü ki thiyukhüm jih.

⁴⁰ Jumonü arünü akhinashu thsüde chichi tüsho thünimnim thsübah bin.

⁴¹ Küyimki apinü yikhap 5 tüsho thüngüh 2 lukhea, apinü thüning lim abinkih-a kheahbah makshe jih tüsho yikhapbo yihnakbah arü ahiuhakhipshihpü jingyanrübo kilim jih; tüsho apinü thüngüh 2 ju arü alala bolung chamjih.

⁴² Jumonü arü alala bukthsüde tsüh.

⁴³ Tüsho arünü yikhap le thüngüh dütre muluk 12 hanmukhung.

⁴⁴ Yikhap tsührü ju athrürü 5000 bande alakheah.

Jisunü Kemi kheak Tsahkhi

⁴⁵ Apinü boto müzütshihchoki, nahdü lang ajingyanrübo sangkung ching yüzahshih tüsho api müngüh Bethsaida lim yüshih.

⁴⁶ Arü yüshih dunglim, apinü tamkhüntamnüpü müzüng lim yü.

⁴⁷ Küyimki arelim kamkhea, sangkung ju keto phulung ching lakheah; tüsho api a alangzü alo kheak lakheah.

⁴⁸ Judüki apinü arübo küpkhukde sangkung bede ngü, tümüde apungnü arü thsunglode alakheah. Tüsho ayinkhipü tsangchoki apinü kemi kheaknü arü hode ayüpü tsahde arü.

⁴⁹ Tüshe küyimki arünü api kemi kheak tsahkhi ngükhea, me ah de arünü lüm, tüsho zhi;

⁵⁰ tümüde arü alalanü api ngü tüsho trede alakheah. Apinü nahde arü ki asukachih tüsho tha, “Mulong toang! I ah; dütre.”

⁵¹ Judüki apinü arü kilim sangkung ching yüzah, tüsho apung ju keamlo. Tüsho arübonü müthakhukpü thsüde khide müyinsah.

⁵² Tümüde arünü yikhapbo dünkheak manikhit, tümütüsho arü mulong müküpde alakheah.

Gennesaret ching Thsüngukhi

⁵³ Küyimki arü hode ayükhea, arünü Gennesaret lomi ching arü tüsho ju ching sangkung chinga zo.

⁵⁴ Tüsho küyimki arü sangkung chingnü akhiukkhea, nahdü lang mihtsürübonü api kheahkhit.

⁵⁵ Arünü lomi alala ching yü tüsho api lah de arünü asokhi dangpungbo ching tukthsürübo arü yapkiu kheaknü shuhbah api kilim arü.

⁵⁶ Api yüzahpung kiulongbo, kiutobo, yungsho lomi ching, arünü yinzüyindopung ching tukthsürü yapshih, tüsho arünü api khim müngam kheak lang she qiushang de api ki mushu. Tüsho küdükhühnü api qiukheanü thsüngu.