MARK 15 - AMÜSÜH HÜM CL Bible (BSI)

Pilat miki Jisu Bedarükhi

¹ Yapsu nahde amükeam putungrübonü azothsürü le yakzan thsangyurü tüsho kiuthsübinkiu alala bebah küdangkhi la; tüsho arünü Jisu rhükbah bede yünü Pilat kilim jih.

² Judüki Pilatnü api ki keokhi, “Nü Jihudarü kiulongthsüpuh a de?” Tüsho apinü alo, “Nünü athakhi nangde ah.”

³ Tüsho amükeam putungrübonü api amülim jihde ahihkhüh tha, tüshe apinü tümü malo.

⁴ Judüki Pilatnü api ki keolo, “Nünü tümü she maloba de? Arünü küdükhüh nü azhihde thiyumütsan jihchonü kheahang!”

⁵ Tüshe Jisunü judü lang tümü malo, jumonü Pilatnü müyinsah.

Jisu Sheshihkhi

⁶ Kheakü thünio abande mihtsürübonü amushukhi aramrü khülang arü kilim dükhepü yakli lakheah.

⁷ Mihtsürü khülang Baraba de ajikhi neamneamruru ching mihlaksahkhi azhihrübo lung rihyam ching lakheah.

⁸ Judüki apinü arü kilim kamruhroro rhimokhi nangde arhimoshihpü botonü api ki keokhipü tankih.

⁹ Tüshe Pilatnü arü ki alojihde tha, “Nüsa kilim inü Jihudarü kiulongthsüpuh dükheshihpü mulongla shi?”

¹⁰ Tümüde amükeam putungrübonü mükthsükhi hode api rama jihkheah de apinü mükheah.

¹¹ Tüshe apinü arü kilim Baraba dükheshihpü thsüde amükeam putungrübonü boto thurumusu.

¹² Tüsho Pilatnü arü ki thalo, “Judüasho nüsanü Jihudarü kiulongthsüpuh de ajikhi kheak inü tümü rhimoshihnela?”

¹³ Arünü zhi, “Api yümkihang!”

¹⁴ Judüki Pilatnü arü ki tha, “Tümü thsükhi, apinü amütsü tümü rhimoa la?” Tüsho arünü alü thsüde zhi, “Api yümkihang!”

¹⁵ Jumonü Pilatnü boto asühshihpü arü kilim Baraba dükhe; tüsho apinü Jisu ju rhapbah sangkim ching yümkihshihpü jih.

Bonungrübonü Jisu Mükhemükimkhi

¹⁶ Judüki bonungrübonü khiunglün-yam ching bede yüzah, tüsho arünü bonungrü boto alala jimukhung.

¹⁷ Arünü api kheak mürümmuchu khim phuyujih; tüsho arünü ayang kuthran rhode thsakhambah aku kheak thranjih,

¹⁸ tüsho api ki, “Jihudarü kiulongthsüpuh, tsüde laang!” de akin jihpü tankih.

¹⁹ Jushu arünü tsonü aku kheak rhap tüsho mükeke mukhiukkih; tüsho khukningde api kingaün.

²⁰ Tüsho küyimki arünü api mükhemürangkhea, arünü api kheaknü mürümmuchu khim yihkhibah anihbuh khimmih phuyujih, tüsho api yümkihshihpü bekhitbah yü.

Jisu Yümkihkhi

²¹ Kheakü arünü Alexander le Rufus büne abuh, Serenerü Simon, lomi chingnü akhiukbah hode ayüchoki Jisu sangkim nimkih-a hanshih.

²² Tüsho arünü Jisu ju Golgotha (amütsan kuro dangpung) de ajikhi dangpung ching bedarü.

²³ Judüki arünü asanke dungrubah api kilim kurungasoke duh, tüshe apinü ju muyung.

²⁴ Tüsho küyimki arünü api yümkihkhea, arünü api khimmihbo azan thsüde mihtsürü abande chama lu.

²⁵ Arünü api yümkihchoki yapsu 9 kingde alakheah.

²⁶ Tüsho api amülim jihkhi akumung thrüta zo: JIHUDARÜ KIULONGTHSÜPUH.

²⁷ Arünü api lung jangkhijangrarü mahne she khülang tsülim tüsho khülang ju huzulim de yümkih.

²⁸ Junangde amüsühyunü athakhi dünji, “Tüsho api ju athsümünimrü lung kheyuk.”

²⁹ Tüsho tsahhode alarübonü api athrude arü ku angamde tha, “Aha! Arüngyam thsümünimbah nimung mahsam chingnü athsülopü labuh,

³⁰ nü küdah thsüde khümkhitang, tüsho sangkim chingnü akiang!”

³¹ Junangde amükeam putungrübonü she yakzan thsangyurübo lung thsürubah mükhemükimde arü bolung thaachih, “Apinü püpürü khümkhitdo, tüshe aküdah thsüdüa mükhümkhitkhuk.

³² Israel kiulongthsüpuh, Khrista kheakü sangkim chingnü akiang, junangde isanü angübah tüsho akin labah.” Tüsho api lung yümkih-a bahrünü she api mükhemükim thsü.

Jisu Shekhi

³³ Küyimki animuro kamkhea, alomi alala ching amiting ju 3 king khiungde la.

³⁴ Tüsho 3 king ching Jisunü düsheak achangnü zhide tha, “Eloi, Eloi, lama sabakthani?” ju amütsan, “I Thrünpuh, I Thrünpuh, tümüde nünü I bahyukkhea?”

³⁵ Ju ki zhiprü khürünü ju sobah tha, “Kheahang, apinü Elija jichoh!”

³⁶ Khürünü nahde shande yübah minap hingkhi lu tüsho asanke ching thsambah dükheangmung mün kheaknü api duhde tha, “Api langzü zojang; api bekhipü Elija arünahnü isanü kheahanü.”

³⁷ Tüsho Jisunü düsheak achangnü zhibah api sheak akheam thsü.

³⁸ Judüki arüngyam zhindokhim akulimnü abolim khiungde mahne thsüde thorüp.

³⁹ Küyimki ju ki zhipbuh bonungrü torünü apinü hanangde zhibah sheak akheam thsükhi ngükhea, apinü tha, “Tsükjide ha mihtsürü Thrünpuh tsührü thsüa lah.”

⁴⁰ Ju ching aliberü khürü limshu chingnü kheahde alarü bolung Mari Magdalen, akheambuh Jakob tüsho Josep büne abe Mari, tüsho Salome lakheah,

⁴¹ api Galilee ching lachoki arünü api yande yübah anihbuh rungkheah, tüsho api lung Jirusalem lim aturü aliberü ahihkhüh lakheah.

Jisu Mi Bahkhi

⁴² Küyimki arelim kamkhea, Amuni müngüh thsakhamthsayipü nimung lamonü,

⁴³ kiuthsü-binkiu ching adungto kheyukrü Arimathearü Josep, Thrünpuh kiulongthsü aleangde alabuhnü arübah mulong tode Pilat ki yü tüsho Jisu mi kheang.

⁴⁴ Pilatnü api sheabahkhi müyinsah, tüsho api nahde ashekhea shi yungnü bonungrü torü ki keokhi.

⁴⁵ Tüsho küyimki bonungrü torü kilimnü amütsankhea, apinü Jisu mi ju Josep kilim jihpü mülü.

⁴⁶ Judüki apinü khimthünak thulobah api yihkhi tüsho khimthünak ching hing. Tüsho apinü lung ching kiukhi kiuyuk ching api yapshih, tüsho kiuyuk mi kheak lung khülang lahkih-a zo.

⁴⁷ Tüsho Mari Magdalen le Josep abe Mari anenü Jisu yappung kheahde alakheah.