MARK 13 - AMÜSÜH HÜM CL Bible (BSI)

Arüngyam Thsümünimpü Thakhi

¹ Jisu arüngyam chingnü wukhiukde alachoki api jingyanrü bolung khülangnü tha, “Thsangyurü, küdükhüh amüyinsahbe lungbo tüsho thüyam lanü kheahang!”

² Tüsho Jisunü api ki alo tüsho tha, “Nünü harü thüyam atotobo ngücho shi? Ha dangpung ching lung khülang she maningde akeambah.”

Küpkhuk tüsho Thsümüchibo

³ Kheakü api arüngyam mikhuh Oliv Müzüng kheak binchoki, Peter, Jakob, Johan, tüsho Andria pürünü api ki mükhingde keokhi,

⁴ “Harü küyimki dünjibanü isa ki thaang? Tüsho harü alala dünjipü lachoki amütsan tümü laba?”

⁵ Tüsho Jisunü arü ki alojihde tha, “Shenü she nüsa mümülapyukpü kümkangang.

⁶ Tümüde ahihkhühnü I mung chingnü thade arübah, ‘I api ah,’ tüsho ahihkhüh mülapyukbah.

⁷ Küyimki nüsanü thirithsü düsheakbo sobanü dümüyinsah; tümüde hadürü dünjibah, tüshe akheam marüyi.

⁸ Tümütüsho trükshihnü trükshih azhihde awusubah, tüsho kiulongthsünü kiulongthsü azhihde awusubah. Dangpung dangpung ching muliuyuk züngbah, tüsho khümzung le küpkhukbo labah. Harü ha zübe thsünü atankihbo lah.

⁹ “Tüshe nüsa thsungkheaknü kurhangang, tümüde nüsabo kiuthsübinkiu kilim jihbah, tüsho sinagogbo ching nüsa lakbah. Tüsho arü ki thiyumütsan thsüde I dünkheaknü nüsabo yakzanshuhrübo le kiulongthsürübo miki bedarübah.

¹⁰ Tüsho akhuhde trükshih alala ki thiyusheak-atsü thsangyuthsangrabah.

¹¹ Tüshe küyimki arünü nüsa rama jihbanü, akhuhlimnü mulong düsansan, yungsho nüsanü tümü thabaki de dülüm. Tüshe ju kim ching tümüpürü nüsa ki lümkhitshihbanü ju thaang; tümüde athabuh ju nüsa yung, tüshe Amüsüh Me ah.

¹² Kheakü keoniorünü keoniorü, abuhnü atsührü sheshihpü thsungyukbah; tsührübonü berübuhrü azhihde wusubah tüsho arü sheshihbah.

¹³ Tüsho I mung dünkheaknü mihtsürü alalanü nüsa thraneanbah. Tüshe shepünü akheam khiungde arümbanü akhümkhitbah.

Thsümütsü Ato

¹⁴ “Tüshe küyimki nüsanü ‘adükheakshihpü athraneanbe’ Daniel wukihrünü athakhi amüzhippung ching zhipde angübanü–akherünü anikhitang–judüki sherü Judea ching lanü müzüngbo ching tsoang.

¹⁵ Tüsho shepü thüyam-mün kheak lanü düyüki yungsho tümükhüh lupü nihbuh yam ching düyüzah.

¹⁶ Tüsho shepü thulu ching lanü nihbuh khimmih lupü düyülo.

¹⁷ Tüshe jurü nimungbo ching sherü mübünkeangde la tüsho khungarü niuh duhde alarübo are!

¹⁸ Tüsho tsüngkam müdünjipü tamkhüntamnüang.

¹⁹ Tümüde jurü nimungbo ching Thrünpuhnü athrünkhi atankih chingnü ha kim khiungde, yungsho küyimkishe mülabe thsümütsü labah.

²⁰ Tüsho jurü nimungbo Atungpuhnü mükhikkheamkhülaa, sheshe rhangdung mülapü lakheah; tüshe apinü amokhitrü thsülimnü, apinü nimungbo khikkheam.

²¹ Khürünü nü ki, ‘Kheahang, Khrista ha kheak lah!’ yungsho ‘Kheahang, api ju ching lah!’ de thasho, ju akin düla.

²² Tümütüsho arükchih Khristabo tüsho arükchih wukihrübo akhiukbah tüsho kuksho amokhitrü she mülapyukpü amütsanbo tüsho amüyinsahbebo huhbah.

²³ Tüshe kurhangang; inü amüngühnü alala nüsa ki thado.

Mihtsürü Tsührü Arüpü

²⁴ “Tüshe jurü nimungbo ching, thsümütsü dunglim, ani mitingde akambah, tüsho khinunü ayin müjih;

²⁵ thüning ching chiningbo keamkhibah, tüsho thüning ching lakhi sühmühbo niukbah.

²⁶ Judüki Mihtsürü Tsührü wu tüsho müretah ato lade amo ching arükhi arünü angübah.

²⁷ Judüki apinü nihbuh yunirübo arüshihbah, tüsho alomi akheam chingnü thüning akheam khiungde thrip phüyi chingnü apinü amokhitrübo bemukhungbah.

Khubasodung chingnü Anikhitbe

²⁸ “Kheakü khubasodung chingnü ha shihdanglimyu anikhitang: Küyimki adübit chinde ayü akhiukbanü, muzhu thünindo de nüsanü mükheahchoh.

²⁹ Junangde küyimki nüsanü harü dünjikhi ngübanü, khimdopü ki thüninde lah de mükheahang.

³⁰ Atsütsü inü nüsa ki thachoh, harü alala müdünjiyikia ha lün hode mutso.

³¹ Thüning tüsho alomi hode atsobah, tüshe I yubo a küyimkishe hode mutso.

Nimung tüsho Kim Shenü Mümükheah

³² “Tüshe ju nimung tüsho kim Abuh kheak hode, yinmi yunirübo yungsho Atsührü yungsho shenü she mümükheah.

³³ Kurhangang, aheangang, tüsho tamkhüntamnüang; tümüde kim küyimkianü nüsanü mümükheah.

³⁴ Ha mihtsürü khülangnü api yamlarübo aban ki nihbuh rhimo hahmülang tüsho ripit-neakrü ki thiyukhüm jihde nihbuh yam zojihbah limshu lomi ching hantsah yükhi kiphahlah.

³⁵ Jumonü kurhangang, tümütüsho thüyam putungrü ju arelim a shi, tsüngphulung a shi, thunu khungchoki a shi, dashi yapsu arübanü nüsanü mümükheah.

³⁶ Jude yungsho zukleangnü arübah apinü nü yapa ngübah.

³⁷ Inü tümü nüsa ki thachonü, mihbüm aban ki thachoh: ‘Kurhangang!’ ”