MARK 1 - AMÜSÜH HÜM CL Bible (BSI)

Johan Baptijihbuhnü Thsangyuthsangrakhi

¹ Ha Thrünpuh tsührü Jisu Khrista thiyusheak atsü atankih.

² Isaia wukihrünü thrüta lah: “Kheahang, nüsa limro thsakhamshihpü, nüsa müngüh I yunithsürü yüshihchoh.

³ Sunglo ching khülangnü azhikhi düsheak: Atungpuh limro thsakhamjang, api tsahpung mukhiungarihdo thsüjang.”

⁴ Johannü sunglo ching baptijihde tüsho neak bahpü thsungkheak mulong rholode baptipü thsangyuthsangrade arü.

⁵ Tüsho Judea lomi alala, tüsho Jirusalem chingnü api kilim wukhiuk tüsho arü neakbo alokhide Jordan ayung ching apinü alala baptijih.

⁶ Johannü kemel nam khim phuyu tüsho achim yande shihküpnü rüm, tüsho apinü tangkhobo le mütüm mukhukebo tsüh.

⁷ Tüsho apinü thsangyuthsangrade tha, “I kheaknü atobe khülang, inü mükhümbah ajingkhümpü zhi trünjihpü müthülünkhi, I dunglim arüchoh.

⁸ Inü nüsa kenü baptijih, tüshe apinü nüsa Me Amüsühnü baptijihbah.”

Jisu Baptikhi tüsho Rükakikhi

⁹ Ju kim ching Jisu ju Galilee ching lakhi Nazareth chingnü arü tüsho Jordan ching Johannü baptijih.

¹⁰ Jisu ke chingnü akhiukde alachoki, thüning khimshuhbah müthrithrümpü nangde api kheak Me akikhi ngü.

¹¹ Tüsho yinmi chingnü düsheak khülang arü: “Nü inü amuzhokhi I tsührü; nü kheak I mulong keamchoh.”

¹² Tüsho zukleangnü Menü api sunglo ching bede yü.

¹³ Tüsho api Arimrinü rükakide sunglo ching nimung yirü la, tüsho mütüm shiwüh bolung lakheah; tüshe yunirübonü arübah api rung.

Jisunü Thüngüh-ramrü Phüyi Jikhi

¹⁴ Kheakü Johan rihyam ching yukshu, Jisunü Thrünpuh kiulongthsü thiyusheak-atsü thsangyude Galilee ching arü,

¹⁵ tüsho tha, “Kim khiungdo, tüsho Thrünpuh kiulongthsü thüninde lah. Mulong müthriang, tüsho thiyusheak-atsü ching kinang.”

¹⁶ Tüsho api Galilee keto yean tsahde alachoki, Simon tüsho aniurü Andria büne keto ching keang jipde ngü; tümüde ane thüngüh-ramrü lakheah.

¹⁷ Judüki Jisunü ane ki tha, “I dunglim arang tüsho inü nüke mihtsürü-ramrü kamshihbah.”

¹⁸ Tüsho judüchokinü anenü keangbo bah tüsho api dunglim yan.

¹⁹ Küyimki api ju chingnü anükhüh limshude ayükhea, apinü Zebedee tsührü Jakob, tüsho aniurü Johan ane sangkung ching keangbo thsülode ngü.

²⁰ Zukleangnü apinü ane ji, tüsho anenü ane abuh Zebedee lung amulokhi yamlarübo sangkung ching zojihbah api dunglim yü.

Amünean Me Lakhi Mihtsürü

²¹ Judüki arünü Kapernaum ching yü, tüsho zukleangnü apinü Amuni sinagog ching yüzah tüsho thsangyupü tankih.

²² Tüsho apinü thsangyukhi ching mihtsürübonü müyinsah, tümüde apinü thiyukhüm-sühmüh lakhi khülang nangde thsangyu.

²³ Judüki sinagog ching amünean me yüzahkhi mihtsürü khülang lakheah. Tüsho apinü zhi,

²⁴ “Isanü nü lung tümü thsüba, Nazarethrü Jisu? Nü isa dükheakshihpü arükhea de? Nü sheanü inü mükheahlah– Thrünpuh yo Amüsüh Khülang ah!”

²⁵ Tüshe Jisunü api thürühde tha, “Dalan, tüsho api kheaknü akhiukang!”

²⁶ Amünean menü mihtsürü ju ajande achangnü arungshih, tüsho api kheaknü akhiukabah.

²⁷ Judüki mihtsürü alalanü müyinsahde arü bolung keokhiachih, “Ha tümü a? Kingaün-yakzan aso ha tümü a? Tümütüsho thiyukhüm-sühmühnü apinü amünean mebo she thiyukhüm jihchoh, tüsho arünü api ki mihyuanichoh.”

²⁸ Tüsho nahdü lang Galilee lomi alala ching api thukhi soride yü.

Mihtsürü Ahihkhüh Thsüngukhi

²⁹ Kheakü arü sinagog chingnü akhiuk müleangnü, arünü Jakob le Johan bebah Simon le Andria büne yam ching yüzah.

³⁰ Tüshe Simon niube phütsaknü tukthsüde yapa lakheah, tüsho arünü anihbe dünkheak Jisu ki thaa huh.

³¹ Jumonü apinü arübah akhah kheaknü thomusu, tüsho nahdü lang anihbe kheaknü phütsak ju tsoabah. Tüsho alibenü arü mozümodoa kip.

³² Kheakü arelim, ani yüzahbah, arünü tukthsürü tüsho amünean me yüzahrü alala api kilim bedarü.

³³ Tüsho kiuto abümnü khimdopü ki mukhungde arü.

³⁴ Judüki apinü tukthsürü aphuaphu ahihdo thsüngu tüsho amünean mebo yankhit; apinü amünean mebo thiyu müthashih, tümütüsho arünü api mükheah-a lakheah.

Jisunü Galilee ching Thsangyuthsangrakhi

³⁵ Yapsu khide mükikde, mitingde alachoki Jisunü asürübah thüyam chingnü chamachih tüsho azhikpung khülang ching yüzahbah tamkhüntamnü.

³⁶ Tüsho Simon le api lung larübonü api yim.

³⁷ Küyimki arünü api yimkhitkhea, arünü api ki tha, “Alalanü nü yimchoh.”

³⁸ Tüshe apinü arü ki tha, “Isanü püpü kiulongbo ching yüanü, junangde ju ching she inü thsangyuthsangrabah, tümütüsho ha thsungkheak I arükheah.”

³⁹ Junangde apinü Galilee alala ching sinagogbo ching thsangyuthsangrade tüsho amünean mebo yankhita bahde yü.

Mihtsürü khülang Thsüngukhi

⁴⁰ Judüki aphamrü khülang api ki mushude, khukningde arübah tha, “Nünü mulonga lasho, I müsühkhitjang.”

⁴¹ Tüsho Jisunü muzhode akhah chungkhitbah api qiu, tüsho tha, “Inü mulonglah, müsühde kamang.”

⁴² Apinü atha akede, anihbuh kheaknü apham ju dükheakabah tüsho api müsühde kam.

⁴³ Tüsho apinü anihbuh ki düküngde thabah thiyia tsoshih.

⁴⁴ Tüsho apinü anihbuh ki tha, “Nünü she ki tümü dütha; tüshe nü limro ching yübah amükeamrü ki huhang, tüsho nü müsühkhitkhi dünkheak Mosanü thiyukhüm jihkhi nangde rhangdung-yumütsan thsüde kingaün jihang.”

⁴⁵ Tüshe apinü wukhiukbah thiyusheakbo bushihde zuzu thsüde athapü tankih. Jude athsükhinü Jisu ju zuzu thsüde kiuto ching müyüzahkhukde kam tüshe aleangkheak azhikpungbo ching lakheah; tütüshe mihtsürübonü thrip aban chingnü api kilim arü.