MAHKHAPRÜ 21 - AMÜSÜH HÜM CL Bible (BSI)

Benjamin Trük Niuberübo

¹ Kheakü Israel mihtsürünü Mizpa ching thiyuchihchim lude tha, “Isa shenü she nihbuh tsührü aliberü Benjaminrü kilim niuberü thsüpü müjih.”

² Judüki mihtsürübonü Thrünpuh yam ching yü tüsho arelim khiungde Thrünpuh miki ju ching la. Arünü arü düsheak achangnü düsüknimde trip,

³ tüsho tha, “O Atungpuh Israel Thrünpuh, khihni Israel trük khülang dükheakpü thsüde Israel ching ha küde adünjikhea?”

⁴ Jumonü ashido yapsu mihtsürübonü mükikde asürübah ju ching kingaün sadam thsü tüsho taka kingaünkhi le mungtsü kingaünbo jih.

⁵ Israelrünü tha, “Israel trük alala bolungnü shepü Atungpuh miki amukhungrü lung marü le?” Tümüde arünü Mizpa ching Atungpuh miki maturü dünkheak thiyuchihchim ato khülang thsü, “ Tsükjide api asheshihbah.”

⁶ Tüsho Israelrünü arü keoniorü Benjamin dünkheak mulong rozhakde tha, “ Khihni Israel chingnü trük khülang yihkhita bahdo.

⁷ Aninga larübo niuberü thsungkheak isanü küde athsüba, tümüde isanü arü kilim isa tsührübo mürhangshih de Atungpuh ki thiyuchihchimdo.”

⁸ Tüsho arünü tha, “Israel trük chingnü shepü Atungpuh kilim Mizpa ching matu le?” Atsütsü, Jabesh-gilead chingnü sheshe amukhungrü lung binkheampung ching matu.

⁹ Tümütüsho mihtsürübo khechoki Jabesh-gilead ching larü sheshe mülakheah.

¹⁰ Jumonü amukhungrübonü athrungrü amüzhak mihtsürü 12,000 yüshihde thiyukhüm jih, “Yüang tüsho Jabesh-gilead ching larü aliberü tüsho azürü bede nukshangnü laksahang.

¹¹ Tüsho nüsanü arhimopü ju ha: Nüsanü mütsangkhitkhi athrürü tüsho aliberü aban laksahang.”

¹² Junangde arünü Jabesh-gilead ching larü atsangkhit anünürü athrürü lung munungrü 400 yimkhit; tüsho arübo Kanan lomi ching lakhi Shilo binkheampung ching bedarü.

¹³ Judüki amukhungrü athrünkhinü Rimmon lungto ching larü Benjaminrü kilim thiyu yüshih tüsho arü ki mungtsü thayuk.

¹⁴ Jumonü ju kim ching Benjamin alodarü, tüsho arünü Jabesh-gilead liberü müsheshihde khümkhitkhi arü kilim jih; tüshe arü thsungkheak suhdahde müyimkhityide alakheah.

¹⁵ Tüsho mihtsürübonü Benjamin thsungkheak mulong rozhak, tümütüsho Atungpuhnü Israel trük bolung ching akeangkeang khülang akhiukshih.

¹⁶ Judüki amukhungrü azothsürübonü tha, “Isanü aninga larü niuberü thsungkheak küde athsüba, tümütüsho Benjamin liberübo laksahkhamdo?”

¹⁷ Tüsho arünü tha, “Benjaminrü aninga larü thsungkheak yamrüplurüp labeah, junangde Israel chingnü trük khülang müdükheak.

¹⁸ Tütüshe, isanü isa tsührübo arü niuberü thsüpü müjih, tümüde Israel mihtsürübonü thiyuchihchim, ‘Benjamin kilim niuberü jihrü muthrumünean thsang.’”

¹⁹ Judüki arünü tha, “Bethel dukulim, Bethel chingnü Shekem wutu lim limto aniakhiuklim, tüsho Lebbona düjinglim Shilo ching kam aban Atungpuh thünio khülang lachoh.”

²⁰ Jumonü arünü Benjamin mihtsürübo ki thsangdande tha, “Yüang, tüsho kurungasolubo ching jimde aleangang,

²¹ tüsho kheahang; tüsho küyimki Shilo liberübo atsünpü akhiukbanü, kurungasolubo chingnü akhiukang tüsho athrürü abannü Shilo liberü bolungnü niuberü thsüpü ramang; jushu Benjamin lo ching yüang.

²² Küyimki arü bebuhrü yungsho arü khiungmungrü arübah atsangbanü isanü arü ki thabah, ‘Isa dünlimnü arü ki muzhoang, tümütüsho thirithsü ching isanü arü khilim niuberü mulujih; tüsho nüsa amülim müla, tümütüsho nüsanü arü kilim nüsa tsührübo müjih.’”

²³ Tüsho Benjamin mihtsürübonü jude rhimo; arünü atsünrü bolungnü arü abande suhdahde niuberübo rama lu. Jushu arünü yübah arü yamrüplurüp kilim rholo tüsho kiutobo thsülobah jurü ching la.

²⁴ Jumonü Israel mihtsürü abannü ju kim ching chamachihde nihbuh trük, yamkhün tüsho nihbuh yamrüplurüp lim yü.

²⁵ Ju kim ching Israel ching kiulongthsürü mülade alakheah; mihbüm abannü nihbuh mük ki tümü alungkianü ju rhimo.