MAHKHAPRÜ 20 - AMÜSÜH HÜM CL Bible (BSI)

Israelrü Thirithsüpü Thsakhamkhi

¹ Judüki Israelrü alalanü Dan chingnü Beersheba tüsho Gilead lomi chingnü akhiukbah Atungpuh miki Mizpa ching mukhung.

² Tüsho Israel limberü alala Thrünpuh mihtsürübo mukhungkhi ching arü, tüsho nukshang shuhrü bonungrü 400,000 lakheah.

³ (Kheakü Benjaminrünü Israel mihtsürübo Mizpa ching wutudo de so.) Tüsho Israel mihtsürübonü tha, “ Ha athsümünim rhimo künangde adünjikheanü isa ki thaang?”

⁴ Tüshe ashebe yamkhünbuhnü alo, “I tüsho I hanniube Benjaminrü yo Gibea ching azhing ching binkheampü thsüde arü.

⁵ Gibea mihtsürübonü azhing ching I laksahpü thüyam zündode arü; ju müthri arünü I hanniube kheak amütsü thsü tüsho anihbe sheabah.

⁶ Jumonü inü anihbe pang lubah khapthünak tüsho Israel trük thürükheak mahne abande mühah, tümütüsho arünü Israel ching achihbe müzammüram yihbeak.

⁷ Kheakü nüsa alala Israelrü ah; nüsa athsunganah tüsho ha ching lümthiyan jihang.”

⁸ Tüsho mihtsürü alalanü khülang ruk asürübah tha, “Isa she lang she khimyam yungsho thüyam lim müyülo.

⁹ Tüshe kheakü isanü Gibea kheak ha rhimobah: isanü azan thsüde mihtsürü mokhitbah Gibea yanbah.

¹⁰ Israel ching shihcham thürü chingnü shihcham khülangnü bonungrü ahiuhakhipbah, tüsho püpürübonü yübah Israel ching arünü ha müzammüram yihbeakkhi dünkheak Benjamin ching lakhi Gibea thsümüchibah.”

¹¹ Jumonü Israel mihtsürü alala kiuto azhihde mihtsürü khülang kamde mukhung.

¹² Judüki Israel trükbonü Benjamin trük alala ching mihtsürübo yüshihde tha, “Nüsa bolung dünjikhi athsümünim rhimo ha tümü a?

¹³ Kheakü Gibea ching mihbukmuyuk mihtsürübo jihang, junangde isanü arübo asheshihbah tüsho Israel chingnü amütsü rhimo yihkhita bahbah.” Tüshe Benjamin mihtsürübonü arü keoniorü Israelrü yu mani.

¹⁴ Ju müthri Benjamin mihtsürübonü Israelrü bede keochihpü arü kiutobo chingnü rukhüh Gibea ching mukhung.

¹⁵ Ju kim ching Benjamin mihtsürü nukshang shuhrü 26,000 khekhit, ju lung Gibea ching larü amokhitkhi 700 mokhit.

¹⁶ Harü mihtsürü alala lungnü huzulim-khah mihtsürü 700 amokhitkhi lakheah; mihbüm abannü lunghitliunü kuyübüm kheak mülakphahde kingrhakde alakheah.

¹⁷ Tüsho Benjamin mükhede, Israel mihtsürü nukshang shuhrü 400,000 khekhit; harü alala thirithsürü lakheah.

Benjamin bede Thirithsükhi

¹⁸ Tüsho Israel mihtsürünü asürübah Thrünpuh lümkhi keopü Thrünpuh yam ching wutu. Arünü tha, “Benjamin mihtsürü bede keochihpü isa shepü akhuhde awutuba?” Atungpuhnü alo, “ Juda akhuhde awutubah.”

¹⁹ Jumonü Israel mihtsürünü yapsu asürü tüsho Gibea azhihde binkheampung thsü.

²⁰ Israel mihtsürünü Benjamin bede keochihpü wutu tüsho keochihpü bonungrü kiuto lim abinbah zhippung thsakhama lu.

²¹ Benjaminrünü Gibea chingnü akhiuk tüsho Israelrü mihtsürü 22,000 thirithsüpung ching kiua lungshih.

²² Tüsho Israel mihtsürübonü khülangnü khülang mulong toa lu tüsho atan ni arü zhippung thsakhambah zhip.

²³ Israelrünü wutu tüsho arelim khiungde Atungpuh ki trip tüsho Atungpuh ki keokhi. Arünü tha, “Isanü isa keoniorü Benjamin bede keochihpü yüloba shi?” Atungpuhnü alo, “ Arü azhihde wutuang.”

²⁴ Jumonü Israel mihtsürünü mahne nipü Benjaminrü azhihde phünide yü.

²⁵ Tüsho Benjaminrünü arü azhihde Gibea chingnü mahne nipü wukhiuk, tüsho Israel mihtsürü 18,000 kiua lungshih; harü alala nukshang shuhrü mihtsürü lakheah.

²⁶ Judüki Israel mihtsürü bonungrü athrünkhi wutubah Bethel ching arü tüsho trip; arünü Atungpuh miki bin tüsho ju nimung arelim khiungde khümkeak thsü, tüsho Atungpuh miki taka kingaünkhi le mungtsü kingaünbo jih.

²⁷ Tüsho Israel mihtsürünü Atungpuh ki keokhi (tümüde ju nimungbo ching Thrünpuh tangzüng sangdan ju ching lakheah,

²⁸ tüsho judüki Aron tsührü, Eleazar tsührü Phinehasnü Atungpuh miki tankihde alakheah,) “ Kheaküshe isanü wutuba shi, dashi arün thsüba?” Atungpuhnü tha, “Wutuang; tümüde inü shido arübo nüsa khah ching jihbah.”

²⁹ Jumonü Israelrü Gibea mükamde mihtsürü jika binshih.

³⁰ Tüsho Israel mihtsürübonü asam nipü Benjaminrü azhihde wutubah püpüki nangde Gibea azhihde thürüna zhip.

³¹ Benjaminrünü mihtsürübo azhihde wukhiuk tüsho kiuto chingnü khanguhde yüa lakheah. Arünü püpüki nangde Israelrü khürü Bethel limro le Gibea limro kheak tüsho mükeak ching laksahpü tankih. Arünü Israelrü 30 bande laksah.

³² Benjaminrünü tha, “Püpüki nangde isanü kukdo.” Tüshe Israelrünü rholode arüpü lümkhi thsü tüsho arübo kiuto chingnü limrobo ching yüabahshih.

³³ Israel mihtsürü alalanü arü dangpung chingnü asürü tüsho Baal-tamar ching ayanpü thsakham; tüsho Israel mihtsürü sherübo jika binkheanü Geba aniyüzahlim thripnü nanachihde akhiuk.

³⁴ Israel mihtsürü alala chingnü amokhitkhi 10,000 Gibea azhihde arü, tüsho thirithsü müküpde alakheah; tüshe Benjaminrünü arü kheak thsümütsü lah de mümükheah.

³⁵ Atungpuhnü Israel müngüh Benjaminrü kukjih; tüsho Israelrünü ju nimung Benjaminrü 25,100 laksah; harü alala nukshang shuhrü mihtsürü lakheah.

³⁶ Jumonü Benjaminrünü arünü mukuk de lümkhit. Israel mihtsürübonü Benjaminrü kheaknü rholode arü, tümütüsho arünü Gibea mükamde jika binshihrü kheak mulonglam la.

Israelrünü Akukkhi

³⁷ Tüsho jika binkhi mihtsürübonü nanachihde Gibea lim yü; jika binkhi mihtsürübonü wukhiukbah kiuto ching alala laksah.

³⁸ Kheakü Israel mihtsürü le jika binrü dükeak amütsan khülang mokhüh ato kiuto chingnü thüning lim yükihshihpü thsü,

³⁹ tüsho Israel mihtsürübonü keochihpung rholode arüpü lakheah. Ha kim khiungde Benjaminrünü Israel 30 laksah-a lakheah. Arünü arü küdah thsüde tha, “ Akhuhbe rithsü nangde, tsükjide isanü arü kukdo.”

⁴⁰ Tüshe küyimki kiuto chingnü mokhüh khülang yükihpü tankihkhea, Benjaminrünü arü dunglim kheah, tüsho kiuto abümnü mokhüh thüning lim yükihkhi ngü.

⁴¹ Judüki Israel mihtsürünü arü kilim rholode yü, tüsho Benjaminrü müyinsah, tümütüsho arü kheak thsümütsü arüdo de arünü mükheah.

⁴² Jumonü arünü Israelrü müngüh sunglo lim tso, tüshe arünü mutsokhi. Tüsho kiutobo chingnü akhiukrübo Israelrünü ju ching kiua lungshih.

⁴³ Arünü Benjaminrü zündobah yande müsham tüsho aniakhiuklim Gibea mikhuh khiungde laksahde yü.

⁴⁴ Tüsho Benjamin mihtsürü athrungrü 18,000 laksah.

⁴⁵ Jushu arünü sunglo limpeang Rimmon lungto lim yü; tüsho arünü limtobo kheaknü 5000 laksah. Arünü mutuklode Gidom khiungde yande yü tüsho 2000 laksah.

⁴⁶ Ju nimung Benjaminrü alala thsürubah athrungrü 25,000 laksah.

⁴⁷ Tüshe mihtsürü 600 rholobah sunglo limpeang Rimmon lungto lim yü, tüsho ju ching Rimmon lungto ching khinu phüyi lakheah.

⁴⁸ Tüsho Israel mihtsürünü Benjamin mihtsürü azhihde rholode arü tüsho kiuto aban chingnü mihtsürü tüsho shiwüh angükhi alala nukshangnü laksah. Arünü arü yükhi kiuto alala ching mo thsahkih.