MAHKHAPRÜ 18 - AMÜSÜH HÜM CL Bible (BSI)

Mika tüsho Dan Trük

¹ Judüki nimungbo ching Israel ching kiulongthsürübo mülade alakheah. Tüsho Dan trük arü lapung yimde alakheah, tümüde Israel trük bolung arü alo müngüyide alakheah.

² Jumonü Danrünü athrungrü phüngü lomi züta kheahshihpü Zora tüsho Eshtaol chingnü yüshih. Harü mihtsürübo ju arü guk aban chingnü alakheah. Arünü arübo ki tha, “Yüang, lomi züta kheahang.” Jumonü arünü Ephraim müzüngbo ching, Mika yam lim yü tüsho ju ching bin.

³ Küyimki arü Mika yam ching lakheanü, arünü athrününgtsüng Levibuh düsheak mütsankhit. Arünü tsahhuhbah api ki tha, “Nü shenü ha ching bedarükhea? Nü ha ching tümü rhimocho?”

⁴ Apinü arü ki tha, “ Mikanü I thsungkheak ha rhimodo. Apinü I muloa lu, tüsho I api yo amükeamrü kam.”

⁵ Jumonü arünü api ki tha, “ Muzhobah Thrünpuh ki keojang, junangde isa akuk ngüde hantsahba shi yungnü amükheahbah.”

⁶ Tüsho amükeambuhnü arü ki tha, “ Mungtsü chingnü yüang. Nüsa limro ching Thrünpuh nüsa lung lashang.”

⁷ Jumonü mihtsürü phüngü ju chamachih tüsho Laish ching yü. Ju ching mihtsürübo ju Sidonrü yakli nangde keamramde tüsho kuram tsükhi ching lakheah. Arü ki achih kippü thsüde lomi ching yakzanshuhrü mülakheah. Arübo Sidonrü kheaknü limshude alakheah tüsho she kheak she chingkihachihde müla.

⁸ Judüki zütakheahrübo arü keoniorü kilim Zora tüsho Eshtaol ching arü, tüsho arü keoniorübonü tha, “Nüsa yusheak tümü a?”

⁹ Arünü tha, “ Asürang, isanü arü azhihde wutuanü. Tümüde isanü alo ngüdo tüsho ju khide tsülah. Nüsanü tümü müthsübea de? Alo müküh-a lupü yüzahpü nüsanü düdükiuhlo.

¹⁰ Küyimki nüsa yübanü, kuram tsükhi mihtsürü tüsho alo ato ching arübah. Tümüde ha lomi kheak tümü müngüde mülapung dangpung khülang Thrünpuhnü nüsa khah ching jihdo.”

¹¹ Judüki Dan guk chingnü thsühnuk hanbah keochihpü Zora tüsho Eshtaol chingnü mihtsürü 600 tsahmusu.

¹² Arünü wutubah Juda ching lakhi Kiriath-jearim ching binkheam. Hamonü khihni khiungde aniyüzahlim Kiriath-jearim dangpung ki Mahane-dan de jichoh;

¹³ ju chingnü arübo Ephraim awung lomi ching yü tüsho Mika yam ching arü.

¹⁴ Judüki mihtsürü phüngü Laish lomi zütakheahrünü arü keoniorübo ki tha, “ Ha yambo ching kingaünbe kukruk, yambuk sangthsübo, asümkhi tüsho anungkhi sangthsübo lah de nüsanü mükheahnah? Kheakü jumonü nüsanü tümü thsübanü lümakheahang.”

¹⁵ Jumonü arünü rholobah athrününgtsüng Levibuh lapung, Mika yam ching arü tüsho api ki salüm jih.

¹⁶ Dan mihtsürü 600 thsühnuk hankhi ju chipiripit ki zhip.

¹⁷ Judüki lomi zütakheahrü mihtsürü phüngünü wutu tüsho yüzahbah asümkhi sangthsü, kingaünbe kukruk, yambuk sangthsü, tüsho anungkhi sangthsübo lu. Amükeambuh ju mihtsürü 600 thirithsü thsühnuk hanrü lung ripit ki zhip.

¹⁸ Küyimki harübo Mika yam ching yüzahbah asümkhi sangthsü, kingaünbe kukruk, yambuk sangthsü, tüsho anungkhi sangthsübo lukhea, amükeambuhnü arü ki tha, “Nüsa tümü thsücho?”

¹⁹ Tüsho arünü api ki tha, “Dalan, nü khahnü nü mün hümbah isa lung arang; isa ki athsunganahrü tüsho amükeamrü thsang. Nünü mihtsürü yambuk khülang ki amükeamrü atsübea shi, dashi Israel ching trük tüsho yamkhün khülang yo amükeamrü thsükhi atsübea?”

²⁰ Junangde amükeambuh mulong asühde kam, tüsho apinü kingaünbe kukruk, yambuk sangthsü, asümkhi sangthsü lubah mihtsürübo lung yü.

²¹ Arünü arü tsührü anini, shiwühbo tüsho lakhitbo arü müngüh yüshihbah rholode tso.

²² Küyimki arü Mika yam chingnü anükhüh yüa lakhea, Mika yam phünide alarü mihtsürü mukhungbah Danrü yanphuhde arü.

²³ Arü dunglim arünü azhichoki, Danrünü rholobah Mika ki tha, “Nü tümü thsüa nü mihtsürübo keochihpü jimukhunga la?”

²⁴ Apinü alo, “Nüsanü inü athsükhi thrünpuhbo le I yo amükeamrü lude tsoa lah. I tümü lale de nüsanü I ki keocho, ‘Nü tümü thsüa la?’”

²⁵ Danrünü alo, “Isa kheak datsangachih, jude yungsho bukmüke mihtsürü khürünü nü zündobah, tüsho nü le nü yamkhün rhangdung dükheakbah.”

²⁶ Judüki Danrübo arü limro ching yüabah. Tüsho Mikanü arübo api thsungkheak khide müküplah de angüchoki, rholobah ayam lim alode yü.

²⁷ Jumonü arünü Mikanü athsükhi kukrukbo tüsho api yo amükeamrü lu tüsho keamramde tüsho kuram tsüde alarü mihtsürü kilim Laish ching yü; tüsho arünü nukshang mulonü arü laksah tüsho monü kiuto takabah.

²⁸ Arü khümkhitrü she mülakheah, tümütüsho ju Sidon chingnü limshude alakheah, tüsho arünü she kheak chingkihachih-a müla. Ju Beth-rehob jindükhün ching lakheah. Jumonü arünü kiuto thrünlobah ju ching la.

²⁹ Tüsho arünü kiuto mung ju Israel kilim zübejihkhi arü bebuhrü Dan mung jimulode Dan de ji. Tüshe adüso kiuto mung ju Laish lakheah.

³⁰ Judüki Danrünü arü thsungkheak asümkhi sangthsü zhipshih; tüsho Mosa tsührü, Gershon tsührü Jonathan tüsho api tsührübo lomi ramtso ching lakhi khiungde Dan trük amükeamrübo lakheah.

³¹ Thrünpuh yam Shilo ching lakhi kim amuyung, Mikanü athsükhi sangthsü mutukzhakde zo.