MAHKHAPRÜ 16 - AMÜSÜH HÜM CL Bible (BSI)

Gaza ching Samson

¹ Nimung khüh Samsonnü Gaza ching yü tüsho ju ching müzammüramrü khülang ngü tüsho anihbe lung yü.

² Küyimki Gazarü ki, “Samson arüa lah!” de athakhea, arünü ju dangpung zündo tüsho kiuto chipiripit ching tsüngreroro api aleangde jika bin. Arünü tsüngreroro jikshe müthsüde lüm, “Yapsu ayinkhichoki isanü api laksahbah.”

³ Tüsho Samsonnü tsüngphulung khiungde lüpa lang yap; jushu apinü tsüngphulung ching kiuto ripitbo le dungjing mahne thokhita lubah asürü tüsho akhrihbebo alala angam kheak lahkih-a hanbah Hebron lim abinbah awung mujuk lim yü.

Samson tüsho Delila

⁴ Kim anükhüh dunglim, apinü Sorek jindükhün ching lakhi aliberü khülang Delila kheak muzho.

⁵ Filistiarü kiulongthsürü phüngü yü tüsho alibe ki tha, “ Api ki rük thsüang, tüsho api sühmüh ato küching la tüsho isanü küde thsah api kukbanü yimkhitang, junangde isanü api thsümüchipü thsüde arhükbah; tüsho isa mihbüm abannü nü kilim shotoyinchi 1100 jihbah.”

⁶ Jumonü Delilanü Samson ki tha, “Nü sühmüh ato küching la, tüsho tümünü rhükbah nü thsümüchibeanü muzhobah I ki thaang.”

⁷ Tüsho Samsonnü alibe ki tha, “ Arünü sanglüh zhi amukungyikhi aso thünenü I rhüksho I yiuhyiuhde akambah, tüsho püpürü mihtsürü nangde akambah.”

⁸ Jumonü Filistia kiulongthsürübonü sanglüh zhi amukungyikhi aso thüne alibe kilim lude atu, tüsho alibenü jurünü api rhük.

⁹ Kheakü mihtsürübo anihbe lung khiungshak ching aleangde yapa lakheah. Tüsho alibenü api ki tha, “Samson! Filistiarü arüchoh.” Tüshe apinü sanglüh zhibo ju monü hingliu takshakkhi nangde rukshakabah. Jumonü api sühmüh rama lakhi ju mümükheahde alakheah.

¹⁰ Judüki Delilanü Samson ki tha, “ Kheahang, nünü I ki keangrüchoh tüsho akeangyu thachoh. Kheakü muzhobah nü tümünü arhükbeanü thaa huhang.”

¹¹ Jumonü apinü alibe ki tha, “ Arünü I püpüki mürhükkhi liu asobonü tsüde rhüksho I yiuhyiuhde akambah, tüsho püpürü mihtsürü nangde akambah.”

¹² Jumonü Delilanü liu asobo lubah api rhük tüsho tha, “Samson! Filistiarü arüchoh.” Tüsho mihtsürübo akhiungshak ching aleangde yapa lakheah. Tüshe apinü abinbo ching yo hingliu nangde yihshakabah.

¹³ Judüki Delilanü Samson ki tha, “ Kheakü khiungde nünü I ki keangrüchoh tüsho akeangyu thachoh. Nü tümünü arhükbeanü I ki thaa huhang.” Tüsho apinü alibe ki tha, “Nünü I kuyü athsün thüne hingpungdung kheak hing ching phorubah rhükkih-a zosho püpürü mihtsürü nangde yiuhyiuhde akambah.”

¹⁴ Jumonü alibenü hingpungdung kheak hing ching düngdüngde phoyuk, tüsho api ki tha, “Samson! Filistiarü arüchoh.” Tüshe apinü ayapkhi chingnü asürü, tüsho hingpungdung chingnü akuyü thokhita lu.

¹⁵ Judüki alibenü api ki tha, “Nü mulong I kheak mülade, küde thsah nünü, ‘Inü nü muzholah,’ de athapü? Nünü I ki mahsam ki keangrüdo, tüsho nü sühmüh ato küching lanü mütha.”

¹⁶ Alibenü nimung aban api thsurangkhinü ashepü thsüde api tukthsüde kam,

¹⁷ jumonü apinü alibe ki amulongyu alala tha, “ Küyimkishe I ku kheak kuyüliuh müyihkih, tümüde I be buk chingnü I Thrünpuh kilim Nazirit khülang lakheah. I kuyü hütsho, I yiuhyiuh akambah, tüsho püpürü mihtsürü nangde akambah.”

¹⁸ Küyimki Delilanü api mulongyu alala alibe ki thakhi mükheahkhea, alibenü Filistia kiulongthsürübo ji, “ Khülang ki alode atuang, tümüde api mulongyu alala I ki thado.” Jumonü Filistia kiulongthsürübonü alibe kilim atu tüsho arü khah ching sho shuhbah arü.

¹⁹ Judüki alibenü api ju apho kheak mühüma yapshih, tüsho mihtsürü khülang jia akuyü athsün thüne hüta bahshih. Jushu alibenü api thsümüchipü tankih, tümüde api sühmüh mülade kam.

²⁰ Tüsho alibenü tha, “Samson! Filistiarü arüchoh.” Jumonü apinü ayapkhi chingnü asürü, tüsho tha, “Püpüki nangde inü awukhiukbah tüsho zuzu thsüde aphapbah!” Tüshe Atungpuh api kheaknü chamachihdo de apinü mümükheah.

²¹ Judüki Filistiarünü api rambah amükjibo khünkhit tüsho Gaza ching bede yü. Arünü api müwayinchi liunü rhük, tüsho rihyam ching hi churü kamabah.

²² Judüalalashe, api kuyü hüta bahshu chinlode arü.

Samson Shekhi

²³ Kheakü Filistia kiulongthsürübo arü thrünpuh Dagon kilim laksah-a kingaünkhi ato jihpü tüsho asühachihpü mukhung. Tüsho arünü tha, “Isa thrünpuhnü isa riri Samson isa khah ching jihdo!”

²⁴ Küyimki mihtsürübonü api ngükhea, arünü arü thrünpuh shijih; tümüde arünü tha, “Isa thrünpuhnü isa riri, isa lomi thsümünimrü, tüsho isa hihde asheshihrü isa khah ching jihdo.”

²⁵ Junangde küyimki arü mulong asühde alakheanü, arünü tha, “Samson jiang, junangde apinü isa ki kithsükilangbah.” Jumonü arünü rihyam chingnü Samson ji, tüsho apinü arü ki kithsükilang. Arünü api dungjing mahne dükeak zhipshih.

²⁶ Judüki Samsonnü api khah kheak thobah atsahkhi azübuh ki tha, “Inü arüngyam duhlokhi dungjingbo qiuanü, junangde I jurü kheak angülobah.”

²⁷ Kheakü arüngyam ju athrürü tüsho aliberübonü mia lakheah; Filistia kiulongthsürü phüngü alala ju ching lakheah. Samson kithsükilang kheahrü athrürü tüsho aliberü 3000 bande thüyam kheak lakheah.

²⁸ Judüki Samsonnü Atungpuh ki jide tha, “O Atungpuh T HRÜNPU H , I lümkhitang, inü tamkhüntamnüchoh! Khülang ki I sühmüh düküngshang, inü tamkhüntamnüchoh, O Thrünpuh, junangde khülang ki nimkhinü I mükji mahne thsungkheak Filistiarü kheak royimbah!”

²⁹ Tüsho Samsonnü arüngyam phulung duhlokhi dungjing mahne ki yü, tüsho khülang tsülim tüsho püpü huzulim thsübah düngde tholo.

³⁰ Judüki Samsonnü tha, “I Filistiarü lungnü sheanü!” Apinü asühmüh alalanü nim tüsho arüngyam ju kiulongthsürübo le mihtsürü ju ching larü alala kheak keam. Junangde api shechoki laksahkhi ju anihbuh rhangdung lachoki laksahkhi kheaknü ahihbe lakheah.

³¹ Api keoniorü tüsho abuh yamkhün alala akibah api lude wutubah abuh Manoa kiuyuk ching Zora tüsho Eshtaol dükeak kiuyukabah. Apinü Israel kam muku mahkhap.