MAHKHAPRÜ 10 - AMÜSÜH HÜM CL Bible (BSI)

Tola

¹ Abimelek dunglim Israel khümkhitpü Issakar mihtsürü Dodo tsührü Pua tsührü Tola asürü; tüsho api Ephraim wungbo, Shamir ching lakheah.

² Apinü Israel kam mukukheak mahsam mahkhap; api sheabah tüsho Shamir ching kiuyukabah.

Jair

³ Api dunglim Gileadrü Jair asürü; tüsho apinü Israel kam mukukheak mahne mahkhap.

⁴ Kheakü api tsührü donki samrü kheak binrü samrü lakheah; arü kiuto samrü, “ Havoth Jair” de khihni khiungde ajihkhi, Gilead lo ching lakheah.

⁵ Jair she tüsho Kamon ching kiuyukabah.

Jephtha

⁶ Judüki Israelrünü kheaküshe Atungpuh miki amütsü rhimo, tüsho Baalbo, Astarbo, Siria thrünpuhbo, Sidon thrünpuhbo, Moab thrünpuhbo, Amon thrünpuhbo tüsho Filistia thrünpuhbo tankih; arünü Atungpuh bahyuk tüsho api mütankih.

⁷ Jumonü Israel azhihde Atungpuh bukakhiuk; tüsho apinü arübo Filistia le Amon mihtsürü khah ching yinabah.

⁸ Ju kam ching arünü Israelrü alala Gilead ching lakhi, Amorrü lomi ching Jordan thripkhüh lakhi kam thürükheak tizheah thsümüchi tüsho juno.

⁹ Kheaküshe Amon mihtsürünü Juda, Benjamin tüsho Ephraim yamkhün bede keochihpü Jordan hode arü, junangde Israel khitode lümthsünüde alakheah.

¹⁰ Tüsho Israelrünü Atungpuh ki zhide tha, “Isanü nü azhihde neak yihbeakdo, tümütüsho isanü isa Thrünpuh bahyuk tüsho Baalbo tankih!”

¹¹ Jumonü Atungpuhnü Israelrü ki tha, “Inü nüsa Ijiprü, Amorrü, Amonrü tüsho Filistiarü kheaknü abekhitkhi yung de?

¹² Kheaküshe Sidonrü, Amalekrü, tüsho Maonrünü nüsa juno; nüsanü I ki zhi tüsho inü arü khah chingnü nüsa bekhit.

¹³ Tütüshe nüsanü I bahyuk tüsho püpürü thrünpuhbo tankih. Jumonü kheaküa inü nüsa mübekhit.

¹⁴ Nüsanü amokhitkhi thrünpuhbo ki yübah zhiang; nüsa lümthsünü kim ching arünü nüsa bekhitshang.”

¹⁵ Judüki Israelrünü Atungpuh ki tha, “Isanü neak yihbeakdo! Nünü atsükhi isa kheak rhimoang; khihni isa lang bekhitang, isanü tamkhüntamnüchoh.”

¹⁶ Jumonü arünü khiungkerü thrünpuhbo arü bolungnü yihkhita bah tüsho A TUN GPU H tankih. Tüsho Israel thsünükhi apinü küruhkhüh marümkheamde alakheah.

¹⁷ Judüki Amon mihtsürübo rukhüh mukhungde Gilead ching arü. Tüsho Israelrünü Mizpa ching mukhung.

¹⁸ Tüsho mihtsürübo, Gilead limberübonü khülangnü khülang ki thaachih, “ Amon mihtsürü bede keochihpü shepü mihtsürünü atankihba? Api Gilead ching larü alala kurungkheak aku labah.”