MAHKHAPRÜ 1 - AMÜSÜH HÜM CL Bible (BSI)

Juda tüsho Simeon Trüknü Adonibezek Tholokhi

¹ Jihusua she dunglim Israelrünü Atungpuh ki keo, “Isa thsung thsüde she akhuhde yübah Kananrübo azhihde thirithsüba?”

² Atungpuhnü tha, “ Juda wutubah. Inü alo ju api khah ching jihabahdo.”

³ Tüsho Judanü aniurü Simeon ki tha, “I kilim akhukhita jihkhi lomi ching I lung arang, tüsho isanü Kananrübo bebah thirithsübah. Tüsho inü she nüsa lung nüsa kilim akhukhita jihkhi lomi ching arübah.” Jumonü Simeonnü api lung yü.

⁴ Judüki Judanü yü tüsho Atungpuhnü Kananrübo le Perizrübo arü khah ching jih, tüsho arünü Bezek ching arü 10,000 laksah.

⁵ Kheaküshe arünü Bezek ching Adonibezek ngü, tüsho api bede keochih, tüsho Kananrü le Perizrübo kuk.

⁶ Adonibezeknü alihde tso; tüshe arünü api müshamde yü, tüsho ramlobah api khahkutopü le jingkutopü khapshakjih.

⁷ Tüsho Adonibezeknü tha, “ Kiulongthsürü 70 arü khahkutopü le jingkutopübo khapshakbah I dükhüm bukkhüp adütrebo moa lude lado; kheakü inü tümü rhimokheanü Thrünpuhnü I kilim jihlochoh.” Arünü api Jirusalem ching bebah arü, tüsho api ju ching sheabah.

⁸ Juda mihtsürübonü Jirusalem azhihde keochih, tüsho nukshangnü laksahde ju luabah tüsho kiuto kheak mo thsahkihjih.

⁹ Ju dunglim Juda mihtsürübonü Negeb awung lomi ching larübo tüsho adükhün lo ching larü Kananrübo bede thirithsüpü yüki.

¹⁰ Tüsho Judarünü Kananrübo Hebron (atankih mung Kiriath-arba de ji) ching larübo azhihde yü. Tüsho arünü Sheshai, Ahiman tüsho Talmai laksah.

¹¹ Ju chingnü arünü Debir ching larübo azhihde yü (Debir mung ju atankih a Kiriath-sepher lakheah.)

¹² Tüsho Kalebnü tha, “Shepünü Kiriath-sepher yankhitbanü tüsho alubanü api kilim I tsührübe Aksa api yamkhünbe thsüpü jihbah.”

¹³ Kenaz tsührü Kaleb niurü Othnielnü ha lu; tüsho apinü anihbuh kilim atsührübe Aksa ayamkhünbe thsüpü jih.

¹⁴ Küyimki anihbe api kilim arükhea, anihbenü api ki tuthsuka abuh ki thulu khülang kheangshih; tüsho alibenü api khora kheaknü aki tüsho Kalebnü alibe ki tha, “Nünü tümü lunela?”

¹⁵ Alibenü api ki tha, “Nünü I Negeb lo ching lashihla le kenü I kilim thsambah jihang.” Tüsho Kalebnü alibe kilim akube tüsho abobe kenü ju jih.

¹⁶ Kheakü Kenrü tsühsoniuso Mosa akü Hobab ju ashidung kiuto chingnü Juda mihtsürübo bebah Arad phüni Negeb ching lakhi Juda sunglo ching wutu. Tüsho arünü yübah Amalekrü lung laabah.

¹⁷ Tüsho Judanü aniurü Simeon lung yü tüsho Zephath ching larü Kananrü yande shahde dükheakshih. Jumonü kiuto mung ju Horma de ji.

¹⁸ Judanü Gaza, Ashkelon tüsho Ekron lomibo she luabah.

¹⁹ Junangde Atungpuh Juda lung lakheah. Tüsho arünü müzüng lomi ching larü alala yankhitabah, tüshe arünü lokeam ching larübo a müyankhitkhuk tümütüsho arübo yinchi khora-lolungbebo lakheah.

²⁰ Tüsho Mosanü athakhi nangde arünü Kaleb kilim Hebron jih; tüsho apinü ha chingnü Anak tsührü mahsam yankhitabah.

²¹ Tüshe Benjamin tsührübonü Jirusalem ching lakhi Jebusrü yankhita mübah; jumonü khihni khiungde Jebusrü ju Benjaminrü lung Jirusalem hing lah.

²² Tüshe Josep tsührübonü Bethel azhihde wutu; tüsho Atungpuh arü lung lakheah.

²³ Jumonü Josep yamkhünnü Bethel züta kheahshihpü mihtsürübo yüshih. (Kiuto mung ju atankih ching a Luz lakheah.)

²⁴ Küyimki kiuto chingnü mihtsürü khülang akhiukde thirirhurübonü angükhea, arünü api ki tha, “ Kiuto ching yüzahpü limro isa ki huhang, tüsho isanü nü ki muzhode arhimobah.”

²⁵ Jumonü apinü kiuto ching yüzahpü limro arü ki huh; tüsho arünü nukshangnü kiuto ching larübo laksah, tüshe ju buh mihtsürü tüsho api betsührübo a tsoshih.

²⁶ Jumonü ju buh mihtsürü ju Hitrü lomi ching yübah kiuto khülang thrün tüsho ju mung Luz de ji; ju mung khihni khiungde lah.

²⁷ Manaserünü Beth-shan ching larü tüsho kiulongbo yungsho Taanak tüsho ju kiulongbo, yungsho Dor ching larü tüsho ju kiulongbo, yungsho Megiddo ching larü tüsho ju kiulongbo ching larü müyankhit; tüshe Kananrünü mutuklode ju ching la.

²⁸ Küyimki Israelrü müküpde akamkhea, arünü Kananrü ju reangkih-a rhimoshih tüshe arü yankhita mübah.

²⁹ Tüsho Ephraimnü Gezer ching larü Kananrü yankhita mübah; tüshe Kananrü Gezer ching arü lung la.

³⁰ Zebulunnü Kitron ching larübo yungsho Nahalal ching larü yankhita mübah; tüshe Kananrü arü lung la, tüsho reangkih-a rhimoshihde la.

³¹ Ashernü Ako, yungsho Sidon, yungsho Alap, yungsho Akzib, yungsho Helba, yungsho Aphek, yungsho Rehob ching larübo yankhita mübah;

³² tüshe Asherrü a lomi ching larü lung la; tümütüsho arünü arübo yankhita mübah.

³³ Naphtalinü Beth-shemesh ching larü yungsho Beth-anath ching larü yankhita mübah, tüshe lomi ching larü Kananrü lung la; tütüshe arü thsungkheaknü arübo reangkih-a rhimoshih.

³⁴ Tüsho Amorrünü Danrü ju thsungkih-a müzüng lomi ching yüshih, tümütüsho arünü arübo ju adükhün ching akishihpü mümülü.

³⁵ Amorrünü Aijalon ching lakhi Heres Müzüng tüsho Shaalbim ching mutuklode la; tüshe Josep yamkhün khah müküpde la, tüsho arü reangkih-a rhimoshihde la.

³⁶ Kheakü Amorrü aredung ju Sela chingnü Akrabbim wutu lim akulim peang ah.