LUKNÜ ATHRÜTKHI THIYUSHEAK-ATSÜ HUHTANYU 4 - AMÜSÜH HÜM CL Bible (BSI)

Jisu Rükakikhi

¹ Judüki Jisu Amüsüh Menü mide Jordan chingnü arülo tüsho Menü sunglo ching bede yübah

² arimrinü nimung yirü rükaki. Jurü nimungbo ching apinü tümü she mütsüh, tüsho jurü kheamabahshu, api khümde alakheah.

³ Arimrinü api ki tha, “Nü Thrünpuh tsührü a sho, ha lung yikhap kampü thiyukhüm jihang.”

⁴ Tüsho Jisunü api ki alo, “Ha thrüta lah, ‘Mihtsürü ju yikhapnü lang rhangdung müla.’”

⁵ Tüsho arimrinü sühkhühnü api bebah awung achang kheak yükih. Tüsho alomi kiulongthsübo alala api ki huh,

⁶ tüsho api ki tha, “Nü kilim inü ha thiyukhüm-sühmüh tüsho arü müretah alala jibah; tümüde ha I kilim jih-a lah, tüsho inü amulungrü kilim ju jihbah.

⁷ Jumonü nünü I kingaünsho alala nü yo thsübah.”

⁸ Jisunü api ki alo, “Ha thrüta lah, ‘Nünü Atungpuh nü Thrünpuh kingaünang, tüsho api lang tankihang.’ ”

⁹ Tüsho apinü Jirusalem lim api bede yü, tüsho arüngyam mün kheak binshih, tüsho tha, “Nü Thrünpuh tsührü a sho, nü küdah thsüde ju kheaknü jukkhiang;

¹⁰ tümüde ha thrüta lah, ‘Apinü nü kümshihpü api yunirübo ki thiyukhüm jihbah;

¹¹ arü khah ching nü shuh-a lubah, junangde lungbo kheaknü nü jing mütrünthsü.’ ”

¹² Tüsho Jisunü api ki alo, “Ha thaa lah, ‘Nünü Atungpuh nü Thrünpuh rükdaki.’ ”

¹³ Küyimki arimrinü rükakipü alala arün thsükhea, kim mukhiungyi khiungde api kheaknü chamachih.

Jisunü Galilee ching Rhimo Tankihkhi

¹⁴ Judüki Jisu ju Me wu chingnü Galilee lim alodarü, tüsho api dünkheak thiyusheak lomi alala ching yü.

¹⁵ Apinü arü yo sinagogbo ching thsangyu, tüsho alalanü api shijih.

Nazareth ching Jisu Bahyukkhi

¹⁶ Apinü anihbuh zode asürüpung Nazareth ching yü, tüsho apinü rhimode alakhi nangde Amuni sinagog ching yüzah. Tüsho apinü akhepü wusu.

¹⁷ Ju ching api kilim wukihrü Isaia hüm jih. Apinü hüm ju khimshuh tüsho ha thrüta lakhi dangpung ngü,

¹⁸ “Atungpuh Me I kheak lah tümütüsho zhochihrü ki thiyusheak atsü thsangyuthsangrapü apinü I mujude-müsühkhit. Apinü I aramrübo dükhepü zhiyukpü tüsho müktukrü ngüshihpü, junoa larü zuzu kamshihpü,

¹⁹ tüsho Atungpuhnü amulungkhi kam zhiyukpü thiyi.”

²⁰ Apinü hüm ju khiudo, tüsho api tankihbuh kilim jihlobah bin; tüsho sinagog ching alalanü mük mathrapde api kheak kheahkih.

²¹ Tüsho apinü arü ki thapü tankih, “Khihni nüsanü sode ha amüsühyu dünjido.”

²² Alalanü api dünkheak tsüde asuk, tüsho api mün chingnü akhiukkhi amuzho yubo ju müyinsah; tüsho arünü tha, “Ha Josep tsührü yung de?”

²³ Tüsho apinü arü ki tha, “Tsükjide nüsanü ha müchityu wuh-a thabah, ‘Thümürü, nü küdah thsüde thsünguang; nünü Kapernaum ching tümü rhimokhi isanü asokheanü, nü kiuto ha ching she rhimoang.’ ”

²⁴ Tüsho apinü tha, “Atsütsü inü nüsa ki thachoh, wukihrü sheshe nihbuh lomi ching a müleangkhichoh.

²⁵ Tüshe thiyuronü, inü nüsa ki thachoh, kam mahsam kheak khinu thuruk thüning khimdobah alomi alala ching khümzung arükhi Elija nimungbo ching Israel ching khimoberü ahihkhüh lakheah;

²⁶ tüsho Elija ju püpürü kilim yung tüshe Sidon lomi ching khimoberü khülang Zarephat kilim lang ayüshihkheah.

²⁷ Wukihrü Elija kim ching Israel ching aphamrü ahihkhüh lakheah; tüsho arü sheshe mümüsühkhit; tüshe Siriarü Naaman lang ah.”

²⁸ Küyimki arünü ha sokhea, sinagog ching larü alalanü bukakhiuk.

²⁹ Arünü wusubah kiuto chingnü api yankhit, tüsho lungrhün ching api jipkhia bahpü thsüde arü kiuto thrüna lakhi awung mujuk kheak bede yü.

³⁰ Tüshe mihtsürü bolung hode yübah apinü tsoabah.

Amünean Me lakhi Mihtsürü

³¹ Apinü Galilee kiuto Kapernaum ching yüki. Tüsho apinü Amuni arü ki thsangyude alakheah;

³² tüsho apinü thsangyukhi ching arünü müyinsah tümüde apinü thiyukhüm-sühmüh lade tha.

³³ Tüsho sinagog ching ju amünean me lakhi mihtsürü khülang lakheah; tüsho apinü düsheak achangnü zhi,

³⁴ “Ah! Nazarethrü Jisu, nünü isa kheak tümü thsüba? Nü isa dükheakshihpü arükhea de? Nü sheanü inü mükheahlah–Israel Thrünpuh yo Amüsüh Khülang ah.”

³⁵ Tüshe Jisunü api thürühde tha, “Dalan, tüsho api kheaknü akhiukang!” Judüki amüneannü mihtsürü ju arü alala miki jipa bah tüsho api mütrünthsüde akhiukabah.

³⁶ Arü alalanü müyinsah tüsho khülangnü khülang ki thaachih, “Ha tümü yu a? Tümüde thiyukhüm-sühmüh tüsho wunü apinü amünean mebo thiyukhüm jihchoh, tüsho arünü akhiukchoh.”

³⁷ Tüsho api dünkheak thiyusheakbo ju mühi lomi dangpung alala ching yü.

Mihtsürü Ahihkhüh Thsüngukhi

³⁸ Apinü wusu tüsho sinagog chingnü chamachihbah Simeon yam ching yüzah. Kheakü anihbuh ani phütsaknü tukthsüde alakheah, tüsho arünü alibe rungshihpü api ki tha.

³⁹ Apinü yübah alibe ki zhipbah phütsak ju thürüh, tüsho anihbe kheaknü tsoabah; tüsho alibenü nahdü lang wusubah arü mozümodoa kip.

⁴⁰ Küyimki ani yüzahde alakhea, tukthsü aphuaphu larü api kilim bedarü; tüsho apinü arü aban kheak akhah nimkih tüsho arübo thsüngu.

⁴¹ Tüsho amüneanbo she arü ahihkhüh chingnü zhide akhiuk, “Nü Thrünpuh tsührü ah!” Tüshe apinü arü thürüh, tüsho athapü arü ki mümülü, tümütüsho api ju Khrista ah de arünü mükheah.

Jisunü Sinagogbo ching Thsangyuthsangrakhi

⁴² Küyimki ayinkhikhea, apinü chamachih tüsho amükhing dangpung khülang ching yü. Mihtsürübonü api yimde arü, tüsho arünü api mutsoshih;

⁴³ tüshe apinü arü ki tha, “Inü ha Thrünpuh kiulongthsü thiyusheak atsü püpürü kiutobo ching she thsangyuthsangrabeah; tümüde ha thsungkheak I thiyikheah.”

⁴⁴ Tüsho apinü Judea sinagogbo ching thsangyuthsangrade alakheah.