LUKNÜ ATHRÜTKHI THIYUSHEAK-ATSÜ HUHTANYU 24 - AMÜSÜH HÜM CL Bible (BSI)

Arhang Kamlokhi

¹ Kheakü amu-khip akhuhbe nimung, yapsu mükikde, arü le püpürü liberübo arünü athsakhamkhi thüneathürabebo lubah kiuyuk ching ju yü.

² Lungto ju kiuyuk kheaknü lah-a bahkhi arünü ngü,

³ tüshe küyimki arü yüzahkhea, Atungpuh Jisu pang müngü.

⁴ Tüsho arü khide lümshangmangde alachoki, azhingzhing khimmih yihbah mihtsürü mahne arü miki zhip.

⁵ Judüki arünü trede arü miro alo lim mükhümchoki, anenü arü ki tha, “Tümüde nüsanü asherü bolung arhang larü yimcho?

⁶ Api ha ching müla, tüshe arhang kamlodo! Api Galilee ching lachoki künangde apinü nüsa ki thakheanü lümkhitang,

⁷ ‘Mihtsürü Tsührü ju aneakrü mihtsürü khah ching jihbah ayümkihbah, tüsho asam nipü arhang kamlobah.’ ”

⁸ Tüsho arünü api yubo lümkhit.

⁹ Judüki arünü kiuyuk chingnü alode arübah harü alala thürükheak khülang le aningkhibo ki tha.

¹⁰ Amüsüh-thsangyurübo ki harü tharübo ju Mari Magdalen, Joanna, Jakob abe Mari tüsho arü lung püpürü liberübo lakheah.

¹¹ Tüshe thiyubo ju arü ki makhakhi yu nangde alakheah, tüsho arünü ju akin müla.

¹² Tüshe Peternü wusubah kiuyuk lim alihde yü; tüsho ahingbe khimthünak lang yapde apinü mükhümbah ngü; tüsho ju dünjikhi müyinsahde apinü tsoabah.

Emmaus Limro Tsahkhi

¹³ Kheakü ju nimung Jirusalem chingnü mail 7 bankhi kiulong khülang Emmaus lim mihtsürü mahne yüde alakheah.

¹⁴ Tüsho anenü adünjikhi harü alala asukachih.

¹⁵ Anenü harü dünkheak thaachihde tüsho asukachihde alachoki, Jisunü arübah ane lung tsah;

¹⁶ tüshe ane müknü api mükheahkhitpü thsüde alakheah.

¹⁷ Tüsho apinü ane ki tha, “Nüke thaachihde atsahkhi ju tümü a tüsho tümüde mulong tukthsüla?”

¹⁸ Judüki ane bolung khülang amung Kleopanü api ki alo, “Nü lang Jirusalem ching hanrü a de, tüsho khihnishido dünjikhibo nünü mümükheahkhea de?”

¹⁹ Tüsho apinü ane ki tha, “Tümü pürü?” Tüsho anenü api ki alo, “Nazarethrü Jisu dünkheak, shepü Thrünpuh tüsho mihtsürü alala miki rhimo le thiyu ching wuto lakhea,

²⁰ tüsho amükeam putungrübo le isa yakzanshuhrübonü api bahyukde asheshihpü tüsho ayümkihshihpü jih.

²¹ Tüshe Israel rhokhitpü lakhi ju api ah de isanü mulonglamde alakheah. Tüsho kheaküshe ha alala dünjibah khihni mahsam nipü thsüchoh.

²² Am, aliberübo khürünü mükikde kiuyuk ki arübah isa müyinsahshih.

²³ Küyimki arünü api pang müngükhea, yunirübonü api arhang lah de athakhi michih isa ki thade arü.

²⁴ Tüsho isa lung lakhi khürünü kiuyuk ching yü tüsho aliberübonü athakhi nangde ju ngü; tüshe arünü api müngü.”

²⁵ Judüki apinü ane ki tha, “O makharübo, tüsho wukihrü alalanü athakhi kinpü müniokheamkhi mulong!

²⁶ Khristanü harü thsünübah api müretahkhi ching müyüzahbea de?”

²⁷ Tüsho Mosa le wukihrübo kheaknü tankihbah amüsühyu alala ching anihbuh dünkheak ane ki thanaka huh.

²⁸ Arübo arü yüde alakhi kiulong khiungchoki limshude ayüpü nangde Jisunü thsüa huh.

²⁹ Tüshe anenü api ki müküpde thsungkih, “Ike lung binang, tümüde azhingpü thsüchoh; nimung hodo.” Jumonü apinü ane lung binpü yü.

³⁰ Küyimki api ju ane lung dükhüm ki binde alakhea, apinü yikhap lubah makshe jih tüsho yihnakbah ane kilim jih.

³¹ Judüki ane mük khimshuh tüsho anenü api mükheahde kam; tüsho ane mük kinü api dükheakabah.

³² Tüsho ane khülangnü khülang ki thaachih, “Apinü limro ching ike ki thiyu thachoki tüsho ike ki apinü amüsühyubo khimshuhchoki ike mulong alunglim maniukhea de?”

³³ Jumonü anenü ju kim chingnü tsahmusubah Jirusalem lim alode yü, tüsho thürükheak khülang lung püpürü mukhunga ngü,

³⁴ tüsho tha, “Atsütsü Atungpuh arhang kamloa lah, tüsho Simon ki akhiuka huhdo!”

³⁵ Tüsho limro ching dünjikhi le yikhap yihnakchoki anenü api mükheahkhi alala arü ki thaa huh.

Jisu Api Jingyanrübo ki Akhiukkhi

³⁶ Kheakü arübo harü thade alachoki, Jisunü arü bolung zhipbah tha, “Nüsa lung mungtsü laang.”

³⁷ Tüshe arübo müyinnim tüsho trede kam, tüsho arünü me khülang ngükhi nangde alakheah.

³⁸ Tüsho apinü arü ki tha, “Tümüde nüsa küpkhukcho? Tüsho tümüde nüsa mulong ching dukiuhlocho?

³⁹ I khahbo le I jingbo kheahang, ha I ah. I qiuang tüsho kheahang, tümütüsho nüsanü I ngükhi nangde me khülang a shihtsü tüsho robo mülachoh.”

⁴⁰ Küyimki apinü ha thakhamkheanü arü ki akhahbo tüsho ajing huh.

⁴¹ Tüshe küyimki arünü asühachihde tüsho amüyinsahkhinü kheaküshe ju mükinkhea, apinü arü ki tha, “Ha ching nüsa tsühyungbe khürü la shi?”

⁴² Jumonü arünü api kilim thüngüh ayimünkhi khülang jih,

⁴³ tüsho apinü ju lubah arü mikinü tsüh.

⁴⁴ Judüki apinü arü ki tha, “Harü ha I nüsa lung lachoki inü nüsa ki, Mosa yakzan tüsho Wukihrübo le Mungshikhünbo ching I dünkheak thaa lakhi alala dünjibah de athakhibo lah.”

⁴⁵ Tüsho arünü amüsühyubo anikhitpü thsüde apinü arü lümkhi khimshuhjih.

⁴⁶ Judüki apinü arü ki tha, “Ha thrüta lah, tüsho junangde Khrista ju thsünübah nimung asampü ching arhang kamlopü lakheah,

⁴⁷ junangde mulong müthripü tüsho neak bahpü api mung chingnü Jirusalem chingnü tankihbah trükshih alala ki thsangyuthsangrabah.

⁴⁸ Tüsho harü dünkheak nüsa thiyumütsanbo lah.

⁴⁹ Kheahang, inü I Buhnü alokhikhi nüsa kheak yüshihchoh; tüshe akulimnü nüsa kheak wu marüyi khiungde nüsanü Jirusalem kiuto ching aleangang.”

Jisu Yükihkhi

⁵⁰ Apinü Bethani khiungde arü bede wukhiuk, tüsho api khahbo shuhkihbah arü müngühjih.

⁵¹ Küyimki apinü arü müngühjihkhea, arü kinü api chamachih tüsho yinmi lim bede yükih.

⁵² Arünü api kingaün tüsho asühachihde Jirusalem lim alodarü;

⁵³ tüsho mutuklode arüngyam ching Thrünpuh shijihde alakheah.