LUKNÜ ATHRÜTKHI THIYUSHEAK-ATSÜ HUHTANYU 23 - AMÜSÜH HÜM CL Bible (BSI)

Pilat Miki Jisu Bedarükhi

¹ Judüki boto alala tsahmusu tüsho Pilat miki api bedarü.

² Tüsho arünü api chikhide athapü tankih, “Ha buhnü trükshih bemüchihkhi isanü ngüdo, tüsho api ju Khrista, kiulongthsüpuh de thade Kaesar kilim ruk jihpü tukloshihdo.”

³ Jumonü Pilatnü api ki keokhi, “Nü Jihudarü kiulongthsüpuh a de?” Tüsho apinü anihbuh ki alo, “Nünü athakhi nangde ah.”

⁴ Judüki Pilatnü amükeam putungrübo tüsho boto ki tha, “Inü ha mihtsürü kheak amülim tümü müyimkhit.”

⁵ Tüshe arünü alü mulong zhipzhipde tha, “Apinü Judea alala, Galilee chingnü ha dangpung khiungde thsangyude mihtsürübo thurumusuchoh.”

Herod kilim Jisu Yüshihkhi

⁶ Küyimki Pilatnü ha sokhea, mihtsürü ju Galileerü a shi de keokhi.

⁷ Tüsho api ju Herod bukkhüp ah de apinü mükheah akede, anihbuhnü api ju, ju kim ching Jirusalem ching labuh Herod kilim yüshih.

⁸ Küyimki Herodnü Jisu ngükhea, apinü khide asüh; tümüde kim ashang chingnü apinü anihbuh ngüpü künde la, tümütüsho api dünkheak ahihdo so, tüsho apinü khinthiyinbe rhimokhi ngüpü mükin thsü.

⁹ Judüki apinü anihbuh ki thiyu ahihdo keokhi, tüshe api ki tümü malojih.

¹⁰ Tüsho amükeam putungrübo le yakzan thsangyurübonü zhipbah api khide chikhi.

¹¹ Judüki Herod tüsho api bonungrübonü api luhmünede mükhemükim thsü; tüsho api kheak khimmih atsü yihkihjihbah Pilat kilim yüloshih.

¹² Ju nimungnü Pilat le Herod büne müyamrü kam, tümüde akhuhlima ane thiriri lakheah.

Jisu Sheshihkhi

¹³ Küyimki Pilatnü amükeam putungrübo, yakzanshuhrübo, tüsho mihtsürübo rukhüh jimukhungkheanü,

¹⁴ arü ki tha, “Nüsanü ha buhnü mihtsürübo bemüchihchoh de I kilim bedarü. Tüsho nüsa mikinü api ajamakheahbah nüsanü api chikhikhi dünkheak amülim ha mihtsürü kheak inü müyimkhit;

¹⁵ Herodnü she jude müthsü, tümüde inü nüsa api kilim yüloshih; tüshe ashepü thülünde apinü rhimoa müla.

¹⁶ Jumonü inü api rhapbah adükhebah”–

¹⁷ (tümüde thünio ching apinü arü kilim khülang dükhepü yihnüpü lakheah).

¹⁸ Tüsho arü alalanü zhide tha, “Ha mihtsürü laksahang, tüsho isa kilim Baraba dükheang”–

¹⁹ api ju kiuto ching athsümünimkhi tüsho mihkhukmonü rihyam ching zokheah.

²⁰ Jumonü Pilatnü Jisu dükhepü mulongde kheaküshe arü ki tha;

²¹ tüshe arünü zhide tha, “Api yümkihang, api yümkihang!”

²² Tüsho apinü mahsam kipü arü ki tha, “Tümü thsükhi, apinü amütsü tümü rhimoa la? Inü api kheak ashepü thsüde amütsan tümü müyimkhit. Jumonü inü api rhapbah atsoshihbah.”

²³ Tüshe arünü thsokihde düsheak achangnü api yümkihpü tha. Tüsho harü mihtsürübo le amükeam putungrübo düsheaknü kukabah.

²⁴ Jumonü arünü akheangkhi Pilatnü mülüjih.

²⁵ Arünü amushukhi azhih tüsho mihlaksahrü rihyam ching labuh apinü arü kilim dükhe; tüshe apinü Jisu ju arü mulongkhi ching jihabah.

Jisu Yümkihkhi

²⁶ Kheakü arünü api bede ayüchoki, lomi chingnü arüde alakhi mihtsürü khülang Serenerü Simon tholo tüsho Jisu dunglim hanbah atsahpü api kheak sangkim yihkihjih.

²⁷ Tüsho mihtsürü yimto atonü api dunglim yan tüsho aliberübonü she api thsungkheak tripde tüzho.

²⁸ Tüshe Jisunü arü kilim rholobah tha, “Jirusalem liberübo, I thsungkheak dütrip, tüshe nüsa le nüsa tsührübo thsungkheak tripang.

²⁹ Tümüde arünü athapü nimungbo arüchoh, ‘Bünkeangberü, khungarü müzüberü, tüsho küyimkishe niuh muduhrü müngühmühi!’

³⁰ Judüki arünü müzüngbo ki, ‘Isa kheak keamang!’ tüsho awungbo ki, ‘Isa zhidoang!’ de athapü tankihbah.

³¹ Sangdung phüyakde alachoki harü rhimosho, ju akung lachoki tümü dünjiba?”

³² Ju ching athsümünimrü mahne api lung sheshihpü bedarü.

³³ Tüsho küyimki arübo Kalvari de ajikhi dangpung ching arükhea, ju ching arünü athsümünimrü mahne ju khülang akhah tsülim tüsho püpü ju huzulim thsübah api yümkih.

³⁴ Judüki Jisunü tha, “Abuh, arü neak bahjang, tümütüsho arünü tümü rhimochonü mümükheah.” Tüsho arünü azan thsüde api khimmihbo chama lu.

³⁵ Tüsho mihtsürübonü kheahde zhip. Tüshe yakzanshuhrübonü she luhmünede tha, “Apinü mührü khümkhitdo; api Thrünpuhnü amokhitkhi Khrista a sho aküdah thsüde khümkhitshang.”

³⁶ Tüsho bonungrübonü she api mükhemükimde arübah asan ke duh,

³⁷ tüsho tha, “Nü Jihudarü kiulongthsüpuh a sho, nü küdah thsüde khümkhitang.”

³⁸ Tüsho api kumung Greek, Latin, tüsho Ibri yunü thrüta zo: Ha jihudarü kiulongthsüpuh.

³⁹ Judüki yümkih-a lakhi athsümünimrü lung khülangnü api mükhemükimde tha, “Nü Khrista a sho, nü tüsho ike khümkhitang.”

⁴⁰ Tüshe püpü junü api thürühde alode tha, “Nü rukhüh ashepü ching lah de ngübah, nünü Thrünpuh mütre de?

⁴¹ Ike a lungkide thsümüchido, tümüde ikenü arhimokhi dün ike thsambah leangkhichoh; tüshe ha mihtsürünü amülim tümü mürhimo.”

⁴² Judüki apinü Jisu ki tha, “Atungpuh, nü kiulongthsü ching nü arüchoki I lümkhitang.”

⁴³ Tüsho Jisunü api ki tha, “Atsütsü inü nü ki thachoh, khihni nü I lung asühpung ching labah.”

Jisu Shekhi

⁴⁴ Kheakü 12 king ngüm lakheah, tüsho 3 king khiungde alomi alala ching amiting lakheah.

⁴⁵ Judüki ani mitingde kam, tüsho arüngyam zhindokhim mahne thsüde thorüp.

⁴⁶ Jisunü düsheak achangnü zhide tha, “Abuh, nü khah ching I me zojihchoh.” Tüsho ha thabah api sheak kheamabah.

⁴⁷ Kheakü küyimki bonungrü torünü ju dünjikhi ngükhea, apinü Thrünpuh shijihde tha, “Atsütsü ha thiyuro-lungki mihtsürü thsüa lah!”

⁴⁸ Tüsho ju ching mukhungkhi boto alalanü ju dünjikhi ngübah arü khühbo yüm tüsho alode tso.

⁴⁹ Tüshe api müyamrü alala Galilee chingnü api dunglim yande arükhi aliberübo jurübo kheahde limshu ching zhip.

Jisu Mi Bahkhi

⁵⁰ Tüsho kheahang, kiuthsübinkiu ching kheyukrü, mihtsürü atsü tüsho thiyuro larü amung Josep lakheah.

⁵¹ Apinü arü kiuthsübinkiunü pungkhikhi ching mümulungde alakheah. Api ju Jihudarü kiuto Arimathea chingnü ah tüsho api she Thrünpuh kiulongthsü aleangde alakheah.

⁵² Ha mihtsürünü Pilat ki yü tüsho Jisu mi dünkheak keokhi.

⁵³ Jushu apinü ju yihkhibah khimthünak chingnü hing tüsho püpü ki she müyapkhi lungnü akiukhi kung ching yapshih.

⁵⁴ Ju nimung ju athsakhampü tüsho Amuni khiungde alakheah.

⁵⁵ Tüsho Galilee chingnü api dunglim arürü aliberübonü api yan, tüsho arünü kiuyuk le api pang yapkhi kheahyuka zo.

⁵⁶ Jushu arünü alode arübah thüneathürabebo tüsho rhümthünea müdangkebo thsakham. Tüsho arünü thiyuzüng yande Amuni sühakhim.