LUKNÜ ATHRÜTKHI THIYUSHEAK-ATSÜ HUHTANYU 22 - AMÜSÜH HÜM CL Bible (BSI)

Jisu azhihde Rük Yimkhi

¹ Kheakü phungho-thünio de ajikhi phaüm muyukkhi yikhap thünio khiungde arü.

² Tüsho amükeam putungrübo tüsho yakzan thsangyurübonü api laksahpü rük yim, tümüde arünü mihtsürübo trede alakheah.

³ Judüki thürükheak mahne bolung Iskariot de ajikhi Juda kheak Arimri yüzah.

⁴ Judanü amükeam putungrü tüsho arüngyam aheangrü torübo kilim yü tüsho apinü künangde Jisu yinatsühbanü arü ki asukachih-a lu.

⁵ Arünü asüh tüsho api kilim sho jihpü mulongkhit.

⁶ Judüki apinü alokhi tüsho boto mülachoki arü kilim api yinatsühpü adükeak yim.

Phungho-thünio Thsakhamkhi

⁷ Judüki phungho-thünio namfimihnunu laksahpü phaüm muyukkhi nimung arü.

⁸ Tüsho apinü Peter le Johan yüshihde tha, “Yüang tüsho isanü atsühpü thsüde phunghothünio isa thsungkheak thsakhamamg.”

⁹ Jumonü anenü api ki tha, “Nünü ike kükheak thsakhamshihnela?”

¹⁰ Apinü ane ki tha, “Kheahang, küyimki nüke kiuto ching yüzahbanü, kephüh shuhbah mihtsürü khülangnü nüke shorubah; api yüzahpung ching api dunglim yande yüzahang.

¹¹ Jushu nükenü thüyam putungrü ki thabah, ‘Thsangyurünü nü ki thachoh, “Inü I jingyanrübo bebah phungho-thünio tsühpü hanyam khiungshak küching la?”’

¹² Judüki apinü nüke ki phezhingzhinga lakhi akube khiungshak ato khülang huhbah.”

¹³ Jumonü apinü ane ki thakhi nangde anenü yü tüsho ju ngü, tüsho phungho-thünio thsakham.

Atungpuh Thünio

¹⁴ Tüsho küyimki kim khiungkhea, api le api lung jingyanrü thürükheak mahnenü bin.

¹⁵ Judüki apinü arü ki tha, “I müthsünüyide ha phungho-thünio nüsa lung tsühpü inü mulongdaklah;

¹⁶ tümüde inü nüsa ki thachoh, ha Thrünpuh kiulongthsü ching müdünjiyikia inü kheaküa mütsühlo.”

¹⁷ Judüki apinü pung ju lubah makshe jih, tüsho tha, “Ha luang tüsho nüsa bolung chama luang;

¹⁸ tümüde inü nüsa ki thachoh, Thrünpuh kiulongthsü arükhi khiungde inü kurungaso ke muyung.”

¹⁹ Tüsho apinü yikhap lubah makshe jih tüsho ju yihnakbah arü kilim jihde tha, “Ha nüsa dünkheak jihkhi I pang ah; ha I lümkhitde rhimoang.”

²⁰ Junangde yimtsüh dunglim apinü pung ju she lubah tha, “Ha pung nüsa dünkheak bukkhi I thiyih tangzüng aso ah.

²¹ Tüshe kheahang, I yinatsührü khah dükhüm kheak I lung lah.

²² Atsütsü Mihtsürü Tsührü a akhua zokhi nangde yüchoh, tüshe api yinatsühbuh mihtsürü are!”

²³ Judüki ha rhimopü ju arü shepü laba de arü bolung keokhiachihpü tankih.

Ato dünkheak Atsangachihkhi

²⁴ Tüshe arü bolung shepü atobe a de atsangachihkhi lakheah.

²⁵ Tüsho apinü arü ki tha, “Khiungkerü kiulongthsürübonü arü kurungkheak atungrü thsüchoh, tüsho sherünü arü kurungkheak thiyukhüm-sühmüh ahorichonü ‘arung-jihrü’ de jichoh.

²⁶ Tüshe nüsa bolung a jude yung; ju müthri, nüsa bolung shepü atobeanü akheambuh nangde, tüsho shepünü yakzan shuhchonü anihbuhnü tankihkhi nangde lashang.

²⁷ Shepü atobe a, dükhüm ki binbuh a shi ahiuhakhipbuh a? Dükhüm ki binbuh yung de? Tütüshe I a nüsa lung ahiuhakhipbuh nangde lah.

²⁸ Tüshe I thsümütsü ching mutuklode I lung larü ju nüsa ah.

²⁹ Tüsho I Buhnü I kheak jihkhi nangde inü nüsa kheak kiulongthsü khülang jihchoh,

³⁰ junangde nüsanü I kiulongthsü ching I dükhüm kheak tsühyungbah, tüsho Israel trük thürükheak mahne mahkhapde kiulongthsü-binkiubo kheak binbah.”

Peternü Jisu Malokhipü Thakhi

³¹ Tüsho Atungpuhnü tha, “Simon, Simon! Arimrinü wheat nangde nü ayipü keokhikheah.

³² Tüshe nü akin mayopü thsüde inü nü thsungkheak tamkhüntamnü; tüsho küyimki nü I kilim rholobanü nü keoniorü reangzahshang.”

³³ Tüshe anihbuhnü api ki tha, “Atungpuh, rihyam tüsho ashepü ching I nü lung yüpü thsakhambah lah.”

³⁴ Judüki apinü tha, “Inü nü ki thachoh Peter, nünü I mükheahpü thsüde, nünü mahsam ki malokhiyikia ha nimung thununü mukhung.”

Shoyukpung, Qiuqiu tüsho Nukshang

³⁵ Tüsho apinü arü ki tha, “Küyimki inü nüsa shoyukpung, qiuqiu, tüsho jingkhümpü mulude ayüshihkheanü, nüsa tümükhüh mülakhea shi?” Jumonü arünü alo, “Tümü müla.”

³⁶ Judüki apinü arü ki tha, “Tüshe kheaküa shepü shoyukpung tüsho qiuqiu lanü apinü lushang; tüsho shepü nukshang mülanü apinü nihbuh khimmih yinbah khülang thuloshang.

³⁷ Tümütüsho ha thrüta lakhi ju I kheak dünjibah de inü nüsa ki thachoh: ‘Tüsho api ju athsümünimrü lung kheyuk.’ Tümüde I dünkheaknü thrüta lakhibo adünjipü lah.”

³⁸ Judüki arünü tha, “Atungpuh, kheahang, ha kheak nukshang mahne lah.” Apinü arü ki tha, “Ju suhdo.”

Jisunü Oliv Müzüng kheak Tamkhüntamnükhi

³⁹ Apinü akhiuk, tüsho apinü rhimode alakhi nangde Oliv Müzüng lim yü, tüsho ajingyanrübonü api dunglim yü.

⁴⁰ Küyimki api ju dangpung ching arükhea, apinü arü ki tha, “Rükaki ching müyüzahpü thsüde nüsanü tamkhüntamnüang.”

⁴¹ Tüsho apinü arü kheaknü lunghit 1 bande yübah khukning tüsho tamkhüntamnü,

⁴² “Abuh, ha nü lümkhi thsüsho, ha pung I kheaknü luakhinjang; tütüshe I lümkhi yung, tüshe nü lümkhi thsang.”

⁴³ Judüki yinmi chingnü yunirü khülang api ki akhiukbah anihbuh reangzahshih.

⁴⁴ Tüsho küpkhuk ching, apinü khide mushude tamkhüntamnü. Tüsho api shoke ju alo kheak thiyih ato atsamkhikhi nangde kam.

⁴⁵ Küyimki apinü tamkhüntamnükhi chingnü asürübah ajingyanrübo ki arükhea, arü mulong rozhakde yapa apinü ngü.

⁴⁶ Judüki apinü arü ki tha, “Tümüde nüsanü yapcho? Asürang tüsho tamkhüntamnüang, jude yungsho nüsa rükaki ching yüzahbah.”

Jisu Ramkhi

⁴⁷ Api thiyu thade alachoki boto khülang arü; tüsho thürükheak mahne bolung khülang Juda de ajikhi arü müngüh yü tüsho api müthsüppü Jisu thüninde yü.

⁴⁸ Tüshe Jisunü api ki tha, “Juda, nünü Mihtsürü Tsührü müthsüpde yinatsühcho de?”

⁴⁹ Küyimki api jingyanrübonü adünjipü lakhi ngükhea, arünü api ki tha, “Atungpuh, isanü nukshangnü akiuba shi?”

⁵⁰ Tüsho arü khülangnü achangbe amükeambuh yamlarü nuku thsüpkhijih.

⁵¹ Tüshe Jisunü tha, “Ju lang thsang!” Tüsho apinü mihtsürü nuku ju qiu tüsho api thsüngujih.

⁵² Judüki Jisunü api ki arürü amükeam putungrübo, arüngyam wühkenorübo, tüsho azothsürübo ki tha, “Nukshangbo tüsho shitsobo shuhbah jangkhijangrarü azhihpü nangde nüsa arükhea de?

⁵³ Küyimki I arüngyam ching nimung aban nüsa lung lakhea, nüsanü I rampü mümürang. Tüshe ha nüsa kim, tüsho amiting wu lah.”

Peternü Jisu Malokhikhi

⁵⁴ Judüki api rambah arünü achangbe amükeambuh yam ching bedarü. Tüsho Peternü limshu chingnü thsütde yü.

⁵⁵ Küyimki arünü wungdo ching mo thsübah rukhüh binkhea, Peternü arü bolung bin.

⁵⁶ Api mo ki binchoki, yamlaberü khülangnü api kheak kheahkihbah tha, “Ha mihtsürü she api lung lakheah.”

⁵⁷ Tüshe apinü reanglode tha, “Aliberü, inü api mümükheah.”

⁵⁸ Tüsho anükhüh labah püpürünü api ngübah tha, “Nü she arü lung belah.” Tüshe Peternü tha, “Mihtsürü, I a yung!”

⁵⁹ Jushu kimkhü hobah, püpürübonü mütsande tha, “Tsükjide ha buh she api lung lakheah, tümüde api Galileerü ah.”

⁶⁰ Tüshe Peternü tha, “Mihtsürü, nünü tümü thachonü inü mümükheah!” Tüsho api thiyu thade alachoki zukleangnü thununü khung.

⁶¹ Tüsho Atungpuhnü rholobah Peter kheak kheah. Tüsho Peternü apinü anihbuh ki thakhi yu lümkhit, “Thununü mukhungyiki nünü I mahsam ki reanglobah.”

⁶² Judüki Peternü wukhiuk tüsho düsüknimde trip.

Jisu Mükhemükimkhi tüsho Alakkhi

⁶³ Kheakü mihtsürü sherünü Jisu aheangkheanü api mükhemükim thsü tüsho lak.

⁶⁴ Tüsho amük rümdojihbah, arünü amiro kheak lakde keokhi, “Müchitang! Nü lakcho ha shepü a?”

⁶⁵ Tüsho arünü api azhihde ahihdo tha.

Jisu Kiuthsü-binkiu Miki

⁶⁶ Ayinkhi akede, mihtsürü azothsürübo, amükeam putungrübo tüsho yakzan thsangyurübo rukhüh arübah arü kiuthsü-binkiu ching beyukbah tha,

⁶⁷ “Nü Khrista a de, isa ki thaang.” Tüshe apinü arü ki tha, “Inü nüsa ki thatha she nüsanü akinpü lapü yung.

⁶⁸ Tüsho inü nüsa ki keokhikhi she nüsanü I ki malojih yungsho I tsoshihpü yung.

⁶⁹ Ha dunglim Mihtsürü Tsührü ju Thrünpuh wu khah tsülim binbah.”

⁷⁰ Judüki arü alalanü tha, “Nü ju Thrünpuh tsührü a de?” Tüsho apinü arü ki alo, “Nüsanü I sheanü dükde thachoh.”

⁷¹ Tüsho arünü tha, “Kheaküshe thiyumütsan isanü tümü yihnüpü la? Tümütüsho anihbuh mün chingnü isanü sodo.”