LUKNÜ ATHRÜTKHI THIYUSHEAK-ATSÜ HUHTANYU 20 - AMÜSÜH HÜM CL Bible (BSI)

Jisu Thiyukhüm-sühmüh dünkheak Keokhikhi

¹ Nimung khülang apinü arüngyam ching mihtsürübo thsangyude tüsho thiyusheak-atsü thsangyuthsangrade alachoki, amükeam putungrübo tüsho yakzan thsangyurübonü azothsürübo lung thsürubah Jisu shoru.

² Arünü tha, “Tümü thiyukhüm-sühmühnü harü rhimochonü isa ki thaang? Yungsho shenü ha thiyukhüm-sühmüh nü kilim jihkhea?”

³ Tüshe apinü arü ki alo, “Inü she nüsa ki khülang keoanü, tüsho I ki aloang:

⁴ ‘Johannü baptikhi ju yinmi chingnü a shi mihtsürü kilimnü a?’ ”

⁵ Tüsho arünü arü bolung lümakheahde tha, “Isanü ‘Yinmi chingnü’ de thasho apinü athabah, ‘Dale tümü thsükhi nüsanü api mükinkhea?’

⁶ Tüshe isanü, ‘Mihtsürü kilimnü’ de thasho mihtsürü alalanü isa lungnü arubah, tümüde Johan ju wukihrü khülang lakheah de arünü kinlah.”

⁷ Jumonü arünü alo, “Ju küchingnüanü isanü mümükheah.”

⁸ Jisunü tha, “Tümü thiyukhüm-sühmühnü inü harü rhimochonü inü she nüsa ki mütha.”

Kurungasolu Mücherü Shihdanglimyu

⁹ Judüki apinü mihtsürübo ki shihdanglimyu ha thapü tankih: “Mihtsürü khülangnü kurungasolu khülang thsübah amücherü kilim jih, tüsho kim ashang thsungkheak limshu lomi ching yü.

¹⁰ Kurungaso rhopü kim ching arünü api kilim kurungasolu chingnü aso jihshihpü yamlarü khülang kurungasolu thsürü kilim yüshih. Tüshe kurungasolu thsürübonü api shikbah khahkeang thiyia tsoshih.

¹¹ Kheaküshe apinü yamlarü püpü yüshih; tüsho arünü api she shikbah achih kipde rhimo, tüsho khahkeang thiyia tsoshih.

¹² Tüsho kheaküshe apinü mahsampü yüshih; tüsho arünü api yurijihbah yankhitabah.

¹³ Judüki kurungasolu putungpuhnü tha, ‘Inü tümü rhimoba? Inü muzhodakkhi I tsührü yüshihbah. Arünü api ngüchoki api ki wüntre jihpü labah.’

¹⁴ Tüshe küyimki kurungasolu thsürübonü api ngükhea, arünü arü bolung asukachihde tha, ‘Ha yamrüplurüp lubuh ah. Arang, isanü api laksahanü, junangde yamrüplurüp ju isa yo thsübah.’

¹⁵ Jumonü arünü kurungasolu chingnü api yankhit tüsho laksah. Jumonü kurungasolu putungrünü arü ki tümü thsüba?

¹⁶ Apinü arübah kurungasolu thsürübo ju alaksahbah tüsho kurungasolu ju püpürü kilim jihbah.” Tüsho mihtsürübonü ju sobah tha, “Küyimkishe jude düthsü shi!”

¹⁷ Apinü arü kheak kheahbah tha, “Dale tüsho ha thrüta lakhi ju tümü a: ‘Thüyam-thsürübonü abahyukkhi lung ju amühit-lung adungtobe kamdo’?

¹⁸ Shepü ju lung kheak keambanü adütre kambah; tüshe shepü kheak ju keambanü adübün kamde azünakbah.”

Ruk Jihkhi dünkheak Keokhikhi

¹⁹ Tüsho amükeam putungrübo le yakzan thsangyurübonü apinü shihdanglimyu ha arü azhihde thachoh de mükheahbah ju kim chingnü api rampü yim, tüshe arünü mihtsürübo tre.

²⁰ Jumonü arünü api kheah, tüsho api ju kovünor wu tüsho thiyukhüm-sühmüh ching jihpü api yubo chingnü anihbuh rampü thiyuro-lungkirü ah de thsübah rükramrübo yüshih.

²¹ Tüsho arünü api ki keokhi, “Thsangyurü, nünü alungki thade thsangyuchoh, tüsho jakmükheah, tüshe thiyuronü Thrünpuh limro thsangyuchoh de isanü mükheahlah:

²² Isanü Kaesar kilim ruk jihpü yakzan la shi?”

²³ Tüshe apinü arü rük-thsükhi mükheahbah tha, “Tümü thsükhi nüsanü I rükakicho?

²⁴ Shotoyinchi nak I ki huhang. Ju kheak she jak tüsho mung thrütkihla?” Arünü alo, “Kaesar ah.”

²⁵ Tüsho apinü arü ki tha, “Jumonü küju Kaesar yoanü Kaesar kilim jihang, tüsho küju Thrünpuh yoanü Thrünpuh kilim jihang.”

²⁶ Tüshe arünü mihtsürübo miki api yubo chingnü mutholokhuk. Tüsho apinü alokhi arünü müyinsah tüsho zhikde la.

Arhang Kamlokhi dünkheak Keokhikhi

²⁷ Judüki Sadukirü arhang kamlokhi müla de atharünü Jisu kilim arübah keokhi,

²⁸ “Thsangyurü, keoniorü khülang niuberü lubah tsührü mülade shesho, aniurünü alibe ju lubah akhiung thsungkheak münü lashihbah de Mosanü isa ki thrütkheah.

²⁹ Kheakü keoniorü thüne lakheah. Tüsho akhuhbuhnü niuberü lu, tüsho tsührü mülade sheabah.

³⁰ Tüsho mahnepünü alibe ju aniube thsüpü lu, tüsho tsührü mülade api sheabah.

³¹ Jushu asampünü alibe ju lu, tüsho thünenü ju ruk lu, tüshe arü tsührü mülade sheabah.

³² Akheam thsüde alibe ju she sheabah.

³³ Jumonü arhang kamlokhi ching, alibe ju shepü niube thsüba? Tümütüsho arü thüne alalanü alibe ju niuberü thsüpü lukheah.”

³⁴ Jisunü arü ki tha, “Ha lün tsührübonü rhangchoh tüsho yamkhün thsüchoh.

³⁵ Tüshe sherü ju lün ching athülün kheba, tüsho ashe chingnü arhang kamlobanü, mürhang yungsho yamkhün müthsü;

³⁶ yungsho kheaküa arü müshe, tümütüsho arübo ashe chingnü arhang kamlokhinü yunirübo tüsho Thrünpuh tsührübo lung yangyukhüh labah.

³⁷ Mosanü she sangrung aniukhi chingnü asherü arhang kamlochoh de huh, tümüde apinü Atungpuh ki Abraham Thrünpuh, Isak Thrünpuh, tüsho Jakob Thrünpuh de ji.

³⁸ Tümüde api ju asherü yungde arhang larü Thrünpuh ah, tümütüsho api kilim alala rhangdung lah.”

³⁹ Judüki yakzan thsangyurü khürünü tha, “Thsangyurü, nünü tsüde thado.”

⁴⁰ Tüshe ju dunglim a arünü akeokhipü mümürang.

Messia dünkheak Keokhikhi

⁴¹ Tüsho apinü arü ki tha, “Küde thsah arünü Khrista ju David tsührü ah de athakhukpü?

⁴² Davidnü mungshikhün hümbo ching thaa lah, ‘Atungpuhnü I Tungpuh ki tha, I khah tsülim binang,

⁴³ inü nü riribo nü jing jungpung mükamshihyi khiungde.’

⁴⁴ Jumonü Davidnü api ki ‘Atungpuh’ de ji; dale küde thsah api ju atsührü thsüpü?”

Jisunü Yakzan Thsangyurü dünkheak Thakhi

⁴⁵ Judüki mihtsürü alalanü sode apinü ajingyanrübo ki tha,

⁴⁶ “Yakzan thsangyurübo dünkheak kümkangang, sherünü shulünkhim yihbah atsahpü küncho, yinzüyindo dangpungbo ching salüm jihshihpü, sinagogbo ching binkiu atsübo, tüsho thüniobo ching atsübe dangpungbo mükühcho,

⁴⁷ shepünü khimoberü yam muyucho, tüsho rük thsüde ashangshang tamkhüntamnücho. Harübo abahyukkhi atobe leangkhibah.”