LUKNÜ ATHRÜTKHI THIYUSHEAK-ATSÜ HUHTANYU 19 - AMÜSÜH HÜM CL Bible (BSI)

Jisu tüsho Zakai

¹ Judüki Jisunü Jirikho ching yüzahbah tsahhode alakheah.

² Ju ching mihtsürü khülang amung Zakai, ruk-threrü atorü, tüsho alarü lakheah.

³ Apinü Jisu ju sheanü akheahpü yim tüshe boto lakhinü müngükhuk, tümütüsho api leang thümamrü lakheah.

⁴ Jumonü apinü müngühlim alihde yübah api kheahpü khubasodung kheak künkih, tümüde api ju limro tsahhode alakheah.

⁵ Küyimki ju dangpung ching Jisu arükhea, apinü abinkih-a kheah tüsho api ngü, tüsho api ki tha, “Zakai nahnah akiang, tümüde khihni I nü yam ching binbah.”

⁶ Jumonü apinü niokheamde aki, tüsho asühde api leangkhi.

⁷ Tüshe küyimki arünü ju ngükheanü neangneangde tha, “Aneakrü mihtsürü khülang lung hanrü thsüpü api yüdo.”

⁸ Judüki Zakainü zhip tüsho Atungpuh ki tha, “Atungpuh, Atungpuh, inü kukruk shihchamkhüh zhochihrü kilim jihchoh; tüsho inü arükchihnü mudode khürü kilimnü kukruk lua lasho, inü phüyi kinü alü jihlochoh.”

⁹ Tüsho Jisunü api ki tha, “Khihni ha yam ching akhümkhit arüa lah, tümütüsho api she Abraham tsührü ah;

¹⁰ tümütüsho Mihtsürü Tsührü ju adükheakkhi yimpü tüsho khümkhitpü arükheah.”

Suna Shonakbo Shihdanglimyu

¹¹ Kheakü arünü harü anichoki, apinü shihdanglimyu püpü tha, tümütüsho api Jirusalem thüninde alakheah tüsho Thrünpuh kiulongthsü ju nahnahde arübah de arünü lüm.

¹² Jumonü apinü tha: “Atorü khülang anihbuh kiulongthsürü kambah alode arüpü limshu lomi ching yü.

¹³ Jumonü apinü api yamlarü 10 kilim arü abande suna shonak 1 jih, tüsho arü ki tha, ‘I arü khiungde shothsümoloang.’

¹⁴ Tüshe api mihtsürübonü anihbuh thranean, tüsho yunithsürü khülang api dunglim yüshihde tha, ‘Isanü ha mihtsürü isa kurungkheak kiulong müthsüshih.’

¹⁵ Junangde küyimki api kiulongthsürü kambah alode arükhea, apinü sho jihkhi yamlarübo thsü mihtsürü abannü shothsümolo ching küdükhüh alü thsüa lanü amükheahpü thiyukhüm jih-a api kilim jishih.

¹⁶ Judüki akhuhbuhnü arübah tha, ‘Atungrü, nü yo suna shonaknü suna shonak 10 yinbudo.’

¹⁷ Tüsho apinü anihbuh ki tha, ‘Tsüde rhimodo, yamlarü atsü; tümütüsho nünü khide aninikhüh khülang ching thiyuro lado, kiuto 10 kurungkheak thiyukhüm-sühmüh ahoriang.’

¹⁸ Tüsho mahnepü arübah tha, ‘Atungrü, nü yo suna shonaknü suna shonak 5 yinbudo.’

¹⁹ Junangde apinü anihbuh ki tha, ‘Nü she kiuto 5 kurungkheak laang.’

²⁰ Tüsho püpürünü arübah tha, ‘Atungrü, ha ching inü shokenanbe ching rama zokhi nü yo suna shonak lah.

²¹ Inü nü trede alakheah, tümütüsho nü amüküp mihtsürü ah. Nünü tümü muzomukhungnü ju hanmukhungchoh, tüsho nünü tümü mümükheannü ju yimluchoh.’

²² Tüsho apinü anihbuh ki tha, ‘Nü mihbukmuyuk yamlarü, nü yunü nü mahkhapbah.

²³ Dale tümü thsükhi I arüchoki sholü bede alupü thsüde nünü I sho ju shoyam ching yuka muzokhea?’

²⁴ Tüsho apinü ju ki zhiprü ki tha, ‘Api kheaknü suna shonak luang, tüsho suna shonak 10 labuh kilim jihang.’

²⁵ Tüshe arünü api ki tha, ‘Atungrü, api a suna shonak 10 lah.’

²⁶ Apinü alo, ‘Inü nüsa ki thachoh, shepü lanü alü jihlobah, tüsho shepü mülanü api lakhi ju she anihbuh kheaknü lude atsobah.

²⁷ Tüshe inü arü kurungkheak kiulong müthsüshihnekhi I riribo ha ching bede arang tüsho arübo I mikinü laksahang.’ ”

Jirusalem ching Akuk Ngüde Yüzahkhi

²⁸ Tüsho küyimki apinü ha thakheanü Jirusalem lim khuhlangbah wutu.

²⁹ Küyimki api Oliv Müzüng ching Bethphage tüsho Bethani phünide arükhea, apinü ajingyanrü mahne thiyide tha,

³⁰ “Nüke müngüh lakhi kiulong ching yüzahang, tüsho nüke yüzahchoki, shenü she mübinkhi donki nunu khülang chinga zokhi ngübah. Ju trünang tüsho ha ching bede arang.

³¹ Tüsho khürünü nüke ki, ‘Tümü thsükhi nükenü ju trüncho’ de keokhisho, nükenü api ki hade athabah, ‘Tümütüsho Atungpuhnü ha yihnüpü lah.’ ”

³² Junangde sherü thiyikheanü chamachih tüsho apinü ane ki thakhi nangde ju ngü.

³³ Tüshe anenü donki nunu tründe alachoki, atungrünü ane ki tha, “Tümü thsükhi nükenü donki nunu trüncho?”

³⁴ Tüsho anenü tha, “Atungpuhnü ha yihnüpü lah.”

³⁵ Jushu anenü ju Jisu kilim bedarü. Tüsho arünü donki nunu kheak arü khimbo phukihbah ju kheak Jisu binshih.

³⁶ Tüsho api yüde alachoki arünü limro kheak arü khimbo khima zojih.

³⁷ Api Oliv Müzüng koyu thüninde alachoki, jingyanrü boto alalanü arünü wuto rhimo ngükhi dünkheak asühachihpü tankih tüsho düsheak achangnü Thrünpuh shijihde tha,

³⁸ “‘Atungpuh mung chingnü arükhi kiulongthsüpuh müngühmühi!’ Yinmi ching mungtsü tüsho achangbe ching müretah lashang!”

³⁹ Tüsho Pharisirü khürünü boto chingnü api ki ji, “Thsangyurü, nü jingyanrübo thürühang.”

⁴⁰ Tüshe apinü arü ki alo tüsho tha, “Inü nüsa ki thachoh, harünü zhikde lasho, lungbonü azhibah.”

Jisunü Jirusalem dünkheak Tripkhi

⁴¹ Kheakü api thüninde alachoki kiuto kheah tüsho ju dünkheak trip,

⁴² tüsho tha, “Khihni ha nü kilim tümünü mungtsü hande arübanü nünü mükheahkhülaa! Tüshe jurü nü mükbo kinü jika lah.

⁴³ Nü riribonü nü mükamde chipi ayünde tüsho thrip aban zündopü nimungbo arübah,

⁴⁴ tüsho nü lung nü tsührübo alo kheak arih-a yapbah; tüsho nü kheak lung khülangnü khülang kheak kheangkihkhi maningshih, tümütüsho Thrünpuh nü kilim arüpü kim nünü mümükheahde lado.”

Jisunü Arüngyam ching Yükhi

⁴⁵ Judüki apinü arüngyam ching yüzah tüsho shothsümolorü yankhitpü tankihde,

⁴⁶ arü ki tha, “Ha thrüta lah, ‘I yam ju tamkhüntamnü yam ah, tüshe nüsanü jangkhijangrarü jikpung kamshihdo.’ ”

⁴⁷ Tüsho apinü nimung aban arüngyam ching thsangyude alakheah. Tüshe amükeam putungrübo, yakzan thsangyurübo, tüsho mihtsürü limberübonü api laksahpü yim,

⁴⁸ tütüshe arünü tümü müthsükhuk; tümütüsho mihtsürü alalanü khide mulong jide api ki anide alakheah.