LUKNÜ ATHRÜTKHI THIYUSHEAK-ATSÜ HUHTANYU 18 - AMÜSÜH HÜM CL Bible (BSI)

Khimoberü tüsho Mahkhaprü Shihdanglimyu

¹ Judüki arünü kamruhroro tamkhüntamnüpü tüsho mulong müninipü thsangyude api jingyanrübo ki Jisunü shihdanglimyu tha.

² Apinü tha: “Kiuto khülang ching mihtsürü khülang Thrünpuh mütrerü yungsho mihtsürü ki akinashu müjihrü lakheah.

³ Kheakü ju kiuto ching khimoberü khülang lakheah; tüsho api ki arübah tha, ‘I riri azhihde I mahkhapjang!’

⁴ Apinü anükhüh kheak jude müthsü; tüshe anükhüh labah apinü aküdah thsüde tha, ‘Inü Thrünpuh mütre yungsho mihtsürü ki akinashu müjih-a lalashe,

⁵ khimoberü hanü I thsurangcho le inü anihbe mahkhapjihbah, jude yungsho alibenü arülele thsükhinü I amükhiukbah.’”

⁶ Judüki Atungpuhnü tha, “Thiyuro mülakhi mahkhaprünü tümü thakheanü aniake.

⁷ Thrünpuhnü apinü amokhitkhi animung tüsho are api ki zhirü mahmükhapjihba de? Apinü arü ki aruhba de?

⁸ Apinü arü ki niokheamde mahkhapjihbah de inü nüsa ki thachoh. Judüalalashe, küyimki Mihtsürü Tsührü arübanü apinü tsükjide alomi kheak akin lakhi ngüba de?”

Pharisirü le Ruk-threrü Shihdanglimyu

⁹ Kheaküshe apinü nihbuh küdah thiyuro-lungki ah de akinrü tüsho püpürü mükhemükimrü ki shihdanglimyu ha tha:

¹⁰ “Mihtsürü mahne tamkhüntamnüpü arüngyam ching wutu, khülang Pharisirü tüsho püpü ju ruk-threrü.

¹¹ Pharisibuhnü zhip tüsho tamkhüntamnü, ‘Thrünpuh, I a püpürü mihtsürübo–jangkhijangrarü, thiyuro mülarü, müzammüramrü, yungsho ha ruk-threbuh nangde mülakhi hode nü ki makshe jihchoh.

¹² Inü amu-khip khülang dükeak ching mahne ki khümkeak thsüchoh; I lakhi alala chingnü inü thürü shihcham jihchoh.’

¹³ Tüshe rukthrebuhnü limshude zhip. Apinü thüning lim she abinkih-a mükheah, tüshe akhüh yümde tha, ‘Thrünpuh, I aneakrü ki amüthsüm laang!’

¹⁴ Inü nüsa ki thachoh, ha buh mihtsürü ju püpürü kheaknü alimbe thsübah anihbuh yam ching yükido; tümüde shepünü küdah thsüde shuhkihchonü abobe kambah, tüsho shepünü küdah thsüde aninibe kamchonü ashuhkihbah.”

Jisunü Azürü Anini Müngühjihkhi

¹⁵ Judüki apinü aqiushihpü arünü azürü anini api kilim bedarü; tüshe ajingyanrübonü ju ngübah arübo thürüh.

¹⁶ Tüshe Jisunü arübo api kilim jibah tha, “Azürü aninibo I kilim arüshang, tüsho arübo düyanlo; tümüde Thrünpuh kiulongthsü harü yo ah.

¹⁷ Atsütsü inü nüsa ki thachoh, azürü anini khülang nangde shepünü Thrünpuh kiulongthsü müleangkhinü, küyimkishe ju ching müyüzah.”

Alarü Mihtsürü

¹⁸ Kheakü yakzanshuhrü khülangnü api ki keokhi, “Thsangyurü atsü, akheam müla rhangdung yamrüplurüp lupü inü tümü rhimobea?”

¹⁹ Jisunü api ki tha, “Tümü thsükhi nünü I ki atsü de jicho? Sheshe atsü müla tüshe Khülang lah, ju Thrünpuh ah.

²⁰ Nünü thiyuzüngbo mükheahlah: ‘Müzammüram düyihbeak, dülaksah, dahüh, arükchih thiyumütsan düthsü, nü buh tüsho nü be wüntreang.’ ”

²¹ Tüsho apinü tha, “Harü alala I athunuchokinü inü rhimodo.”

²² Küyimki Jisunü harü sokhea, apinü anihbuh ki tha, “Nü kheaküshe khülangnü maban. Nü lakhi alala yinang tüsho zhochihrü kilim chama jihang, tüsho yinmi chingnü nü rahpung labah; tüsho arang, I dunglim yanang.”

²³ Tüshe küyimki apinü ha sokhea, api khide mulong rozhakabah, tümüde api khide alarü lakheah.

²⁴ Tüsho küyimki Jisunü api khide mulong rozhakkhi ngükhea, apinü tha, “Lakhit larünü Thrünpuh kiulongthsü ching yüzahpü küdükhüh she chakla!

²⁵ Tümüde alarü mihtsürü khülangnü Thrünpuh kiulongthsü ching yüzahpü kheaknü a kemelnü dübean-ku ching hokhi athülihbe ah.”

²⁶ Tüsho ju sorünü tha, “Dale tüsho shepü khümkhitba?”

²⁷ Tüshe apinü tha, “Mihtsürübo kilim küpü amukukbe lanü Thrünpuh kilim akukbe lah.”

²⁸ Judüki Peternü tha, “Kheahang, isanü alala bahjihdo tüsho nü dunglim yando.”

²⁹ Jumonü apinü arü ki tha, “Atsütsü inü nüsa ki thachoh, shepünü Thrünpuh kiulongthsü dünkheaknü thüyam yungsho berübuhrü yungsho keoniorü yungsho niuberü yungsho tsührübo bahjihdünü,

³⁰ ha lün ching alü thsüde aleangkhibah tüsho arübe lün ching akheam müla rhangdung ngübah.”

Jisunü Api Shepü Mahsam Kipü Thakhi

³¹ Judüki apinü thürükheak mahne ju bemuwuh tüsho arü ki tha, “Kheahang, isa Jirusalem lim wutuchoh, tüsho Mihtsürü Tsührü dünkheak wukihrübonü athrütkhi alala adünjibah.

³² Tümüde api ju khiungkerü kilim jihbah tüsho luhmünede mükhemükimbah, tüsho amukhiukkihbah.

³³ Arünü api rhapbah tüsho asheshihbah. Tüsho mahsam nipü api arhang kamlobah.”

³⁴ Tüshe arünü harü khülang she manikhit; ha thakhi ju arü kheaknü rama lakheah, tüsho athakhibo arünü mümükheah.

Müktukrü Kakheangrü Thsüngukhi

³⁵ Api Jirikho thüninde arüchoki müktukrü mihtsürü khülang limro ching kakheangde alakheah.

³⁶ Tüsho yimto khülang hokhi sobah tümü amütsananü apinü keokhi.

³⁷ Jumonü arünü Nazarethrü Jisu hochoh de api ki tha.

³⁸ Tüsho apinü zhide tha, “David tsührü Jisu, I muzhoang!”

³⁹ Judüki mikhuh yürübonü api ki dalan de tha; tüshe apinü alü thsüde zhi, “David tsührü, I muzhoang!”

⁴⁰ Jumonü Jisunü zhikde zhip tüsho api ki bedarüpü thiyukhüm jih. Küyimki api thüninde arükhea, apinü anihbuh ki keokhi,

⁴¹ “Nü thsungkheak inü tümü rhimoshihnela?” Tüsho apinü alo, “Atungpuh, inü ngünelah.”

⁴² Jisunü api ki tha, “Nü mük khimshuhang; nü yo akinnü nü ngudo.”

⁴³ Tüsho judüchokinü api mük khimshuh, tüsho Thrünpuh mung shide api dunglim yan. Tüsho mihtsürü alalanü ju ngüchoki Thrünpuh shijih.