LUKNÜ ATHRÜTKHI THIYUSHEAK-ATSÜ HUHTANYU 17 - AMÜSÜH HÜM CL Bible (BSI)

Neak

¹ Jisunü api jingyanrübo ki tha, “Mihtsürünü neak yihbeakshihpü adünjipü lah, tüshe shepü hode ju dünjishihbanü are!

² Harü anini bolung khülang neak yihbeakshihpü kheaknü a api hung kheak hizübe-lung rhükkihbah keto ching jipyukkhi atsübe labah.

³ Nüsa küdah thsüde kurhangang. Nü keoniorünü nü azhihde neak yihbeaksho api thürühang; tüsho apinü mulong müthrisho api neak bahjang.

⁴ Apinü nü azhihde nimung khülang chingnü thüne ki neak yihbeaksho, tüsho nimung khülang ching nü ki thüne ki alode arübah, ‘I mulong müthrichoh’ de thasho, nünü api neak bahjang.”

Akin

⁵ Amüsüh-thsangyurübonü Atungpuh ki tha, “Isa akin tode kamshang.”

⁶ Atungpuhnü tha, “Nüsa akin woninji dükhüh lasho, nüsanü ha ayihkoso dung ki thabah, ‘Ayingnü rukkhitang tüsho keto ching khimang,’ tüsho junü nüsa ki mihyuanibah.

Yamlarü Rhimo

⁷ “Tüsho nüsa shepünü yamlarü khülang wochakkhi yungsho namfimihnu neakkhi thulu chingnü alungchoki, ‘Nahnah arang tüsho binbah yimtsühang’ de athaba?

⁸ Tüshe apinü anihbuh ki, ‘I tsühyungpü thsakhamang, tüsho I mütsühyungyi khiungde thsakhambah aleangang, tüsho ju dunglim nü tsühyungang’ de athapü yung de?

⁹ Apinü anihbuh ki thiyukhüm jihkhi rhimomonü apinü yamlabuh ki makshe jihcho de?

¹⁰ Junangde küyimki nüsa ki thiyukhüm jihkhi nüsanü arhimobanü, thaang, ‘Isa a müthülünkhi yamlarübo ah. Isanü arhimobe lang isanü rhimodo.’ ”

Jisunü Aphamrü Thürü Thsüngukhi

¹¹ Kheakü api Jirusalem lim yüchoki Samaria tüsho Galilee dükeaknü hode yü.

¹² Api kiulong khülang ching yüzahchoki, aphamrü mihtsürü 10 limshude zhipbah api shoru.

¹³ Tüsho arünü arü düsheak zhide tha, “Atungpuh Jisu isa ki muzhoang!”

¹⁴ Jumonü apinü arü ngübah tha, “Yüang, nüsabo amükeamrübo ki huhang.” Junangde arü yübah müsühde kam.

¹⁵ Kheakü khülang buhnü api thsüngukhi ngübah alode yü tüsho düsheak achangnü Thrünpuh mung shi,

¹⁶ tüsho api jing ki ami mükhümbah makshe jih. Tüsho api ju Samariarü lakheah.

¹⁷ Jumonü Jisunü tha, “Arü 10 müsühkhitkhi yung de? Tüshe arü 9 küching la?

¹⁸ Ha khiungkerü kheak hode alode arübah Thrünpuh mung shipü she mülakhea de?”

¹⁹ Tüsho apinü anihbuh ki tha, “Asürang, nü limro ching yüang. Nü yo akinnü nü thsüngudo.”

Kiulongthsü Arükhi

²⁰ Pharisirünü Thrünpuh kiulongthsü küyimki arüba de api ki keokhichoki, apinü arü ki alo tüsho tha, “Thrünpuh kiulongthsü ju angüpü thsüde marü,

²¹ yungsho mihtsürübonü mütha, ‘Ha kheak,’ yungsho ‘Ju kheak lah,’ tümütüsho Thrünpuh kiulongthsü ju nüsa bolung lah.”

²² Judüki apinü ajingyanrübo ki tha, “Nüsanü Mihtsürü Tsührü nimungbo kheahnepü kim arado, tüshe nüsanü ju müngü.

²³ Tüsho arünü nüsa ki thabah, ‘Halim kheahang!’ yungsho ‘Julim kheahang!’ Arü dunglim yande düyü.

²⁴ Tümütüsho chinchobenü thüning thripkhühnü thüning khülim khiungde aphürapkhi nangde Mihtsürü Tsührü ju api nimung ching jude alabah.

²⁵ Tüshe akhuhde apinü hihde thsünübah tüsho ha lünnü abahyukbah.

²⁶ Noa nimungbo ching nangde, Mihtsürü Tsührü nimungbo ching labah:

²⁷ Arünü Noanü sangkung ching yüzahkhi, tüsho keking arübah arü alala müdükheakyi khiungde tsühyung, niuberübo lu, arübo rhangshih.

²⁸ Lot nimungbo ching nangde: Arünü tsühyung, thulo, yin, khim, thsü;

²⁹ tüshe Lot Sodom chingnü wukhiuk nimung yinmi chingnü mo tüsho molung akibah arü alala dükheakshih.

³⁰ Mihtsürü Tsührü amikheak akhiukkhi nimung ching junangde alabah.

³¹ Ju nimung shepü thüyam-mün kheak lanü api kukrukbo thüyam ching lakhi lupü dakishih, tüsho junangde shepü thulu ching lanü dalunglo.

³² Lot niube lümkhitang.

³³ Shepünü nihbuh rhangdung khümkhitpü yimchonü adükheakbah, tüsho shepünü nihbuh rhangdung dükheakchonü akhümkhitbah,

³⁴ Inü nüsa ki thachoh, ju tsüngre mihtsürü mahne yapkiu khülang ching labah: khülang bea lubah tüsho khülang bahjihbah.

³⁵ Aliberü mahne hi chude alabah: khülang bea lubah tüsho khülang bahjihbah.

³⁶ Mihtsürü mahne thulu ching labah; khülang bea lubah tüsho khülang bahjihbah.”

³⁷ Arünü alo tüsho tha, “Atungpuh, küching a?” Jumonü apinü arü ki tha, “Kürü ching mi labanü, ju ching müleangbo mukhungbah.”