LUKNÜ ATHRÜTKHI THIYUSHEAK-ATSÜ HUHTANYU 15 - AMÜSÜH HÜM CL Bible (BSI)

Adükheakkhi Namfimihnu

¹ Judüki ruk-threrü tüsho aneakrübo alala api ki anipü thüninde arü.

² Tüsho Pharisirü le yakzan thsangyurübonü neangneangde tha, “Ha mihtsürünü aneakrübo leangkhichoh tüsho arü lung yimtsühchoh.”

³ Jumonü apinü arü ki shihdanglimyu ha tha:

⁴ “Nüsa bolung namfimihnu 100 labah 1 dükheaksho, mütüm ching 99 zojihbah amüngüyi khiungde adükheakkhi yimde müyükhi mihtsürü shepü la?

⁵ Tüsho küyimki apinü ju yimkhitbanü asühde adubuh kheak yihkihchoh.

⁶ Küyimki thüyam lim arübanü, apinü müyamrübo le yamhingrü jimukhungde arü ki thachoh, ‘I lung asühang, tümüde adükheakkhi namfimihnu inü ngüdo!’

⁷ Inü nüsa ki thachoh, junangde mulong müthripü yihnüpü mülakhi thiyuro-lungki mihtsürü 99 kheaknü aneakrü mulong müthrikhi 1 kurungkheak yinmi ching alü asühachihkhi labah.

Adükheakkhi Shonak

⁸ “Yungsho aliberü shepünü shotoyinchi nak 10 labah shonak 1 dükheaksho, tsün takkihbah müngüyi khiungde thüyam phütde düshihde mükheahcho?

⁹ Tüsho küyimki alibenü ju ngübanü anihbenü müyamrübo le yamhingrü jimukhungde thachoh, ‘I lung asühang, tümüde adükheakkhi shonak inü ngüdo!’

¹⁰ Inü nüsa ki thachoh, junangde Thrünpuh yunirü miki mulong müthrikhi aneakrü khülang kurungkheak asühachihkhi lah.”

Adükheakkhi Tsührü

¹¹ Judüki apinü tha: “Mihtsürü khülang tsührü 2 lakheah.

¹² Tüsho akheambuhnü abuh ki tha, ‘Abuh, I shihcham kukrukbo I kilim jihang.’ Jumonü apinü ane kilim lakhit chamjih.

¹³ Nimung anükhüh dunglim, akheambuhnü api lakhi alala hanmukhungbah limshu lomi ching hantsahde yü tüsho api lakhit phinphurukabah.

¹⁴ Tüshe küyimki apinü alala bahkhamkhea, ju lomi ching khümzung arü, tüsho api mükheakde akampü tankih.

¹⁵ Judüki apinü ju lomi ching mihkhungrü khülang ki mubuhde yü, tüsho apinü anihbuh ju kheaknu yimkippü yüshih.

¹⁶ Apinü kheaknunü tsühde alakhi bineangbo tsühnede lüm, tüshe shenü she api kilim tümü müjih.

¹⁷ Tüshe küyimki apinü aküdah thsüde alümkhitkhea, apinü tha, ‘I buh ki mulomüthsürübo arü tsühpü kheaknü alü lah, tüshe I a akhümnü shechoh!

¹⁸ Inü tsahmusubah I buh ki yübah, tüsho api ki thabah, “Abuh, inü yinmi azhihde tüsho nü miki neak yihbeakdo,

¹⁹ tüsho kheaküa I nü tsührü de ajipü müthülün, I ju amulokhi nü yamlarübo nangde kamshang.”’

²⁰ Tüsho apinü tsahmusubah abuh kilim arü. Tüshe api limshu ching tsahchokinü, abuhnü api ngübah muzhode lüm, tüsho alihde yübah ahung kheak kap tüsho api müthsüp.

²¹ Tüsho atsührünü api ki tha, ‘Abuh, inü yinmi azhihde tüsho nü miki neak yihbeakdo, tüsho I kheaküa nü tsührü de ajipü müthülün.’

²² Tüshe abuhnü yamlarübo ki tha, ‘Nahnah shulünkhim atsübe lude akhiukbah api kheak phuyujang, akhah ching khahrih yukjang tüsho ajing ching jingkhümpü yukjang.

²³ Tüsho moshi nunu ashih-kihkhi lude arübah laksahang, tüsho isanü tsühde asühachihanü;

²⁴ tümüde I tsührü ha shea lakheah tüshe kheakü arhang lalolah; api dükheaka lakheah tüshe ngüdo.’ Tüsho arünü asühachihpü tankih.

²⁵ “Kheakü akhiung ju thulu ching lakheah. Tüsho api alungbah thüyam phünide alachoki, khün tüsho atsünkhi düsheak so.

²⁶ Jumonü apinü yamlarü bolung khülang ji tüsho harübo dünkheak keokhi.

²⁷ Tüsho apinü anihbuh ki tha, ‘Nü niurü arüa lah, tüsho apinü anihbuh tsüde ashorukhi hode, nü buhnü ashih-kihkhi moshi nunu laksahdo.’

²⁸ Tüshe apinü bukakhiuk, tüsho müyüzah. Jumonü abuhnü akhiukbah api ki mushu.

²⁹ Jumonü apinü abuh ki tha, ‘Kheahang, kam ahihdo inü nü tankihde arüdo; küyimkishe inü nü yukhüm mülakmih; tüshe nünü küyimkishe I kilim I müyamrü lung asühachihpü thsüde mihnu nunu müjih.

³⁰ Tüshe yüliyürade nü lakhit phinphurukkhi nü tsührü ha arü müleangnü, nünü api thsungkheak ashih-kihkhi moshi nunu laksahdo.’

³¹ Tüsho apinü anihbuh ki tha, ‘I tsah-a, nü a I lung kamruhroro lah, tüsho I lakhi alala nü yo ah.

³² Isanü asühachihpü tüsho asühpü alungki lah, tümüde nü niurü shea lakheah tüshe kheakü arhang lah, tüsho dükheaka lakheah tüshe ngüdo.’ ”