LUKNÜ ATHRÜTKHI THIYUSHEAK-ATSÜ HUHTANYU 14 - AMÜSÜH HÜM CL Bible (BSI)

Jisunü Tukthsürü Thsüngukhi

¹ Küyimki Amuni Jisunü Pharisi yakzanshuhrü yam ching tsühyungpü yükhea, api ju tsüde kheahyukde alakheah.

² Tüsho ju ching api miki bümzübümdokhi mihtsürü khülang lakheah.

³ Tüsho Jisunü mahkhaprü le Pharisirü ki alojihde tha, “Amuni thsüngupü yakzan la shi?”

⁴ Tüshe arünü zhikde la. Tüsho apinü anihbuh bea lubah thsüngujih tüsho api tsoshih.

⁵ Judüki apinü arü ki tha, “Nüsa shepünü donki yungsho moshipung alokhün ching keamyukbah Amuni nahde muthokhitde alaba?”

⁶ Tüsho arünü harü dünkheak api yu malokhuk.

Azhihayih tüsho Hanrü-beyuknekhi

⁷ Jumonü küyimki arünü atsübe dangpung mokhitkhi ngükhea, jiyuka larü ki apinü shihdanglimyu khülang tha:

⁸ “Küyimki khürünü arhangrü thünio ching nü jiyukbanü, atsübe binkiu ching dübin, jude yungsho nü kheaknü alü wüntre jihrü khülang apinü jiyuka labah;

⁹ tüsho nü le api jiyukbuhnü arübah nü ki thabah, ‘Ha mihtsürü kilim binkiu jihang,’ tüsho nü achih ngüde abobe binkiu lubah.

¹⁰ Tüshe küyimki nü jiyukbanü yüang tüsho abobe binkiu ching binang, junangde küyimki nü jiyukbuh arübanü nü ki thabah, ‘Müyambuh, achangbe ching yükihang,’ judüki nü lung dükhüm ki binrü miki nü müretah labah.

¹¹ Tümütüsho shepü küdah thsüde shuhkihchonü abobe kambah, tüsho shepünü azhihayihchonü ashuhkihbah.”

¹² Judüki Jisunü api jiyukbuh ki tha, “Küyimki nünü yapsu-jim yungsho are-jim tsühpü jiyukbanü, nü müyamrübo, nü keoniorübo, betsührübo yungsho yamhingrü alarübo düjiyuk, jude thsüsho arünü nü jiyukbah tüsho ashaklobah.

¹³ Tüshe küyimki nünü thünio thsakhambanü, zhochihrü, mütsümüyangrü, jingkikrü, müktukrü jiyukang.

¹⁴ Tüsho nü müngühmühi labah, tümütüsho arünü nü müshaklokhuk; tümüde thiyuro-lungkirü arhang kamlochoki nü shaklobah.”

Thünio Ato Shihdanglimyu

¹⁵ Küyimki api lung dükhüm ki binrü bolung khülangnü harü sokheanü api ki tha, “Shepünü Thrünpuh kiulongthsü ching yikhap tsühbanü müngühmühi!”

¹⁶ Judüki apinü anihbuh ki tha, “Mihtsürü khülangnü thünio ato thsakham tüsho ahihkhüh jiyuk.

¹⁷ Thünio kim ching apinü ajiyukrü ki thashihpü yamlarü yüshih, ‘Arang, lüpdükhi thsakhama lah.’

¹⁸ Tüshe arü alalanü rukhühnü mudomürapü tankih. Akhuhbuhnü api ki tha, ‘I thulu thulodo, tüsho I yübah ju kheahbah. Muzhobah I ki neak bahjang.’

¹⁹ Tüsho püpürünü tha, ‘I moshipung dudu 5 thulodo. Arü rhimoakheahshihpü I yüchoh. Muzhobah neak bahjang.’

²⁰ Kheaküshe püpürünü tha, ‘I niube ludo, jumonü I marükhuk.’

²¹ Jumonü yamlarü junü arübah api putungrü ki harü yusheak jih. Judüki thüyam putungrünü bukakhiukde api yamlarü ki tha, ‘Kiuto yo kiudunglimrobo tüsho limrobo ching nahde yüang tüsho zhochihrü, mütsümüyangrü, jingkikrü tüsho müktukrü bede arang.’

²² Tüsho yamlarünü tha, ‘Atungrü, nünü thiyukhüm jihkhi nangde rhimodo, tüsho kheaküshe binpung lah.’

²³ Judüki aputungrünü yamlarü ki tha, ‘Lomi limtobo tüsho limrobo ching yübah arübo yana arüshang, junangde I yam mide akambah.

²⁴ Tümüde inü nü ki thachoh, inü ajiyukrü shenü she I jimpung mütsühake.’ ”

Jingyanrü Thsükhi Adün-amo

²⁵ Yimto atonü api dunglim yü. Tüsho apinü rholobah arü ki tha,

²⁶ “Khürünü I dunglim arübah abuh, abe, aniube, atsührübo, khiungmungrü le chiniurü, tüsho nihbuh rhangdung she müthraneansho, api I jingyanrü thsüpü müthülün.

²⁷ Tüsho shepünü nihbuh sangkim hanbah I dunglim marübanü I jingyanrü müthsükhuk.

²⁸ Nüsa khürünü rünchang thsüpü lümkhi thsüsho, akhuhde apinü ju rhimo banpü api sho suhdahla shi yungnü akheahpü binbah adün-amo rhimokhitchoh.

²⁹ Jude yungsho apinü khimtan thsü dunglim, ju mübansho, ju ngürü alalanü api münejihpü tankihchoh.

³⁰ Arünü athabah, ‘Ha mihtsürünü athsüpü tankihdo tüshe müban.’

³¹ Yungsho kiulongthsürü khülangnü api azhihde 20,000 bebah arükhi, apinü mihtsürü 10,000nü bebah thirithsüpü kukla shi mukuknü akhuhde binbah lümamükheahcho de?

³² Apinü mukuksho, püpürü ju limshu ching lachoki limburü yüshihbah tüsho mungtsü dünkheak keokhibah.

³³ Ju kiphahde, shepünü nihbuh lakhi alala mübahyuknü I jingyanrü müthsükhuk.

Thimi Mükekhi

³⁴ “Thimi ju tsülah; tüshe thimi ching akebe dükheaksho, ju küde akeshihba?

³⁵ Ha alo yungsho alomüdang thsungkheak yihnüpü müla, tüshe mihtsürübonü ju jipa bahchoh. Shepü anipü nükhün kihlanü apinü anishang!”