LUKNÜ ATHRÜTKHI THIYUSHEAK-ATSÜ HUHTANYU 1 - AMÜSÜH HÜM CL Bible (BSI)

¹ Isa bolung dünjikhi thrütpü ahihkhühnü mürang.

² Atankih chingnü harü ngübah isa ki ha yusheak zhiyukrünü ju thrüt.

³ Jumonü atankihnü inü lüpdükhi düshihde yimakheahkhi nangde, nüsa atsüdak Theophila dünkheak akhinashunü athrütpü lümdo,

⁴ junangde nüsa ki thsangyukhi adüngakhi nüsanü amükheahbah.

Johan Baptijihbuh Zübepü Thajungkhi

⁵ Judea ching Herod kiulongthsürü lachoki, Abija amükeamrü chamnak lung lakhi amükeamrü khülang amung Zakaria lakheah; aniube ju Aron tsühsoniuso, amung Elizabeth lakheah.

⁶ Ane chido Thrünpuh miki alungki, Atungpuh yukhüm tüsho thiyuzüngbo yande jakreak mükihde alakheah.

⁷ Tüshe ane tsührü müla, tümütüsho Elizabeth ju bünkeangberü tüsho ane chido khide shina lakheah.

⁸ Junangde api chamnak yande Thrünpuh miki amükeamrü thsüde atankihchoki,

⁹ amükeamrü jipüyakli yande, Atungpuh arüngyam ching yübah jinjinlak takde kingaünpü api azankhit.

¹⁰ Tüsho jinjinlak takkhi kim ching mihtsürü boto alala wungdo tamkhüntamnüde alakheah.

¹¹ Judüki jinjinlak kingaün sadam tsülim Atungpuh yunirü khülang zhipde api ki akhiuk.

¹² Tüsho küyimki Zakarianü api ngükhea, api müyinnim tüsho trede alakheah.

¹³ Tüshe yunirünü api ki tha, “Zakaria dütre, tümüde nü tamkhüntamnü sojihdo; nü niube Elizabethnü nü kilim tsührü khülang zübejihbah tüsho nünü api mung Johan de ajibah.

¹⁴ Nü khide asühbah, tüsho api zübechoki ahihkhühnü asühachihbah.

¹⁵ Tümüde api ju Atungpuh miki ato labah, tüsho yukhu yungsho amüshangbe muyung. Api ju abe nuyam chingnü Amüsüh Menü mide alabah.

¹⁶ Tüsho apinü Israel tsührübo ahihkhüh Atungpuh arü Thrünpuh kilim rholoshihbah.

¹⁷ Apinü bebuhrü mulong tsührübo kilim, tüsho mihyumanirü thiyuro lümlung lim rholoshihde Atungpuh thsungkheak mihtsürübonü athsakhamshihpü Elija me tüsho wu chingnü Atungpuh müngüh yübah.”

¹⁸ Zakarianü yunirü ki tha, “Ha inü küde amükheahba? Tümüde I lel niube khide shina lah.”

¹⁹ Tüsho yunirünü api ki alojihde tha, “l Gabriel, Thrünpuh miki zhipbuh, tüsho ha thiyusheak atsü hanbah thiyia arüshihkhi ah.

²⁰ Tüshe kheahang, harü müdünjiyi nimung khiungde nü masukkhukpü thsüde aduh-a labah, tümütüsho kim ching dünjipü lakhi I yubo nünü akin müla.”

²¹ Mihtsürübonü Zakaria aleang, tüsho api arüngyam ching khide ruhde alakhi müyinsah.

²² Tüshe küyimki api akhiukkhea, apinü arü ki masukkhuk; tüshe apinü arüngyam ching michih khülang ngüa lah de mükheah, tümüde apinü arü ki akhah hita huh tüsho thiyu müthakhukde alakheah.

²³ Küyimki api kingaünpü kim arün thsükhea, apinü thüyam lim yülo.

²⁴ Ha dunglim aniube Elizabeth mübünkeangde kam tüsho khinu phüngü muwukhiukde thüyam ching la.

²⁵ Alibenü tha, “Kheakü akheam ching Atungpuhnü I rungdo tüsho mihtsürü bolung I mungchih hande tsodo.”

Jisu Zübepü Thajungkhi

²⁶ Kheakü khinu thurukpü ching Galilee yo kiuto khülang Nazareth de ajikhi lim Thrünpuhnü Gabriel arüshih,

²⁷ ju David tsühsoniuso Josep ki rhangpü lakhi atsangkhitkhi kilim lakheah. Atsangkhitkhi mung Mari lakheah.

²⁸ Yunirünü arübah alibe ki tha, “Nü lung mungtsü laang! Atungpuh nü lung lah tüsho nü tode müngühjihdo!”

²⁹ Tüshe küyimki alibenü api ngükhea, apinü athakhinü küpkhukde kam tüsho ha salüm tümüaki de müyinsah.

³⁰ Yunirünü alibe ki tha, “ Mari dütre, tümüde Thrünpuh kilimnü nü mihmuzho ngüdo.

³¹ Kheahang, nü mübünkeangde akambah, tüsho tsührü khülang zübebah, tüsho api mung Jisu de ajibah.

³² Api ato labah tüsho Khide Achang tsührü de ajibah; tüsho Atungpuh Thrünpuhnü api kilim apü David kiulongthsübinkiu jihbah.

³³ Apinü Jakob yamkhün kurungkheak lünnü kiulongthsübah, tüsho api kiulongthsü akheam mülade alabah.”

³⁴ Judüki Marinü yunirü ki tha, “I atsangkhit anünürü a le ha küde alapü?”

³⁵ Tüsho yunirünü alibe ki alojihde tha, “Amüsüh Me nü kheak arübah tüsho Achangbe wunü nü alamdobah; jumonü shepü Amüsüh Khülang zübepü lanü Thrünpuh tsührü de ajibah.

³⁶ Kheakü nüsa betsührü Elizabeth she anihbe ashinshu tsührü khülang lah; tüsho shepü bünkeangberü lakheanü kheakü khinu thuruk thsüchoh.

³⁷ Tümüde Thrünpuh kilim tümü amukukpü müla.”

³⁸ Judüki Marinü tha, “Atungpuh yamlaberü kheahang! Nü yu yande ju lashang.” Tüsho yunirü ju alibe kinü chamachih.

Marinü Elizabeth Rhuakheahkhi

³⁹ Tüsho ju kim ching Marinü tsahmusubah awung lomi Judea kiuto ching niokheamde yü,

⁴⁰ tüsho Zakaria yam ching yüzahbah Elizabeth ki salüm jih.

⁴¹ Tüsho küyimki Marinü salüm jihkhi Elizabethnü asokhea, khungarünü abe nuyam chingnü juk; tüsho Elizabeth ju Amüsüh Menü mide kam.

⁴² Judüki alibenü düsheak achangnü tha, “Aliberü bolung nü müngühmühi, tüsho nü nuyam aso müngühmühi!

⁴³ Tüshe I Tungpuh abenü I kilim arüpü thsüde ha I ki küde mülüjihkhea?

⁴⁴ Tümüde nünü salüm jihkhi düsheak I nükhünnü soakede, I nuyam ching khungarünü asühde juk.

⁴⁵ Alibe shepünü akin lachonü müngühmühi, tümüde Atungpuh kilimnü anihbe ki thakhibo adünjibah.”

Mari Mungshi Khün

⁴⁶ Tüsho Marinü tha, “I menü Atungpuh shichoh;

⁴⁷ I menü I khümkhitbuh Thrünpuh lung asühchoh,

⁴⁸ tümüde apinü ayamlaberü kuhi lümkhitjih; kheahang, kheakünü ründe lün alalanü I ki müngühmühi de ajibah.

⁴⁹ Tümütüsho shepü wutoanü apinü I thsungkheak ato rhimodo tüsho api mung amüsüh lah.

⁵⁰ Tüsho api amüthsüm lün chingnü lün api trerü kheak lah.

⁵¹ Apinü anihbuh binnü sühmüh huhdo; apinü arü mulong ching lülüshishide alümkhi hiumüzütshih.

⁵² Apinü wuto ju arü kiulongthsü-binkiu kheaknü akishih, tüsho akheamkhibe shuhkih.

⁵³ Apinü khümde alarü atsübonü bukthsüshih, tüsho alarü khah keangkeang tsoshih.

⁵⁴ Apinü nihbuh mihmüthsüm lümkhitde api yamlarü Israel rungdo.

⁵⁵ Apinü isa jipürübo Abraham tüsho api müjih ki lünnü asukkhi nangde lah.”

⁵⁶ Tüsho Marinü anihbe lung khinu mahsam bande la, tüsho nihbe yam lim yü.

Johan Baptijihbuh Zübekhi

⁵⁷ Küyimki Elizabeth khungarü zübepü kim khiungkhea, alibenü tsührü khülang zübe.

⁵⁸ Alibe yamhingrübonü anihbe ki Atungpuhnü amüthsüm huhkhi sochoki arünü anihbe lung asühachih.

⁵⁹ Tüsho atizheah nipü arünü khungarü ju tsütabahpü arü; tüsho arünü api mung ju abuh müshide Zakaria de ajipü thsü,

⁶⁰ Tüshe abenü tha, “Yung; api mung Johan de ajibah.”

⁶¹ Arünü alibe ki tha, “Nüsa betsührü bolung ha mungnü ajirü she müla.”

⁶² Jumonü api mung küde ajibeanü arünü abuh ki amütsan thsüa huh.

⁶³ Apinü athrütbe lungbeak khülang kheangbah thrütde tha, “Api mung Johan ah.” Tüsho arü alalanü müyinsah.

⁶⁴ Zukleangnü api mün khimshuhde amulo kikkhi tsüabah, tüsho Thrünpuh shide thiyu tha.

⁶⁵ Judüki arü mühi larü alala kheak atrepü arü; tüsho Judea lomi alala ching mihtsürübonü ha dünkheak thaachih

⁶⁶ tüsho ha sorü alalanü müyinsahde tha, “Ha khungarü küdürü labea ki du?” Tüsho Atungpuh khah api kheak lakheah.

Zakarianü Müchitkhi

⁶⁷ Tüsho abuh Zakaria Amüsüh Menü mide kambah müchitde tha,

⁶⁸ “Atungpuh Israel Thrünpuh shiang, tümüde apinü rhuakheahdo tüsho api mihtsürü rhokhit,

⁶⁹ tüsho api yamlarü David yam ching apinü isa thsungkheak akhümkhit juh shuhkih,

⁷⁰ adüsonü alakhi api yo amüsüh wukihrübo mün hode apinü asukkhi nangde,

⁷¹ junangde isa riribo tüsho isa thraneanrü alala khah chingnü isa khümkhit;

⁷² isa bebuhrü ki amüthsüm alokhikhi rhimopü, tüsho api amüsüh tangzüng lümkhitpü,

⁷³ apinü isa jipürü Abraham ki thiyuchihchimkhi:

⁷⁴ isa riribo khah chingnü isa bekhitpü, tüsho mütrede isanü api tankihkhukshihpü,

⁷⁵ isa nimungbo alala ching api miki amüsüh tüsho thiyuro-lungki ching lapü.

⁷⁶ Tüsho nü khungarü, Khide Achang yo wukihrü de ajibah; tümüde nünü api limrobo thsakhampü Atungpuh müngüh yübah,

⁷⁷ api mihtsürübo kilim arü neak bahkhi ching akhümkhit mükheahmudu jihpü,

⁷⁸ isa Thrünpuh mihmüthsüm lakhinü, küpü hode yinmi chingnü isa kheak ani akhiukba,

⁷⁹ amiting ching larü yinshihpü tüsho ashe alamme ching larü kheak yinshihpü, isa jingdükü mungtsü limro ching bepü lah.”

⁸⁰ Azübuh ju zode arü tüsho me ching düküngde kam; api Israel boto miki muhuhyi khiungde sunglo ching lakheah.