LEVI 4 - AMÜSÜH HÜM CL Bible (BSI)

Müreanglim Neak Kingaün

¹ Atungpuhnü Mosa ki tha,

² Israel mihtsürübo ki thaang, Müreanglimnü Atungpuh yukhüm lakshide khürü rhimokhinü neak yihbeaksho thiyukhüm harünü arhükbah:

³ Mujude-müsühkhitkhi amükeambuhnü neak yihbeakde mihtsürübo kurungkheak amakham arüsho, apinü moshipung nunu lapha mükihkhi api neak dün Atungpuh kilim kingaünbah.

⁴ Apinü moshipung ju Atungpuh shorupung khimyam ripit ki bedarübah, akhahnü aku kheak nimbah, tüsho ju ching Atungpuh mikinü alaksahbah.

⁵ Mujude-müsühkhitkhi amükeambuhnü moshipung thiyih khürü lubah Atungpuh shorupung khimyam lim arübah;

⁶ tüsho amükeambuhnü thiyih ching ju ayingkhing thsambah amüsüh khim zhinkhi miki thüne ki rhakbah.

⁷ Amükeambuhnü thiyih khürü lubah Atungpuh shorupung khimyam ching arhümthüneakhi kingaünpung juhbo kheak bukkihbah, tüsho aningkhi thiyih ju khimyam ripit ki lakhi taka kingaünpung jing kheak dungkihbah.

⁸ Apinü neak kingaünkhi moshipung chingnü amüdang alala yihkhita lubah: bukningbo muhiukhi müdang tüsho bukning mükamde amüdang alala,

⁹ amügüe mahne lung azungyin ching zahkhi amüdang, tüsho amüsan she de amügüe mahne lung yihkhita jihbah.

¹⁰ Apinü mungtsü kingaün thsungkheak shiwüh laksahkhi müdang yihkhitkhi nangde amükeambuhnü ha müdang lubahle kingaünpung kheak taka kingaünbah.

¹¹ Tüshe apinü aküp, ashihtsü, aku, ajingbo, bukningbo tüsho arhubo,

¹² lubah binpung aleanglim awah suka bahpung amüsüh dangpung ching wukhiukbah, tüsho sang kheak monü takabahbah.

¹³ Israel trük athrünkhinü müreanglimnü neak yihbeakde boto miki ramsho, tüsho Atungpuh yukhüm thsümünimde amülim kamsho,

¹⁴ neak ramkhit yanalünde, Israel trük athrünkhinü moshipung nunu neak kingaün thsungkheak jihang. Arünü ju Atungpuh shorupung khimyam ching handarübah;

¹⁵ tüsho boto ching azothsürübonü aku kheak arü khahnü animbah, tüsho ju ching laksahbah.

¹⁶ Mujudemüsühkhitkhi amükeambuhnü moshipung thiyih khürü lubah khimyam ching yüzahbah,

¹⁷ ju ching ayingkhing thsambah, tüsho amüsüh khim zhinkhi miki thüne ki rhakbah.

¹⁸ Tüsho apinü thiyih khürü khimyam alunglim Atungpuh miki kingaünpung juhbo kheak yihkihbah, tüsho aningkhi thiyih khimyam ripit ki taka kingaünpung jing kheak apinü adungkihbah.

¹⁹ Tüsho apinü amüdangbo lubahle kingaünpung kheaknü atakbah.

²⁰ Apinü neak kingaün jihchoki moshipung akhualokhi nangde, ha moshipung kheak she arhimobah, tüsho ha ruk apinü mihtsürübo neak dünthsükhipü jihbah, tüsho arübo neak bahjihbah.

²¹ Apinü anihbuh neak dünkheak akhuhlim moshipung taka kingaünkhi ruk, ju moshipung khimyam aleanglim lude wukhiukbah atakbah. Ha boto dünkheaknü neak kingaün ah.

²² Yakzanshuhrü khülangnü müreanglimnü neak yihbeakde api Thrünpuh Atungpuh yukhüm khürü thsümünimbah amülim kamsho,

²³ tüsho anihbuh neak apinü mükheahkhitsho, apinü nihbuh kingaün lapha mükihkhi mihnupung handarübah.

²⁴ Apinü akhah aku kheak nimbah tüsho taka kingaünbe laksahpung, Atungpuh mikinü alaksahbah. Ha neak kingaün ah.

²⁵ Tüsho amükeambuhnü neak kingaünkhi thiyih khürü ayingkhing kheak thsamkih-a lubah tüsho taka kingaünpung juhbo kheak yihkihbah, tüsho aningkhi thiyih ju taka kingaünpung jing kheak bukkihbah.

²⁶ Mungtsü kingaün ching amüdang shuhmülanga jihkhi ruk apinü amüdang kingaünpung kheak takbah; junangde amükeambuhnü anihbuh dünkheak shuhmülanga jihbah, tüsho api neak bahjihbah.

²⁷ Mihtsürü ah dümung khürünü müreanglimnü neak yihbeakde Atungpuh yukhüm khürü thsümünimbah amülim kamsho,

²⁸ tüsho anihbuh neak apinü mükheahkhitsho, apinü nihbuh kingaün lapha mükihkhi mihnu dre handarübah.

²⁹ Apinü akhah aku kheak nimbah tüsho taka kingaünbe laksahpung kinü alaksahbah.

³⁰ Amükeambuhnü neak kingaünkhi thiyih khürü ayingkhing kheak thsamkih-a lubah tüsho taka kingaünpung juhbo kheak yihkihbah, tüsho aningkhi thiyih ju taka kingaünpung jing kheak bukkihbah.

³¹ Mungtsü kingaünbe chingnü amüdang yihkhitkhi ruk apinü amüdang yihkhitbah, tüsho amükeambuhnü ju kingaünpung kheak arhümthüneakhinü Atungpuh asühshihpü takbah, hanangde neak dünthsükhibah, tüsho api neak bahjihbah.

³² Neak kingaün thsungkheaknü apinü namfimihnu handarüsho lapha mükihkhi dre thsübeah,

³³ tüsho apinü akhah aku kheak nimbah tüsho taka kingaünbe laksahpung kinü alaksahbah.

³⁴ Amükeambuhnü neak kingaünkhi thiyih khürü ayingkhing kheak thsamkih-a lubah tüsho taka kingaünpung juhbo kheak yihkihbah, tüsho aningkhi thiyih ju taka kingaünpung jing kheak bukkihbah.

³⁵ Tüsho apinü mungtsü kingaün thsungkheak laksahkhi namfimihnu kheaknü amüdang yihkhitkhi ruk, amüdang yihkhitbah, tüsho Atungpuh kilim taka kingaünkhibo lung thsürubah amükeambuhnü kingaünpung kheak takbah. Hanangde amükeambuhnü mihtsürü neak dünthsükhijihbah, tüsho api neak bahjihbah.