LEVI 27 - AMÜSÜH HÜM CL Bible (BSI)

Atungpuh kilim Thsambah Jihkhi Yakzanbo

¹ Atungpuhnü Mosa ki tha:

² Israel mihtsürübo ki thaang: Küyimki khürünü thiyuchihchimde Atungpuh kilim mihtsürü müsühkhitchoki amo dünde akhuarabanü,

³ athrürü kam 20 le 60 dükeak arüngyam ching akhukhi yande shotoyinchi 50 dünde akhuang;

⁴ tüsho aliberübo a-sho anihbe dün shotoyinchi 30 akhuang.

⁵ Mihtsürü ju kam 5 le 20 dükeak a-sho, athrürü dün shotoyinchi 20 tüsho aliberü dün shotoyinchi 10 de akhuang.

⁶ Mihtsürü ju khinu 1 le kam 5 dükeak a-sho, athrürü dün shotoyinchi 5 tüsho aliberü dün shotoyinchi 3 de akhuang.

⁷ Mihtsürü ju kam 60nü akumung a-sho, athrürü dün shotoyinchi 15 tüsho aliberü dün shotoyinchi 10 de akhuang.

⁸ Thiyuchihchimpü mihtsürü ju khide zhochihkhi hode adün mode müjihkhuksho, apinü mihtsürü ju amükeambuh ki bedarübah, tüsho mihtsürü junü ajihkhukpü thsüde amükeambuhnü adün keamkhide akhubah.

⁹ Shiwüh khülang Atungpuh kilim kingaünpü hande arüsho, judürü Atungpuh kilim jihbe amüsüh labeah.

¹⁰ Püpü lung mümüthriachih yungsho atsü müthri amütsü yungsho amütsü müthri atsü de mümüthri; tüsho apinü shiwüh le shiwüh ane müthriachihsho, ane chido amüsüh labeah.

¹¹ Tüsho shiwüh ju Atungpuh kilim mükingaünkhi amümüsüh a-sho, mihtsürü junü shiwüh ju amükeambuh kilim handarübah,

¹² tüsho amükeambuhnü atsü amütsü akede adün ju arün thsüde akhubah.

¹³ Mihtsürü junü rhokhitlopü lümsho, apinü adün akhukhi kheak shihcham phüngü ching khülang yukbah ajihbah.

¹⁴ Mihtsürü khülangnü nihbuh yam Atungpuh kilim müsühkhitsho, amükeambuhnü atsü yungsho amütsü thsüthsü adün akhubah; amükeambuhnü akhukhi ching arün thsübah.

¹⁵ Thüyam müsühkhitbuhnü arhokhitlopü lümsho, apinü adün akhukhi kheak sho shihcham phüngü ching khülang yukbah ajihbah, tüsho ju api yo thsübah.

¹⁶ Mihtsürü khülangnü nihbuh lu shihcham Atungpuh kilim müsühkhitsho, adün ju müjih yukkhi thülünnü akhubah, barli hi tramduhkhüh dün shotoyinchi 50 akhubah.

¹⁷ Apinü thulu ju Jubilee kam ching müsühkhitsho, adün ju akhuabahkhi lang ayanbah;

¹⁸ tüshe apinü thulu ju Jubilee dunglim müsühkhitsho, amükeambuhnü sho dün ju arübe Jubilee kam khiungde khebah adün keamkhijihbah.

¹⁹ Müsühkhitde ajihbuhnü ju rhokhitlopü lümsho, apinü adün akhukhi kheak shihcham phüngü ching khülang yukbah ajihbah tüsho ju api yo thsübah;

²⁰ tüshe thulu ju mürhokhitsho, yungsho püpürü ki yina lasho, ju küyimkishe mürhokhitlokhuk.

²¹ Küyimki arübe Jubilee ching thulu ju zuzu kamshihbanü, ju Atungpuh kilim shuhmülanga jihkhi lu amüsüh kambah; ju amükeamrübo yo thsübah.

²² Mihtsürü khülangnü yamrüplurüp chingnü yungde nihbuhnü athulokhi thulu Atungpuh kilim müsühkhitsho,

²³ amükeambuhnü arübe Jubilee kam khebah adün ju akhubah, tüsho adün akhukhi ju apinü ju nimungnü Atungpuh kilim amüsüh kingaün nangde ajihbah.

²⁴ Jubilee kam ching thulu ju shepü kheaknü athulokheanü Atungpuh kilim jihlobah.

²⁵ Adün akhukhi alala arüngyam ching lakhi shotoyinchi yande alabah: gera 20nü shekel 1 akhubah.

²⁶ Akhuhde adrekhi shiwüh ju Atungpuh yo kamabahdo, shenü she dümüsühkhit; moshipung thsüthsü mihnu thsüthsü, ju Atungpuh yo ah.

²⁷ Shiwüh ju mümüsühkhi a-sho, apinü adün akhukhi yande rhokhitbah, tüsho ju kheak shihcham phüngü ching khülang yukbah; yungsho ju mürhokhitsho apinü akhukhi yande ayinbah.

²⁸ Tüshe mihtsürübonü Atungpuh kilim kingaünkhi, mihtsürü yungsho shiwüh, yungsho yamrüplurüp lukhi thulu thsüthsü, müyinkhuk yungsho mürhokhitkhuk; shuhmülanga jihkhi kukruk abannü Atungpuh kilim khide amüsüh lah.

²⁹ Mihtsürü bolungnü thsümünima bahpü akhukhita lakhi mihtsürü ju mürhokhitkhuk, api dükde asheshihbah.

³⁰ Alo chingnü akhiukkhi thürü shihcham alala, hi yungsho sangaso thsüthsü, Atungpuh yo ah. Ha Atungpuh kilim amüsüh lah.

³¹ Mihtsürü khürünü nihbuh kingaün shihcham rhokhitnesho, apinü ju ching shihcham phüngü ching khülang yuklobah.

³² Tüsho moshi boto le namfimihnu boto shihcham thsungkheaknü küpü namfimihnu neakbuh tso bukkhüp lanü, athürüpü ju Atungpuh miki amüsüh labah.

³³ Apinü atsü yungsho amütsü dünkheak mükeokhi, yungsho mümüthriachih, apinü zhide lang müthrisho, ane chido Atungpuh yo thsübah, ju mürhokhitkhuk.

³⁴ Harü thiyukhümbo ha Israel mihtsürübo thsungkheak Atungpuhnü Mosa kilim Sinai Müzüng kheaknü ajihkhi lah.