LEVI 26 - AMÜSÜH HÜM CL Bible (BSI)

Mihyuanikhi thsungkheak Müngühmühi

¹ Nüsanü nüsa thsungkheak sangthsü tümü düthsü tüsho sangthsü yungsho dungjing düzhipshih, tüsho khukningde kingaünpü thsüde lung lamkhita nüsa lo ching düzhipshih; tümüde I Atungpuh nüsa Thrünpuh.

² Nüsanü I yo amunibo zoang tüsho I yo amüsüh dangpung wüntreang: I Atungpuh ah.

³ Nüsanü I yakzan thsükhibo yansho tüsho I yuzüngbo thiyuronü leangkhisho,

⁴ inü nüsa kilim akheahmünchi ching tsüng arüshihbah, tüsho alonü hi mukhuhshihbah tüsho mütüm sangdungbonü aso asobah.

⁵ Nüsa lu ju khide pung-alungde kurungaso rho khiungde yimlubah, tüsho mükhean kim khiungde kurungaso rhobah; nüsanü atsühnekhi suhdahde angübah tüsho nüsa lo ching nüsa tsokhita labah.

⁶ Inü nüsa lo ching mungtsü lashihbah, tüsho nüsa zuh-a yapbah tüsho shenü nüsa mütreshih; inü lomi ching ahürhang shiwühbo yankhita bahbah, tüsho ju ching keochih mülade akambah.

⁷ Nüsanü nüsa riri yande amüshambah tüsho arübo nüsa müngüh nukshangnü akeamshihbah.

⁸ Nüsa phüngünü chi khülang yande müshambah, tüsho nüsa chi khülangnü chithürü thürü yande müshambah; nüsa riribo nüsa müngüh nukshangnü akeamshihbah.

⁹ Inü nüsa kheak künde akheahbah tüsho nüsa aso asode wüh bushihbah, tüsho inü tangzüngkhi nüsa kheak zobah.

¹⁰ Nüsanü shangde azokhi hi wün tsühbah tüsho hi aso yukpü thsungkheaknü wukhita bahbah.

¹¹ Inü I lapung nüsa bolung zobah, tüsho inü nüsa mübahyuk.

¹² I nüsa lung tsahbah tüsho nüsa Thrünpuh thsübah, tüsho nüsa I mihtsürü thsübah.

¹³ I Atungpuh nüsa Thrünpuh hode nüsa arü azhorü müthsüshihpü Ijip lomi chingnü bekhit; inü nüsa sangkaplak yihshakjih tüsho langakindo tsahshih.

Mihyumanikhi thsungkheak Thsümüchi

¹⁴ Tüshe nüsanü I ki manisho, tüsho thiyukhümbo alala müleangkhisho,

¹⁵ tüsho I yakzan thsükhibo manisho tüsho I yuzüngbo manisho yungsho I yukhümbo alala müleangkhide tangzüngkhi thsümünimsho,

¹⁶ inü nüsa kheak ha rhimobah: Inü nüsa kheak zukleangnü atrebe handarübah; nüsa mük tukshihpü tüsho rhangdung dükheakshihpü thsüde amungube tukthsü tüsho phütsak arüshihbah. Nüsanü müjih akeangkeang ching hiubah, tümüde nüsa riribonü jurü tsühbah.

¹⁷ Inü I miro nüsa azhihde akheahbah, tüsho nüsa riribonü nüsa laksahbah, nüsa thraneanrünü nüsa kumung yakzan shuhbah, tüsho nüsa müshamrü mülalashe nüsa alihde atsobah.

¹⁸ Harübo dünjishu she nüsanü I yu manisho, kheaküshe nüsa neak dünkheak inü thüne ki thsümüchibah.

¹⁹ Inü nüsa kükheangkhi wu thsümünimjihbah; inü nüsa kumung lakhi thüning yinchi nangde akamshihbah tüsho nüsa bukkhüp lakhi alo ju müwayinchi nangde akamshihbah.

²⁰ Nüsa sühmüh akeangkeang ching bahbah, tümütüsho nüsa lonü hi makhiukshih tüsho sangdungbonü aso masojih.

²¹ Kheaküshe nüsanü I azhihsho tüsho I yu manisho, nüsa neak dünkheak thüne ki mutuklode athsümüchibah.

²² Inü nüsa azhihde mütüm shiwüh dükhebah, tüsho jurünü nüsa tsührübo nguhsahbah, nüsa yo akam-shiwüh nguhsahbah; arünü nüsa anükhüh lang aningshihbah tüsho nüsa limdungtobo zhikabahshihbah.

²³ Harü thsümüchishu nüsanü I kilim murholosho tüsho mutuklode I azhihsho,

²⁴ inü she nüsa kheak azhihbah, tüsho nüsa neakbo dünkheak inü thüne ki thsümüchibah.

²⁵ Nüsanü I kheak tangzüngkhi thsümünimkhi royimlopü inü nüsa kheak nukshang handarübah, tüsho nüsanü nüsa kiutobo ching yüsho, inü nüsa bolung arüm arüshihbah, tüsho nüsa riribo khah ching yüzahshihbah.

²⁶ Küyimki inü nüsa tsühyungpü zhimzhakshihbanü, aliberü thürünü yinchi kuk khülang ching yikhap dambah, tüsho arünü adünloa nüsa kipbah; ju nüsanü atsühbah, tüshe bukmüthsü.

²⁷ Hade athsüshu she nüsanü I azhihde mükthsüsho,

²⁸ inü she I bukakhiukde nüsa kheak mükthsübah; tüsho nüsa neak dünkheaknü thüne ki thsümüchibah.

²⁹ Nüsanü nihbuh tsührü le tsührübebo shih tsühbah.

³⁰ Achang dangpungbo kheak lakhi nüsa kingaün sadambo inü thsümünimjihbah, arhümthüneabe kingaün sadambo keamshihbah, tüsho nüsa ashemibo rhangdung mülakhi nüsa sangthsübo kheak jipkih-a bahbah; tüsho I menü nüsa thraneanbah.

³¹ Inü nüsa kiutobo akeangkeang kamshihbah tüsho amüsüh dangpungbo zhikabahshihbah, tüsho nüsanü arhümthüneabe kingaünkhi mümünimjih.

³² Inü nüsa yingyingbe khungshihbah, tüsho ju ching lapü arürü nüsa riribonü ju ngübah müyinsahbah.

³³ Inü nüsa trükshih bolung müzütshihbah tüsho nüsa azhihde nukshang thokhitbah; nüsa lo zhikabahbah tüsho kiutobo akeangkeang kambah.

³⁴ Nüsabo nüsa riri lomi ching lachoki alo zhikrangkhündo thsümünima lakhi khiungde alonü amunibo leangkhibah; tüsho alonü sühakhimbah tüsho amuni asühde leangkhibah.

³⁵ Ju thsümünima yapkhi khiungde sühakhimbah, ha sühakhim ju nüsa ju ching lachoki amunibo ching nüsanü müngükhukkhi sühakhim labah.

³⁶ Nüsa sherübo rhangdung lanü nüsa riri lo ching inü nüsa mulong ching trede akamshihbah; sangyü keamkhikhi düsheaknü nüsa tsoshihbah, tüsho nüsabo nukshang müngüh tsokhi nangde atsoshihbah, tüsho nüsabo shenü müyande angaka yapbah.

³⁷ Nüsabo shenü müyande, nukshang müngüh tsokhi ruk khülangnü khülang kheak mürhemülüna mülade akambah.

³⁸ Lomi bolung nüsa dükheakshihbah, tüsho nüsa riri lonü nüsa tsühabahbah.

³⁹ Nüsa sherübo aninga lanü nihbuh neak tüsho jipürü neak dünkheaknü nüsa riri lo ching dükheakbah.

⁴⁰ Tüshe nüsanü nihbuh neak tüsho jipürü neak alokhisho, küpünü I kheak thiyuro mülashihkhea, tüsho I azhihkhea,

⁴¹ tüsho inü nüsa azhihkhi hode nüsabo thiriri lo ching hande yükhea; nüsa mulong tsütamübahkhi azhihayihde kamsho, tüsho nihbuh neak le azhihde atsahkhi thsüphulosho,

⁴² inü Jakob, Isak tüsho Abraham kheak tangzüngkhi lümkhitbah, tüsho inü alomi lümkhitbah.

⁴³ Tüshe arünü alo ju akeangkeang lashihbah, tüsho arübo mülade zhikrangkhündo alachoki amunibo asühde amungbah; arübonü nihbuh neak dün thsüphulobah, tümütüsho arübonü I yakzan tüsho thiyukhümbo bahyuk.

⁴⁴ Tütüshe, arübo arü riri lomi ching lalashe, inü arübo mübahyuk yungsho shahde müthsümünim, tüsho arü kheak inü tangzüngkhi müthsümünim; tümüde I Atungpuh arü Thrünpuh.

⁴⁵ Tüshe arü ki inü arü jipürü kheak tangzüngkhi lümkhitbah, arübo inü trükshih miki Ijip chingnü I arü Thrünpuh thsüpü bekhit: I Atungpuh ah.

⁴⁶ Harü ha Atungpuhnü Sinai Müzüng kheak api tüsho Israel mihtsürübo dükeak Mosa hode ajihkhi yakzan thsükhibo, thiyuzüngbo tüsho yakzanbo ah.