LEVI 19 - AMÜSÜH HÜM CL Bible (BSI)

Amüsüh tüsho Thiyuro Yakzanbo

¹ Atungpuhnü Mosa ki tha,

² Israel trükbo ki thaang: Nüsa müsühde laang, tümüde I Atungpuh nüsa Thrünpuh amüsüh ah.

³ Nüsa mihbüm abannü berü tüsho buhrü wüntreang, tüsho I yukhüm yande amuni mungbeah. I Atungpuh nüsa Thrünpuh.

⁴ Sangthsübo kilim dürholo yungsho nüsa thsungkheak düthsü: I Atungpuh nüsa Thrünpuh.

⁵ Küyimki nüsanü Atungpuh kilim mungtsü kingaün thsungkheak laksah-a jihbanü, nüsa thsungkheak inü aleangkhikhukpü thsüde jihang.

⁶ Nüsanü akingaünkhi shih ju, ju nimung yungsho ashidopünü tsühabahbeah. Tüsho nimung asam nipü aningkhi shih ju monü takabahbeah,

⁷ asam nipü tsühsho, ju athraneanbe ah; kingaün ju müleangkhi.

⁸ Ha tsührü alala nihbuh zangrü neak hanbah, tümüde arünü Atungpuh kilim amüsüh kukruk mükhemükimdo; tüsho ju mihtsürü ju mihtsürü bolungnü khekhita bahbah.

⁹ Küyimki nüsanü thulu yimlubanü, thulu tsünthri khiungde düyimlu tüsho yimluabahshu amüdrebo dümo.

¹⁰ Nüsa kurungasolu ching lumüdümkhi yungsho ayokhikhi mopü düyülo; jurübo zhochihrü mihtsürübo tüsho khiungkerübo khilim zojang. I Atungpuh nüsa Thrünpuh.

¹¹ Nüsanü dahüh yungsho rük thsüde dümülapyuk yungsho khülangnü khülang ki akeangyu dütha.

¹² Tüsho nüsa Thrünpuh mükhemükimde I mung chingnü thiyuchihchim düthsü: I Atungpuh ah.

¹³ Nü yamhingrü düjuno; nünü düjangkhijangra; tüsho rhimorü mihkhahmo nü thsungkheaknü yapsu khiungde düzo.

¹⁴ Nünü nükhünpeangrü dathru tüsho müktukrü müngüh jing mükhebe düzojih; nünü nü Thrünpuh treang: I Atungpuh ah.

¹⁵ Nünü thiyuro müthade mah dükhap; nünü zhochihrü ki jak dükheah, yungsho atorü ki dütre: Thiyuronü nünü nü yamhingrü mahkhapang.

¹⁶ Nünü nü mihtsürü lung jipjiprarade wutula akila de düthsü, tüsho nü yamhingrü rhangdung azhihde düzhip: I Atungpuh ah.

¹⁷ Nünü nü mulong chingnü keoniorü müthraneanbeah, tüsho nü yamhingrü tsükjide thürühang, jude yungsho api neak nünü ahanbah.

¹⁸ Nünü nü mihtsürü azhihde rodüyim, yungsho mükthsühüthsü düla, tüshe nünü nü yamhingrü ki nihbuh nangde muzhoang: I Atungpuh ah.

¹⁹ Nünü I yuzüng thsükhibo zoang. Akam-shiwühnü buh shihshih kheak düdungshih. Thulu khülang ching müjih mahne düyang. Yungsho kukruk mahne thsürubah akeakkhi khim düphuyu.

²⁰ Mürhokhityikhi yungsho zuzu mükamshihyikhi azhorü liberü khülang athrürü khülangnü thiyuzokhi kheak püpürü khürünü müzammüramsho, ane thsümüchibah tüshe müsheshih, tümüde alibe ju azhorü liberü ah;

²¹ tüshe apinü ashorupung khimyam ripit ki mihnupung khülang amülim kingaün Atungpuh kilim handarü ajihbah.

²² Tüsho amükeambuhnü amülim kingaünkhi mihnupung ju lua apinü ayihbeakkhi neak dünthsükhipü Atungpuh kilim jihbah; tüsho api neak bahjihbah.

²³ Küyimki nüsa Kanan lomi ching arübahle sangasodung khimbanü, aso ju kam mahsam mümüsüh de lümang. Ju dükeak ching nüsanü mütsühbeah.

²⁴ Kam phüyipü ching sangaso alala Atungpuh kilim mungshide kingaün jihkhi amüsüh kambah.

²⁵ Tüshe kam phüngüpü ching a nüsanü sangaso ju atsühpü kuklah, junangde nüsa thsungkheak hihde asobah. I Atungpuh nüsa Thrünpuh ah.

²⁶ Shih tümü she athiyih zahde dütsüh. Nüsanü müchitmudu yungsho thümüthiyi dahori.

²⁷ Nüsanü nüsa müchipnam hütadübah, yungsho mükhühnam dünipmüchih.

²⁸ Ashekhi dünkheak nüsa pang kheak dütsüt yungsho nüsa kheak yak düdo: I Atungpuh ah.

²⁹ Nüsa tsührü aliberübo müzammüramkhinü mungchih düngüshih; jude yungsho müzammüram le mihbukmuyuknü alomi mide akambah.

³⁰ I amunimung yihkhialung, tüsho I kingaünpung arüngyam kheak wüntreang. I Atungpuh ah.

³¹ Mesherü tüsho judürü mebo kilim düyü; arünü nüsa müneanshihpü arü düyim: I Atungpuh ah.

³² Nünü ku buyukrü miki wusuang tüsho ashinbuhrü ki akin jihang, tüsho nü Thrünpuh treang: I Atungpuh ah.

³³ Küyimki khiungkerü khülang nüsa lo ching nü lung labanü, nünü dükheahmüchih.

³⁴ Nüsa lung lakhi khiungkerü ju mihkhung nangde alabah; nünü khiungkerü ki nihbuh nangde muzhoang, tümüde nüsa Ijip ching khiungkerü lakheah: I Atungpuh nüsa Thrünpuh.

³⁵ Nünü ayunglim akekhi, wuh-a adünkhi tüsho mülangmüyi adünarakhi ching rük düthsü.

³⁶ Sangkhik dükde, wuh-a adünbe dükde, keluh tüsho adünarabebo nüsanü dükde ahoribeah: I nüsa Ijip lomi chingnü bede akhiukbuh Atungpuh nüsa Thrünpuh ah.

³⁷ Nüsanü I yakzan thsükhibo tüsho I yuzüngbo alala yanang, tüsho jurü rhimoang: I Atungpuh ah.