LEVI 18 - AMÜSÜH HÜM CL Bible (BSI)

Müzammüram Rhimobo Zhipdokhi

¹ Tüsho Atungpuhnü Mosa ki tha,

² Israelrü mihtsürübo ki thaang, I Atungpuh nüsa Thrünpuh.

³ Nüsa lapung Ijip ching arünü arhimokhi düyan, tüsho inü nüsa bede arüpung Kanan ching arünü arhimokhi dürhimo. Nüsanü arü yakzan thsükhibo düyan.

⁴ Nüsanü aniang tüsho I yakzan thsükhibo zoang. I Atungpuh nüsa Thrünpuh.

⁵ Nüsanü I yakzan thsükhi tüsho I yuzüngbo zoang; jude athsükhinü nüsa rhangdung labah, I Atungpuh .

⁶ Nüsa shenü she betsührü kheak müzammüram düthsü: I Atungpuh .

⁷ Nü be kheak müzammüramkhi hode nü buh mungchih düngüshih, anihbe ju nü be ah, nünü anihbe mungchih düngüshih.

⁸ Nü buh niube kheak müzammüram düthsü; junü nü buh mungchih ngüshihbah.

⁹ Thüyam khülang chingnü yungsho püpü chingnü zübemusukhi, nü chi yungsho buh buhbuh buh bebe kheak yo chiniurü kheak müzammüram düthsü.

¹⁰ Nü tsührü tsührübo kheak müzammüram düthsü; tümüde arü mungchih ju nü mungchih ah.

¹¹ Nü buh niubenü azübekhi liberü kheak müzammüram düthsü; anihbe she nü chi ah.

¹² Nünü nü buh chiniurü kheak müzammüram düthsü; anihbe nü buh keoniorü khung ah.

¹³ Nü be chiniurü kheak müzammüram düthsü; tümüde anihbe nü be keoniorü khung ah.

¹⁴ Nünü nü buh keoniorü niube kheak müzammüram düthsü, anihbe nü keo ah.

¹⁵ Nü tsühmeakbe kheak müzammüram düthsü. Anihbe nü tsührü niube ah; anihbe lung dünung.

¹⁶ Nü khiung niube kheak müzammüram düthsü, junü nü khiung mungchih ngübah.

¹⁷ Berü tüsho tsührü chido kheak müzammüram düthsü, yungsho anihbe tsührü tsührübo kheak müzammüram düthsü; ju anihbe keoniorü khung ah, hoju mütsüdak.

¹⁸ Nü niube rhangdung la khiungde anihbe azhihde alibe mungchihshihde nünü nü niube niurü düyihlu.

¹⁹ Aliberü thiyih yüde mümüsühkhi kim ching dünung, tümüde alibe mümüsüh.

²⁰ Püpürü niuberü lung düyap; junü nü müneanshihbah.

²¹ Nüsa tsührü sheshe Molek thrünpuh ki monü dükingaün, tümütüsho, junü nüsa Thrünpuh mung ching mungchihbah: I Atungpuh .

²² Aliberü kheak nangde nünü athrürü lung düyap; ha athraneanbe ah.

²³ Athrürü yungsho aliberü shenü she shiwüh kheak müzammüram düthsü: ha adungmihkhi lah.

²⁴ Harü rhimokhinü nüsa dümünean, tümüde harü rhimo hode inü nüsa müngüh yankhita bahkhi trükshihbonü arü zangrü müneana lah.

²⁵ Hanangde alo müneanabah; tüsho ju neak dünkheak inü thsümüchichoh, tüsho ju ching lakhi mihtsürübo alonü mülüma bah.

²⁶ Tüshe Israelrü yungsho nüsa lung larü khiungkerü thsüthsü, nüsanü I yakzan thsükhibo tüsho thiyuzüngbo zoang

²⁷ (tümüde lomi ching nüsa müngüh larübonü harü athraneanbe rhimokhi hode alo müneanabah);

²⁸ jude yungsho nüsanü ju müneankhi hode nüsa müngüh larü trük mülümkhita bahkhi nangde, alonü nüsa she mülümkhita bahbah.

²⁹ Tümüde harü athraneanbe rhimo arü mihtsürü bolungnü khekhita bahbah.

³⁰ I yukhümbo aniang tüsho nüsa müngüh larü mihtsürü rhimobo düyan, tüsho harü athraneanbebo rhimokhinü nüsa dümünean. I Atungpuh nüsa Thrünpuh.